ଭାରତର ଭୁଲ୍ ମାନଚିତ୍ର ଦେଖାଇ ସମସ୍ୟାରେ ପଡ଼ିଲା ଇସ୍ରାଏଲ, କ୍ଷମା ମାଗିଲା ଆଇଡିଏଫ

ଜେରୁଜେଲମ: ଜମ୍ମୁ ଏବଂ କଶ୍ମୀରକୁ ପାକିସ୍ତାନର ଅଂଶ ଭାବରେ ଦର୍ଶାଇ ଏକ ଭୁଲ୍ ମାନଚିତ୍ର ପୋଷ୍ଟ କରିଥିବାରୁ ଇସ୍ରାଏଲୀ ସେନା କ୍ଷମା ପ୍ରାର୍ଥନା କରିଛି। ଏହା ସହିତ, ଇସ୍ରାଏଲ ପ୍ରତିରକ୍ଷା ବାହିନୀ କହିଛି, ମାନଚିତ୍ରଟି ସୀମାକୁ ସଠିକ୍ ଭାବରେ ଦର୍ଶାଇବାରେ ବିଫଳ ହୋଇଛି।

ଇସ୍ରାଏଲୀ ସେନା ଦ୍ୱାରା ମାନଚିତ୍ର ପୋଷ୍ଟ କରାଯିବା ପରେ ଭାରତୀୟ ସୋସିଆଲ ମିଡିଆ ୟୁଜରମାନେ ଆପତ୍ତି କରିଥିଲେ। ଇସ୍ରାଏଲୀ ପ୍ରତିରକ୍ଷା ବାହିନୀ (ଆଇଡିଏଫ) ଶୁକ୍ରବାର ନିଜର 'ଏକ୍ସ' ହ୍ୟାଣ୍ଡେଲରେ ଏହି ମାନଚିତ୍ର ପୋଷ୍ଟ କରିଥିଲା, ଯେଉଁଥିରେ ଇରାନୀ କ୍ଷେପଣାସ୍ତ୍ରର ପରିସର ଦର୍ଶାଯାଇଥିଲା।

ଏହି ପୋଷ୍ଟକୁ ନେଇ ଭାରତରେ ସୋସିଆଲ ମିଡିଆ ୟୁଜରମାନେ ସମାଲୋଚନା କରିଥିଲେ। ଏହି ସମ୍ପର୍କରେ ଜଣେ ବ୍ୟବହାରକାରୀ 'ଏକ୍ସ' ରେ ମନ୍ତବ୍ୟ ଦେଇ ଲେଖିଥିଲେ, ଏବେ ଆପଣ ବୁଝିସାରିଥିବେ ଭାରତ କାହିଁକି ନିରପେକ୍ଷ ରହିଛି। କୂଟନୀତିରେ, ପ୍ରକୃତରେ କେହି ଆପଣଙ୍କର ବନ୍ଧୁ ନୁହଁନ୍ତି। ଜବାବରେ, ଆଇଡିଏଫ ସ୍ୱୀକାର କରିଛି, ମାନଚିତ୍ର ସୀମାକୁ ସଠିକ୍ ଭାବରେ ଚିତ୍ରଣ କରିବାରେ ବିଫଳ ହୋଇଛି।

ଆଇଡିଏଫ 'ଏକ୍ସ' ରେ କହିଛି ଯେ, ଏହି ପୋଷ୍ଟଟି ଏହି ଅଞ୍ଚଳର ଏକ ଚିତ୍ରଣ। ଏହି ମାନଚିତ୍ର ସୀମାକୁ ସଠିକ୍ ଭାବରେ ଚିତ୍ରଣ କରିବାରେ ବିଫଳ ହୋଇଛି। ଏହି ଚିତ୍ର ଦ୍ୱାରା ହୋଇଥିବା ଆମର ଯେକୌଣସି ଅପରାଧ ପାଇଁ ଆମେ କ୍ଷମା ପ୍ରାର୍ଥନା କରୁଛୁ।

ଅଧିକ ପଢ଼ନ୍ତୁ: ଆମେରିକାର ୫ ବାୟୁସେନା ଘାଟି ଉପରେ ଇରାନ ନଜର: କିଛି ମିନିଟ୍ ମଧ୍ୟରେ ଧ୍ୱଂସ କରିପାରେ

ନିଜର ପୋଷ୍ଟରେ, ଆଇଡିଏଫ ଇରାନ ବିରୁଦ୍ଧରେ 'ଅପରେସନ୍ ରାଇଜିଂ ଲାୟନ୍' ଆରମ୍ଭ କରିବା ଯଥାର୍ଥ ବୋଲି ଦର୍ଶାଇଛି ଏବଂ ଭୁଲ୍ ମାନଚିତ୍ର ମଧ୍ୟ ଉପସ୍ଥାପନ କରିଛି। ଆଇଡିଏଫ ଲେଖିଛି ଯେ, ଇରାନ ବିଶ୍ବ ପାଇଁ ଏକ ବଡ଼ ବିପଦ। ଇସ୍ରାଏଲ ଅନ୍ତିମ ଲକ୍ଷ୍ୟ ନୁହେଁ, ଏହା କେବଳ ଆରମ୍ଭ। କାର୍ଯ୍ୟାନୁଷ୍ଠାନ ଗ୍ରହଣ କରିବା ବ୍ୟତୀତ ଆମ ପାଖରେ ଅନ୍ୟ କୌଣସି ବିକଳ୍ପ ନଥିଲା।

ଏହା ସହିତ, ଇସ୍ରାଏଲୀ ବାୟୁସେନା ମଧ୍ୟ ଏକ ଛୋଟ ଭିଡିଓ ପୋଷ୍ଟ କରିଛି ଯେଉଁଥିରେ ଇରାନୀ କ୍ଷେପଣାସ୍ତ୍ରର ପରିସରକୁ ଦର୍ଶାଯାଇଥିବା ସମାନ ମାନଚିତ୍ର ଦେଖାଯାଉଛି। ବିବାଦ ପରେ, ଭାରତରେ ଇସ୍ରାଏଲର ରାଷ୍ଟ୍ରଦୂତ ରୁଭେନ ଆଜାର 'ଏକ୍ସ' ରେ ଥିବା ଏହି ମାନଚିତ୍ରକୁ ଅଜାଣତରେ ସୃଷ୍ଟି ହୋଇଥିବା ଖରାପ ଇନଫୋଗ୍ରାଫିକ୍ସ ବୋଲି ବର୍ଣ୍ଣନା କରିଛନ୍ତି। ରାଷ୍ଟ୍ରଦୂତ କହିଛନ୍ତି, ସେ ମାନଚିତ୍ରକୁ ହଟାଇବାକୁ ଅବା ସଂଶୋଧନ କରିବାକୁ କହିଛନ୍ତି। 

ସୂଚନାଯୋଗ୍ୟ, ଭାରତ ସର୍ବଦା କହିଆସିଛି ଯେ, ଜମ୍ମୁ ଏବଂ କଶ୍ମୀର ଦେଶର ଏକ ଅବିଚ୍ଛେଦ୍ୟ ଅଙ୍ଗ।

ଅଧିକ ପଢ଼ନ୍ତୁ: ଇରାନ ଉପରେ ଇସ୍ରାଏଲୀ ଆକ୍ରମଣକୁ ନିନ୍ଦା କଲା ଏସସିଓ, ଦୂରେଇ ରହିଲା ଭାରତ

israel | iran | Israel Iran War