ମହାୟୁତିରେ ଫାଟ ବଢ଼ିଲା: ବିଜେପି ଏକୁଟିଆ ପୌର ନିର୍ବାଚନ ଲଢ଼ିବ!

ମୁମ୍ବାଇ: ମହାରାଷ୍ଟ୍ର ବିଧାନସଭା ନିର୍ବାଚନରେ ​​୧୩୨ଟି ଆସନ ଜିତିବା ପରେ ବିଜେପିର ମନୋବଳ ବଢ଼ିଛି। ଏହି କାରଣରୁ ଦଳ ଆଗାମୀ ଦିନରେ ଏକାକୀ ପୌର ନିର୍ବାଚନ ଲଢ଼ିବାକୁ ଯୋଜନା କରୁଛି। ନିକଟରେ, ବିଜେପି କୋର୍ କମିଟି ବୈଠକରେ, ଦଳର ବରିଷ୍ଠ ନେତାମାନେ ସେମାନଙ୍କର ମତ ପ୍ରକାଶ କରି କହିଥିଲେ ଯେ, ଆମେ ମହାଗଠବନ୍ଧନ ସହିତ ନୁହେଁ ବରଂ ନିଜ ଶକ୍ତିରେ ନିର୍ବାଚନ ଲଢ଼ିବା ଉଚିତ୍।

ନେତାମାନେ କହିଛନ୍ତି ଯେ, ସମ୍ପ୍ରତି ବିଧାନସଭା ନିର୍ବାଚନରେ, ରାଜ୍ୟର ସମସ୍ତ ସ୍ଥାନରୁ ବିଜେପିକୁ ଭଲ ଜନସମର୍ଥନ ମିଳିଛି। ଏପରି ପରିସ୍ଥିତିରେ, ଏବେ ଆମକୁ ପୌର ନିର୍ବାଚନ ପାଇଁ ଏକନାଥ ସିନ୍ଦେଙ୍କ ଶିବସେନା କିମ୍ବା ଅଜିତ ପାୱାରଙ୍କ ଏନସିପିର ଆବଶ୍ୟକତା ନାହିଁ।

ସୂତ୍ର ଅନୁସାରେ, ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାବୀସ ମଧ୍ୟ ଦଳୀୟ ନେତାଙ୍କ ଏହି ମତ ସହିତ ସହମତ ହେଉଥିବା ପରି ମନେ ହେଉଛି। ଶୁକ୍ରବାର ଦିଲ୍ଲୀରେ ଫଡନାବୀସ୍ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ସହ ଏହି ବିଷୟରେ ବିସ୍ତୃତ ଆଲୋଚନା କରିଥିବା ରିପୋର୍ଟ ରହିଛି। ୨୨ ଫେବ୍ରୁଆରିରେ ପୁଣେ ଗସ୍ତରେ ଆସୁଥିବା ଶାହଙ୍କ ସହ ଫଡନାବୀସ ଏହି ପ୍ରସଙ୍ଗରେ ଆହୁରି ଆଲୋଚନା କରିବେ ବୋଲି ଚର୍ଚ୍ଚ ହେଉଛି। ତଥାପି, ବିଜେପିର ଏକୁଟିଆ ନିର୍ବାଚନ ଲଢ଼ିବା ଯୋଜନା ନେଇ ସିନ୍ଦେ ଶିବିରରେ କାର୍ଯ୍ୟକଳାପ ବୃଦ୍ଧି ପାଇଛି।

ମହାଗଠବନ୍ଧନର ଅଂଶବିଶେଷ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ କହିଛନ୍ତି ଯେ, ଆମର ଶିବସେନାକୁ ଦୁର୍ବଳ ବୋଲି ଭାବିବା ଉଚିତ୍ ନୁହେଁ। ତାଙ୍କର ମତ ଯେ, ମହାଗଠବନ୍ଧନରେ ସାମିଲ ସମସ୍ତ ଦଳ ଏକାଠି ନିର୍ବାଚନ ଲଢ଼ିବା ଉଚିତ୍। ଏକୁଟିଆ ନିର୍ବାଚନ ଲଢ଼ିବା ଦ୍ୱାରା, ମହାଗଠବନ୍ଧନରେ ସାମିଲ ସମସ୍ତ ଦଳକୁ ପରିଣାମ ଭୋଗ କରିବାକୁ ପଡ଼ିପାରେ।

ସିନ୍ଦେ ଏହା ଏପରି ସମୟରେ କହିଛନ୍ତି ଯେତେବେଳେ ମୁଖ୍ୟମନ୍ତ୍ରୀ ଫଡନାବୀସ ଦାଦରସ୍ଥିତ ତାଙ୍କ ବାସଭବନରେ ଏମ୍ଏନଏସ ଅଧ୍ୟକ୍ଷ ରାଜ ଠାକରେଙ୍କୁ ଭେଟିଥିଲେ। ଏହା ପରେ ମହାରାଷ୍ଟ୍ର ରାଜନୀତିରେ ଏକ ନୂତନ ରଣନୀତି ସମ୍ଭାବନା ପ୍ରକାଶ ପାଇଛି।

ନୂତନ ମହାୟୁତି ସରକାର ଗଠନ ହେବା ପରଠାରୁ, ବିଜେପି ଏବଂ ସିନ୍ଦେଙ୍କ ମଧ୍ୟରେ ଦୂରତା ବଢ଼ିବାରେ ଲାଗିଛି। ସିନ୍ଦେଙ୍କୁ ପୁଣି ଥରେ ମୁଖ୍ୟମନ୍ତ୍ରୀ କରା ନ ଯିବାରୁ ସେ ଅସନ୍ତୁଷ୍ଟ। ସେ ମୁଖ୍ୟମନ୍ତ୍ରୀ ଫଡନବୀସଙ୍କ ସଭାରେ ମଧ୍ୟ ଯୋଗ ଦେଉନାହାନ୍ତି।

ମହାୟୁତି ଭିତରେ ଉପମୁଖ୍ୟମନ୍ତ୍ରୀ ସିନ୍ଦେ ନିଜର ପୃଥକ 'ସରକାର' ଚଳାଉଥିବା ଅଭିଯୋଗ ମଧ୍ୟ ଆସୁଛି। ତାଙ୍କର ଏହି ମନୋଭାବ ବିଜେପିକୁ ପସନ୍ଦ ଆସୁନାହିଁ। ଏହି କାରଣରୁ ବିଜେପି ଏବେ ନିଜ ଶକ୍ତିରେ ପୌର ନିର୍ବାଚନ ଲଢ଼ିବାକୁ ଚାହୁଁଛି। ଯାହା ଦ୍ଵାରା ମହାୟୁତି ସରକାରଙ୍କ ପରି, ସେମାନଙ୍କୁ ନଗର ନିଗମରେ ନିଜର କ୍ଷମତା ପ୍ରତିଷ୍ଠା କରିବା ପାଇଁ ଶିନ୍ଦେଙ୍କ ଉପରେ ନିର୍ଭର କରିବାକୁ ପଡିବ ନାହିଁ।

ଅକ୍ଟୋବର-ନଭେମ୍ବରରେ ନିର୍ବାଚନର ହେବା ନେଇ ବିଜେପି ରାଜ୍ୟ ସଭାପତି ଚନ୍ଦ୍ରଶେଖର ବାୱନକୁଲେ ସୂଚିତ କରିଥିଲେ ଯେ, ବିଭିନ୍ନ ଜିଲ୍ଲାରେ ପଡ଼ି ରହିଥିବା ପୌର ନିର୍ବାଚନ ଚଳିତ ବର୍ଷ ମାର୍ଚ୍ଚ-ଏପ୍ରିଲରେ ହୋଇପାରେ। କିନ୍ତୁ ଏଥିପାଇଁ ସମସ୍ତଙ୍କ ନଜର ସୁପ୍ରିମକୋର୍ଟରେ ଓବିସି ସଂରକ୍ଷଣ ପ୍ରସଙ୍ଗରେ ଚାଲିଥିବା ଶୁଣାଣି ଉପରେ ରହିଛି।

 ଅଧିକ ପଢ଼ନ୍ତୁ: ନିଜକୁ ହାଇଦ୍ରାବାଦୀ କହିଲେ ରଶ୍ମିକା: ଟ୍ରୋଲ୍ କରି ୟୁଜର ପ୍ରଶ୍ନ କଲେ କର୍ଣ୍ଣାଟକର ବୋଲି କହିବାକୁ ଲଜ୍ଜା ଲାଗୁଛି ବୋଧେ...

ଓବିସି ସଂରକ୍ଷଣ ମାମଲା ଏବେ ବି ସୁପ୍ରିମକୋର୍ଟରେ ବିଚାରାଧୀନ ଅଛି। ଓବିସି ସଂରକ୍ଷଣ ଏବଂ ୱାର୍ଡ ପୁନର୍ଗଠନ ସମ୍ପର୍କିତ ଆବେଦନର ପରବର୍ତ୍ତୀ ଶୁଣାଣି ଫେବ୍ରୁଆରି ୨୫ରେ ସୁପ୍ରିମକୋର୍ଟରେ ହେବ। ଏପରି ପରିସ୍ଥିତିରେ, ଏବେ କୁହାଯାଉଛି ଯେ, ଚଳିତ ବର୍ଷ ଅକ୍ଟୋବର-ନଭେମ୍ବରରେ ପୌର ନିର୍ବାଚନ ହୋଇପାରେ।

ବିଶେଷଜ୍ଞମାନେ କହିଛନ୍ତି ଯେ,  ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ଦେଶର ସବୁଠାରୁ ଧନୀ ସହର ଭାବରେ ବିବେଚିତ ମୁମ୍ବାଇ ବିଏମସିର ନିର୍ବାଚନ। ଏହାକୁ ଦଖଲ କରିବା ପାଇଁ ମହାୟୁତିର ଅଂଶବିଶେଷ ବିଜେପି ଏବଂ ସିନ୍ଦେ ସେନା ମଧ୍ୟରେ ଲଢ଼େଇ ଚାଲିଛି।

 ଅଧିକ ପଢ଼ନ୍ତୁ: ନାଟୋ ଉପରୁ ଭରସା ହରାଇଲେ ଜେଲେନସ୍କି!: କହିଲେ ୟୁରୋପ ନିଜର ସେନାକୁ ଶକ୍ତିଶାଳୀ କରୁ