ଏଭଳି ଚିନ୍ତା କରିବା ଅପରାଧ: ରାହୁଲଙ୍କ ସଂରକ୍ଷଣ ବିବୃତି ନେଇ ଚିରାଗଙ୍କ ଚେତାବନୀ

ପାଟନା:  ଆମେରିକାର ଜର୍ଜଟାଉନ ବିଶ୍ୱବିଦ୍ୟାଳୟରେ ଲୋକସଭାର ବିରୋଧୀଦଳର ନେତା ରାହୁଲ ଗାନ୍ଧୀ ଦେଇଥିବା ବିବୃତି ଉପରେ  ଏବେ ରାଜନୀତି ତୀବ୍ର ହେବାରେ ଲାଗିଛି। କେନ୍ଦ୍ର ମନ୍ତ୍ରୀ ତଥା  ଏଲଜେପିଆର  ସଭାପତି ଚିରାଗ ପାସୱାନ କହିଛନ୍ତି ଯେ ସଂରକ୍ଷଣକୁ  ଶେଷ କରିବା ତ ଦୂରକଥା  ଏହା ବିଷୟରେ ଚିନ୍ତା କରିବା ମଧ୍ୟ ଏକ ଅପରାଧ।

ଚିରାଗ ପାସୱାନ୍ କହିଛନ୍ତି ଯେ ରାହୁଲ ଗାନ୍ଧୀଙ୍କ ବିବୃତି କଂଗ୍ରେସ ଦଳର ମାନସିକତାକୁ ପ୍ରକାଶ କରିଛି। କଂଗ୍ରେସ ଚାହୁଁଛି ଯେ ବାବା ସାହେବ ଡକ୍ଟର ଆମ୍ବେଦକର ଦେଇଥିବା ସଂରକ୍ଷଣକୁ ରଦ୍ଦ କରାଯାଉ ଏବଂ ଏହା ଦଳର ଅନ୍ୟତମ ପ୍ରାଥମିକତା ଅଟେ। ସାମ୍ବିଧାନିକ ବ୍ୟବସ୍ଥାକୁ ସୁରୁଖୁରୁରେ ବଜାୟ ରଖିବା ପାଇଁ ସଂରକ୍ଷଣ ଆବଶ୍ୟକ ବୋଲି ସେ କହିଛନ୍ତି। ତେଣୁ, ସଂରକ୍ଷଣକୁ ରଦ୍ଦ କିମ୍ବା ଏଥିରେ ଅଦଳବଦଳ କରିବାର କଳ୍ପନା ମଧ୍ୟ କରାଯାଇପାରିବ ନାହିଁ ।

ଏଥିସହ କେନ୍ଦ୍ର ମନ୍ତ୍ରୀ କହିଛନ୍ତି ଯେ କଂଗ୍ରେସ ମାନସିକତା ଥିବା ଲୋକମାନେ ଜନସାଧାରଣଙ୍କୁ ବିଭ୍ରାନ୍ତ କରିବା ପାଇଁ ଏଭଳି ବିବୃତି ଦେଉଛନ୍ତି।  ସଂରକ୍ଷଣ ପ୍ରସଙ୍ଗ ହେଉଛି କଂଗ୍ରେସର ଏକ ନିର୍ବାଚନୀ ସ୍ଲୋଗାନ, ଯାହାକୁ ନେଇ ଆମେ ସାବଧାନ ହେବା ଉଚିତ୍।

ସେ କହିଛନ୍ତି ଦୀର୍ଘ ଦିନ ଧରି କେନ୍ଦ୍ରରେ କ୍ଷମତାରେ ଥିବା ସତ୍ତ୍ବେ କଂଗ୍ରେସ ଜାତି ଜନଗଣନା କରିପାରି ନାହିଁ କିମ୍ବା ଓବିସି ସଂରକ୍ଷଣ କାର୍ଯ୍ୟକାରୀ କରିପାରି ନାହିଁ। ଏହା ସ୍ପଷ୍ଟ କରୁଛି ଯେ କଂଗ୍ରେସର ଚିନ୍ତାଧାରା ଆରମ୍ଭରୁ ସଂରକ୍ଷଣ ବିରୋଧୀ ଥିଲା।

ଅଧିକ  ପଢ଼ନ୍ତୁ:ହରିୟାଣା ବିଧାନସଭା ନିର୍ବାଚନ: ମଇଦାନରେ ୩ ରାଜନେତାଙ୍କ ୧୦ ପରିବାର ସଦସ୍ୟ

ଚିରାଗ ପାସୱାନ ଏହା ମଧ୍ୟ କହିଛନ୍ତି  ସଂରକ୍ଷଣକୁ ବନ୍ଦ କରିବା ପାଇଁ ଷଡଯନ୍ତ୍ର ପାଇଁ କଂଗ୍ରେସ ଅନ୍ୟମାନଙ୍କୁ ଦାୟୀ କରୁଛି, ବାସ୍ତବତା ଏହା ହେଉଛି  ଦଳର ନିଜର ମାନସିକତା।  ସେ କହିଛନ୍ତି ଯେ ଗୋଟିଏ ପଟେ ବିରୋଧୀଦଳର ନେତାମାନେ ସଂରକ୍ଷଣ ସମାପ୍ତ କରିବାକୁ ଚିନ୍ତା କରୁଥିବାବେଳେ ଅନ୍ୟ ପଟେ ଏନଡିଏର ନେତା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସଂରକ୍ଷଣର ସମସ୍ତ ବ୍ୟବସ୍ଥା ପୂର୍ବପରି ରଖିବାକୁ ପ୍ରତିଶ୍ରୁତିବଦ୍ଧ। କିନ୍ତୁ କଂଗ୍ରେସ ସଂରକ୍ଷଣ ବିରୋଧୀ ହେବାରେ ଲାଗିଛି ବୋଲି ସେ କହିଛନ୍ତି। 

ଅଧିକ  ପଢ଼ନ୍ତୁ:କ୍ରେଡରେ ୩ଲକ୍ଷ ଜିତିଥିଲେ ଯୁବକ, ମିଳିଲା ହଜାରେ ଟଙ୍କା !