ଯିଏ ବିଜୟ ଦିବସକୁ ଯିବେ ତାଙ୍କର ମୃତ୍ୟୁ ନିଶ୍ଚିତ! ଜେଲେନସ୍କିଙ୍କ ଧମକ

କିଭ୍: ଚଳିତ ଥର ରୁଷିଆର ବିଜୟ ଦିବସ ସମାରୋହକୁ ନେଇ ସାରା ବିଶ୍ୱର ନଜର ମସ୍କୋ ଉପରେ ନିବଦ୍ଧ ରହିଛି। ଏହା ସହିତ, ୟୁକ୍ରେନ ସହିତ ବଢୁଥିବା ଉତ୍ତେଜନା ମଧ୍ୟ ସ୍ପଷ୍ଟ ଭାବରେ ଦେଖାଯାଉଛି। ରୁଷିଆରେ ମେ’୯ ତାରିଖରେ ଅନୁଷ୍ଠିତ ହେବାକୁ ଥିବା ବିଜୟ ଦିବସ ପରେଡ ସମ୍ପର୍କରେ ୟୁକ୍ରେନ ଏକ ବଡ଼ ମନ୍ତବ୍ୟ ଦେଇଛି।

ଜେଲେନସ୍କିଙ୍କ ସରକାର ଚେତାବନୀ ଦେଇଛନ୍ତି ଯେ, ଏହି କାର୍ଯ୍ୟକ୍ରମରେ ଯୋଗ ଦେଉଥିବା ବିଶ୍ୱ ନେତାମାନଙ୍କ ଜୀବନ ବିପଦରେ ପଡ଼ିପାରେ ଏବଂ ୟୁକ୍ରେନ ସେମାନଙ୍କ ସୁରକ୍ଷାର ଗ୍ୟାରେଣ୍ଟି ଦେଇପାରିବ ନାହିଁ। ଏହି ମନ୍ତବ୍ୟ ପରେ ଅନ୍ତର୍ଜାତୀୟ ସ୍ତରରେ ଆତଙ୍କ ସୃଷ୍ଟି ହୋଇଛି।

ୟୁକ୍ରେନୀୟ ଅଧିକାରୀମାନେ କହିଛନ୍ତି ଯେ, ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ଚଳିତ ବର୍ଷର ବିଜୟ ଦିବସ ପରେଡକୁ ବିଶ୍ୱବ୍ୟାପୀ ଶକ୍ତି ପ୍ରଦର୍ଶନରେ ପରିଣତ କରିବାକୁ ଯୋଜନା କରୁଛନ୍ତି। ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ସମେତ ଅନେକ ଦେଶର ପ୍ରତିନିଧିମଣ୍ଡଳୀ ଏହି ସମାରୋହରେ ଯୋଗଦେବାର କାର୍ଯ୍ୟକ୍ରମ ରହିଛି।

ଭାରତରୁ ଏକ ଉଚ୍ଚସ୍ତରୀୟ ପ୍ରତିନିଧିମଣ୍ଡଳର ଅଂଶଗ୍ରହଣ କରିବେ ବୋଲି ମଧ୍ୟ ନିଶ୍ଚିତ କରାଯାଇଛି। ପୁଟିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଏକ ବ୍ୟକ୍ତିଗତ ନିମନ୍ତ୍ରଣ ମଧ୍ୟ ପଠାଇଥିଲେ, ଯଦିଓ ମୋଦୀଙ୍କ ଉପସ୍ଥିତି ଏପର୍ଯ୍ୟନ୍ତ ଆନୁଷ୍ଠାନିକ ଭାବରେ ନିଶ୍ଚିତ ହୋଇନାହିଁ।

ଜେଲେନ୍ସକି ପ୍ରଶାସନ କହିଛି ଯେ, ୟୁକ୍ରେନ ବିରୁଦ୍ଧରେ ଚାଲିଥିବା ଯୁଦ୍ଧ ପରିସ୍ଥିତି ଏବଂ ରୁଷିଆର ଚାଲିଥିବା ସାମରିକ କାର୍ଯ୍ୟାନୁଷ୍ଠାନ ମଧ୍ୟରେ ଏପରି ଏକ କାର୍ଯ୍ୟକ୍ରମରେ ଯୋଗଦେବା ଜାଣିଶୁଣି ଏକ ଯୁଦ୍ଧ କ୍ଷେତ୍ରରେ ପ୍ରବେଶ କରିବା ସହିତ ସମାନ।

ୟୁକ୍ରେନ୍ ଏହା ମଧ୍ୟ ସ୍ପଷ୍ଟ କରିଛି ଯେ, ଯଦି ଏହି ନେତାମାନଙ୍କ ଉପରେ କୌଣସି ପ୍ରକାରର ଆକ୍ରମଣ ହୁଏ, ତେବେ ସେମାନଙ୍କ ସରକାରଙ୍କୁ ଦାୟୀ କରାଯାଇପାରିବ ନାହିଁ। ୟୁକ୍ରେନୀୟ ଗୁଇନ୍ଦା ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏହି ଚେତାବନୀ କେବଳ ଏକ ରାଜନୈତିକ ବାର୍ତ୍ତା ନୁହେଁ, ବରଂ ଏହା ସମ୍ଭାବ୍ୟ ସାମରିକ କାର୍ଯ୍ୟାନୁଷ୍ଠାନ ଆଡ଼କୁ ଇଙ୍ଗିତ କରୁଛି।

ଏହି ବିପଦ ଏପରି ଏକ ସମୟରେ ଆସିଛି ଯେତେବେଳେ ସମ୍ପ୍ରତି ରୁଷିଆ ଅଧିକୃତ ଅଞ୍ଚଳ ଉପରେ ୟୁକ୍ରେନୀୟ ଡ୍ରୋନ୍ ଆକ୍ରମଣ ବୃଦ୍ଧି ପାଇଛି। ବିଶେଷକରି ସାମରିକ ଘାଟି ଏବଂ ସରକାରୀ କୋଠାଗୁଡ଼ିକୁ ଟାର୍ଗେଟ କରାଯାଉଛି। ୟୁକ୍ରେନର ଚେତାବନୀକୁ ରୁଷିଆର ଅନ୍ତର୍ଜାତୀୟ ଭାବମୂର୍ତ୍ତିକୁ କ୍ଷତି ପହଞ୍ଚାଇବା ଏବଂ ପୁଟିନଙ୍କ ଶକ୍ତିର ପ୍ରତୀକ ଭାବରେ ଉପସ୍ଥାପନ କରିବାକୁ ଚାହୁଥିବା ମଞ୍ଚରୁ ବିଶ୍ୱ ନେତାମାନଙ୍କୁ ଦୂରେଇ ରଖିବା ପାଇଁ ଏକ ରଣନୈତିକ ମନସ୍ତାତ୍ତ୍ୱିକ ଯୁଦ୍ଧର ଅଂଶ ଭାବରେ ମଧ୍ୟ ଦେଖାଯାଉଛି।

ନେତାମାନଙ୍କ ଯିବା ଏବେ ସସପେନ୍ସ ଭିତରେ ରହିଛି। ଏବେ ପ୍ରଶ୍ନ ହେଉଛି ଭାରତ ସମେତ ଅନ୍ୟ ଦେଶମାନେ ଏହି ଚେତାବନୀକୁ ଗମ୍ଭୀରତାର ସହ ନେବେ କି? ଚୀନ୍ ଭଳି ଦେଶମାନେ ସେମାନଙ୍କର ନେତାଙ୍କ ସୁରକ୍ଷା ସୁନିଶ୍ଚିତ କରିବାରେ କୌଣସି ପଦକ୍ଷେପ ଛାଡ଼ନ୍ତି ନାହିଁ।

ଅଧିକ ପଢ଼ନ୍ତୁ: ଭାରତର କୌଣସି ବନ୍ଦରକୁ ଆସିବନି ପାକିସ୍ତାନ ପତାକା ଥିବା ଜାହାଜ: ଭାରତୀୟ ନୌସେନାର କଡ଼ା ନିର୍ଦ୍ଦେଶ

ଭାରତ ପାଇଁ ଏହା କୂଟନୈତିକ ସନ୍ତୁଳନର ବିଷୟ ହୋଇପାରେ। ଗୋଟିଏ ପଟେ, ରୁଷିଆ ସହିତ ପୁରୁଣା ସମ୍ପର୍କ ଅଛି, ଅନ୍ୟପଟେ ୟୁକ୍ରେନ ସହିତ ସହଯୋଗ ବୃଦ୍ଧି ପାଉଛି ଏବଂ ପଶ୍ଚିମ ଦେଶଗୁଡ଼ିକର ନଜର ମଧ୍ୟ ଭାରତର ଭୂମିକା ଉପରେ ରହିଛି। ଏପରି ପରିସ୍ଥିତିରେ, ବିଜୟ ଦିବସ ପରେଡରେ ଅଂଶଗ୍ରହଣ ସମ୍ପର୍କରେ ଆଗାମୀ ଦିନରେ ଏକ ବଡ଼ ନିଷ୍ପତ୍ତି ନିଆଯାଇପାରେ।

ଅଧିକ ପଢ଼ନ୍ତୁ:ଶିମଲାର ସଞ୍ଜୌଲି ମସଜିଦ ଅବୈଧ, ଭାଙ୍ଗିବାକୁ ନିର୍ଦ୍ଦେଶ ଦେଲେ କୋର୍ଟ

volodymyr-zelensky | vladimir-putin | russia-victory-day | Ukraine