ବିମୁଦ୍ରୀକରଣକୁ ସ୍ଲୋ ପଏଜନ କହୁଥିବା ଅଖିଳେଶ ବ୍ୟକ୍ତିଗତ କ୍ଷତି ସହିଛନ୍ତି: ବିଜେପିର କଡ଼ା ଜବାବ୍

ଲକ୍ଷ୍ନୌ: ସମାଜବାଦୀ ପାର୍ଟିର ରାଷ୍ଟ୍ରୀୟ ସଭାପତି ତଥା ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ବିମୁଦ୍ରୀକରଣର ଅଷ୍ଟମ ବାର୍ଷିକୀରେ ବିଜେପିକୁ କଡ଼ା ସମାଲୋଚନା କରି ଏହାକୁ ଏକ ସ୍ଲୋ ପଏଜନ ବୋଲି କହିଛନ୍ତି। ୨୦୧୬ ନଭେମ୍ବର ୮ରେ କେନ୍ଦ୍ରର ବିଜେପି ସରକାର ନେଇଥିବା କଳା ପଦକ୍ଷେପର ପ୍ରଭାବ ଏବେ ମଧ୍ୟ ଦେଶ ଭୋଗୁଛି ବୋଲି ସେ କହିଛନ୍ତି।

ଏହା ବିଶ୍ବର ସବୁଠାରୁ ବଡ ଦୁର୍ନୀତି। ବିମୁଦ୍ରୀକରଣ ପରେ ଏହା ସହ ଜଡିତ କୌଣସି ଲକ୍ଷ୍ୟ ହାସଲ ହୋଇପାରି ନାହିଁ ଏବଂ ଏହା ସମାଜର ପ୍ରତ୍ୟେକ ବିଭାଗକୁ କ୍ଷତି ପହଞ୍ଚାଇଛି। ବିମୁଦ୍ରୀକରଣ ସମୟରେ ବ୍ୟାଙ୍କରେ ଲାଗିଥିବା ଲମ୍ବା ଲାଇନ ଲୋକଙ୍କୁ ବହୁ ପୀଡ଼ା ଦେଇଥିଲା। ଲୋକେ ମାନସିକସ୍ତରରେ ଭାଙ୍ଗି ପଡ଼ିଥିଲେ।

ଅଖିଳେଶଙ୍କ ଏହି ବିବୃତିର ଜବାବ୍ ଦେଇ ବିଜେପି କହିଛି ବିମୁଦ୍ରୀକରଣ ଯୋଗୁ ଅଖିଳେଶ ଯାଦବ ବ୍ୟକ୍ତିଗତ କ୍ଷତି ସହିଛନ୍ତି ଏବଂ ସେ ତାଙ୍କ ଯନ୍ତ୍ରଣା ବଖାଣିଛନ୍ତି। ବିଜେପି ମୁଖପାତ୍ର ରାକେଶ ତ୍ରିପାଠୀ ଅଭିଯୋଗ କରିଛନ୍ତି ଅଖିଳେଶ ବିମୁଦ୍ରୀକରଣକୁ ରାଜନୈତିକ କାର୍ଯ୍ୟ ପାଇଁ ଅପବ୍ୟବହାର କରୁଛନ୍ତି। ବିମୁଦ୍ରୀକରଣ ଗରିବଙ୍କ ଉପରେ କୌଣସି ପ୍ରଭାବ ପକାଇ ନାହିଁ ବୋଲି ସେ କହିଛନ୍ତି।

ଅଖିଳେଶ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସରକାରଙ୍କ ଜିଏସ୍‌ଟି ଏବଂ ଏନକାଉଣ୍ଟର ନୀତିକୁ ମଧ୍ୟ ବିରୋଧ କରିଛନ୍ତି। ସେ କହିଛନ୍ତି ଯେ ବର୍ତ୍ତମାନ ଏନକାଉଣ୍ଟର ପାଇଁ କାଉଣ୍ଟଡାଉନ୍ ଆରମ୍ଭ ହୋଇଛି ଏବଂ ସରକାର ଅଧିକ ଦିନ ରହିବେ ନାହିଁ।

ଅଖିଳେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ସେ କହିଛନ୍ତି ସାଧୁ ଓ ସନ୍ଥଙ୍କ ମଧ୍ୟରେ ଯୋଗୀ ବିବାଦ ସୃଷ୍ଟି କରିଛନ୍ତି। ପ୍ରକୃତ ସାଧୁ ବସ୍ତ୍ର ଦ୍ୱାରା ନୁହେଁ, ନିଜର ବଚନ ଦ୍ବାରା ପରିଚିତି ହୋଇଥାନ୍ତି। 

ଅଧିକ ପଢ଼ନ୍ତୁ: ମହାରାଷ୍ଟ୍ର ନିର୍ବାଚନ ପାଇଁ କର୍ଣ୍ଣାଟକରୁ ୭୦୦ କୋଟି ସଂଗ୍ରହ କରିଛି କଂଗ୍ରେସ: ଅଭିଯୋଗ ଆଣିଲେ ପ୍ରଧାନମନ୍ତ୍ରୀ

ଅଖିଳେଶ ବୁଲଡୋଜରର କାର୍ଯ୍ୟ ଏବଂ ରାଜ୍ୟରେ ମହିଳାଙ୍କ ସୁରକ୍ଷା ପରିସ୍ଥିତି ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ଯେ ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ବିଗିଡି ଯାଇଛି ଏବଂ କୋର୍ଟ ଏହାକୁ "ଜଙ୍ଗଲରାଜ" ଏବଂ "ଅରାଜକତା" ବୋଲି ମଧ୍ୟ କହିଛନ୍ତି। ସେ କହିଛନ୍ତି, ରାଜ୍ୟର ମହିଳାମାନେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ନିଜ ଶରୀରରେ ନିଆଁ ଲଗାଇବାକୁ ଚେଷ୍ଟା କରିଛନ୍ତି। ଯାହା ଦର୍ଶାଉଛି ସରକାରଙ୍କ ନୀତି ବ୍ରିଟିଶମାନଙ୍କ ପରି ହୋଇଛି।

ସରକାର ଡବଲ ଇଞ୍ଜିନ ବିଷୟରେ କଥାବାର୍ତ୍ତା କରୁଛନ୍ତି, କିନ୍ତୁ ଉଭୟ ଇଞ୍ଜିନ ବିପରୀତ ଦିଗକୁ ଯାଉଛି। ଉପନିର୍ବାଚନ ବିଜେପି ସରକାରଙ୍କ କାଉଣ୍ଟଡାଉନ୍ ଆରମ୍ଭ କରିବ ଏବଂ ଜନସାଧାରଣ ଏହି ସରକାର ବିରୋଧରେ ରହିଥିବା ଅଖିଳେଶ କହିଛନ୍ତି।

ଅଧିକ ପଢ଼ନ୍ତୁ: ପାକିସ୍ତାନରେ ଲକଡାଉନ୍: ଏକ୍ୟୁଆଇ ସ୍ତର ଅଧିକ ଯୋଗୁ ସବୁ ଠପ୍