ଖାମେନିଙ୍କ ନିକଟରେ ପହଞ୍ଚିଲା ମୋସାଦ ହାତ: ବିଶ୍ୱସ୍ତଙ୍କୁ ହତ୍ୟା

ଜେରୁଜେଲମ୍/ତେହେରାନ୍‌: ଇରାନ ଏବଂ ଇସ୍ରାଏଲ ମଧ୍ୟରେ ଚାଲିଥିବା ଉତ୍ତେଜନା ଏବେ ଅଧିକ ବିପଦପୂର୍ଣ୍ଣ ସ୍ଥିତିରେ ପହଞ୍ଚିଛି। ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନିଙ୍କ ସବୁଠାରୁ ବିଶ୍ୱସ୍ତ ପରାମର୍ଶଦାତା ଅଲି ଶାମଖାନିଙ୍କ ମୃତ୍ୟୁ ଖବର ସମଗ୍ର ଇରାନକୁ ଚକିତ କରିଛି।

ତାଙ୍କୁ ଖାମେନିଙ୍କ ଡାହାଣ ହାତ ଭାବେ ବିବେଚନା କରାଯାଉଥିଲା।  ଇରାନର ସରକାରୀ ଗଣମାଧ୍ୟମ ନିଶ୍ଚିତ କରିଛି ଯେ, ଇସ୍ରାଏଲର ପ୍ରଥମ ଏୟ‌ାର ଷ୍ଟ୍ରା‌ଇକ୍‌ରେ ଗୁରୁତର ଆଘାତ ଯୋଗୁ ଅଲି ଶାମଖାନିଙ୍କ ମୃତ୍ୟୁ ହୋଇଛି।

କୁହାଯାଉଛି ଯେ, ଇସ୍ରାଏଲ ଇରାନର ସାମରିକ ଏବଂ ଗୁପ୍ତଚର ଘାଟି ଉପରେ ପ୍ରାରମ୍ଭିକ ଏୟାର ଷ୍ଟ୍ରାଇକ୍ କରିବା ସମୟରେ ଅଲି ଶାମଖାନି ଗୁରୁତର ଆହତ ହୋଇଥିଲେ। ସେ ଦୁଇ ଦିନ ଧରି ହସ୍ପିଟାଲରେ ଚିକିତ୍ସିତ ହୋଇଥିଲେ। କିନ୍ତୁ ତାଙ୍କର ଜୀବନ ରକ୍ଷା କରାଯାଇପାରି ନଥିଲା। ଶାମଖାନିଙ୍କୁ ଖାମେନିଙ୍କ ରଣନୈତିକ ପରାମର୍ଶଦାତା ଏବଂ ଇରାନର ଜାତୀୟ ସୁରକ୍ଷା ନୀତିର ମୁଖ୍ୟ ସ୍ଥପତି ଭାବରେ ବିବେଚନା କରାଯାଉଥିଲା।

ଏହି ମୃତ୍ୟୁ କେବଳ ଜଣେ ବ୍ୟକ୍ତିଙ୍କର ନୁହେଁ, ବରଂ ଏହାକୁ ଇରାନର ରଣନୈତିକ ମେରୁଦଣ୍ଡ ଭାଙ୍ଗିବା ଭାବରେ ଦେଖାଯାଉଛି। ଅଲି ଶାମଖାନି ବହୁ ବର୍ଷ ଧରି ଇରାନ ନୌସେନାର ନେତୃତ୍ୱ ନେଇଥିଲେ, ଏବଂ ଇରାନର ସର୍ବୋଚ୍ଚ ଜାତୀୟ ସୁରକ୍ଷା ପରିଷଦର ମୁଖ୍ୟ ମଧ୍ୟ ଥିଲେ। ତାଙ୍କର ମୃତ୍ୟୁ କେବଳ ଏକ ରାଜନୈତିକ କ୍ଷତି ନୁହେଁ, ବରଂ ସାମରିକ ସନ୍ତୁଳନ ଉପରେ ମଧ୍ୟ ଗଭୀର ପ୍ରଭାବ ପକାଇବ ବୋଲି ବିଶେଷଜ୍ଞ ଅନୁମାନ କରିଛନ୍ତି।।

ଏହି ମୃତ୍ୟୁ ପରେ ଇରାନରେ ପ୍ରତିଶୋଧର ଭାବନା ଖେଳିଯାଇଛି। ତେହେରାନର ରାସ୍ତାରେ ବିରୋଧ ପ୍ରଦର୍ଶନ ଆରମ୍ଭ ହୋଇଛି ଏବଂ ପ୍ରତିଶୋଧ ନେବା ପାଇଁ ସରକାରଙ୍କ ଉପରେ ଚାପ ବୃଦ୍ଧି ପାଉଛି। ଇରାନ ସଂସଦର ଅନେକ ସଦସ୍ୟ ଏହି ଆକ୍ରମଣକୁ ଯୁଦ୍ଧର ଆରମ୍ଭ ବୋଲି କହିଛନ୍ତି। ସେହିପରି ବରିଷ୍ଠ ସେନା ଅଧିକାରୀମାନେ ଚେତାବନୀ ଦେଇଛନ୍ତି ଯେ, ଇରାନ ଏବେ ଚୁପ୍ ରହିବ ନାହିଁ।

ରେଡ କ୍ରିସେଣ୍ଟ ସୋସାଇଟିର ମୁଖପାତ୍ର ବାବାକ ମହମୁଦି ଖାଲଦିଙ୍କ ଅନୁଯାୟୀ, ଇରାନର ୩୧ଟି ପ୍ରଦେଶ ମଧ୍ୟରୁ ୧୮ଟି ପ୍ରଦେଶ ଇସ୍ରାଏଲୀ ଆକ୍ରମଣରେ ଗୁରୁତର ଭାବରେ ପ୍ରଭାବିତ ହୋଇଛି। ସେହି ସମୟରେ, ଇରାନୀ ଗଣମାଧ୍ୟମ ଏବଂ ଅଧିକାରୀଙ୍କ ପକ୍ଷରୁ ଖବର ଆସୁଛି ଯେ, ଇସ୍ରାଏଲୀ ଆକ୍ରମଣରେ ଆଉ ଜଣେ ପରମାଣୁ ବୈଜ୍ଞାନିକ ଅଲି ମନସୁର ବାକୁଇଙ୍କ ମୃତ୍ୟୁ ଘଟିଛି।

ମାଜାଣ୍ଡାରାନ ପ୍ରଦେଶର ଗଭର୍ଣ୍ଣର ଜେନେରାଲ ଏହି ସୂଚନା ଦେଇଛନ୍ତି। ପୂର୍ବରୁ ମଧ୍ୟ ଇସ୍ରାଏଲ ଉପରେ ଇରାନୀ ପରମାଣୁ କାର୍ଯ୍ୟକ୍ରମ ସହିତ ଜଡିତ ବୈଜ୍ଞାନିକମାନଙ୍କୁ ଟାର୍ଗେଟ କରିବାର ଅଭିଯୋଗ ଆସିଛି ଏବଂ ବର୍ତ୍ତମାନ ଏହି ଆକ୍ରମଣ ସେହି ଅଭିଯୋଗଗୁଡ଼ିକୁ ଆହୁରି ଦୃଢ଼ କରୁଛି।

ଅଧିକ ପଢ଼ନ୍ତୁ: ଆଝାରୁଦ୍ଦିନଙ୍କ ପୁଅ ରାଜନୀତିରେ: ୧୧ ଦିନ ଖେଳିଥିଲେ କ୍ରିକେଟ

ଇସ୍ରାଏଲୀ ଗଣମାଧ୍ୟମ ରିପୋର୍ଟ ଅନୁଯାୟୀ, ଇସ୍ରାଏଲର ସୁରକ୍ଷା କ୍ୟାବିନେଟ୍ ଏବେ ଇରାନରେ ନିଜର ଆକ୍ରମଣର ପରିସରକୁ ବିସ୍ତାର କରିବାକୁ ବିଚାର କରୁଛି। ଏହି ସଙ୍କେ

ତଗୁଡ଼ିକ ସ୍ପଷ୍ଟ ଭାବରେ ସୂଚାଇ ଦେଉଛି ଯେ, ଏହା କେବଳ ଏକ ପ୍ରାରମ୍ଭିକ ଆକ୍ରମଣ ନୁହେଁ, ବରଂ ଏକ ଲମ୍ବା ରଣନୀତିର ଅଂଶ। ଯଦି ଇରାନ ଏବଂ ଇସ୍ରାଏଲ ମଧ୍ୟରେ ଏହି ଉତ୍ତେଜନା ଏହିପରି ବୃଦ୍ଧି ପାଇବା ଲାଗି ରହେ, ତେବେ ସମଗ୍ର ପଶ୍ଚିମ ଏସିଆ ଏକ ବଡ଼ ସଂଘର୍ଷ ଆଡକୁ ଗତି କରିବାର ଆଶଙ୍କା ରହିଛି।

ଅଧିକ ପଢ଼ନ୍ତୁ:ଏୟାର ଇଣ୍ଡିଆ ବିମାନ ଦୁର୍ଘଟଣାରେ ଚାଲି ଯାଇଥାଆନ୍ତା ୨ହଜାର ‌ଲୋକଙ୍କ ଜୀବନ; ପାଇଲଟଙ୍କ ଉପସ୍ଥିତ ବୁଦ୍ଧି ଏଡାଇଦେଲା ବଡ଼ ଦୁର୍ଘଟଣା

israel | Israel Iran War