ନିର୍ବାଚନ ଲଢ଼ିବା ଉପରେ ଆଜୀବନ ପ୍ରତିବନ୍ଧକ ନାହିଁ: ଦୋଷୀ ରାଜନେତାଙ୍କ ସମ୍ପର୍କରେ ସୁପ୍ରିମକୋର୍ଟରେ କେନ୍ଦ୍ର ସରକାରଙ୍କ ସତ୍ୟପାଠ

ନୂଆଦିଲ୍ଲୀ: ସୁପ୍ରିମକୋର୍ଟ କେନ୍ଦ୍ର ସରକାରଙ୍କଠାରୁ ଉତ୍ତର ମାଗିଥିଲେ ଯେ, ଦୋଷୀ ସାବ୍ୟସ୍ତ ସାଂସଦ ଏବଂ ବିଧାୟକମାନଙ୍କୁ ନିର୍ବାଚନ ଲଢ଼ିବା ପାଇଁ ସ୍ଥାୟୀ ଭାବରେ ନିଷେଧ କରାଯିବା ଉଚିତ୍ କି ନାହିଁ। ଏବେ ଏହି ବିଷୟରେ କେନ୍ଦ୍ର ସରକାରଙ୍କ ପକ୍ଷରୁ ଏକ ସତ୍ୟପାଠ ଦାଖଲ କରାଯାଇଛି। ଜବାବରେ କୁହାଯାଇଛି, ଫୌଜଦାରୀ ମାମଲାରେ ଦୋଷୀ ସାବ୍ୟସ୍ତ ରାଜନେତାମାନଙ୍କୁ ଦଣ୍ଡାଦେଶ ପରେ ଜୀବନବ୍ୟାପୀ ନିର୍ବାଚନ ଲଢ଼ିବା ପାଇଁ ନିଷେଧ କରାଯାଇପାରିବ ନାହିଁ।

ଉତ୍ତରରେ କୁହାଯାଇଛି ଯେ, ସଂସଦ ପରିସ୍ଥିତିକୁ ଦୃଷ୍ଟିରେ ରଖି ବ୍ୟବସ୍ଥା କରିଛି। ଗୃହରୁ ଜଣଙ୍କୁ ଅଯୋଗ୍ୟ ଘୋଷଣା କରିବାର ସର୍ତ୍ତଗୁଡ଼ିକ ମଧ୍ୟ ସ୍ପଷ୍ଟ। ଆବେଦନକାରୀଙ୍କ ଦ୍ୱାରା ଦାଖଲ କରାଯାଇଥିବା ଆବେଦନରେ ବିଭିନ୍ନ ଦିଗକୁ ଅସ୍ପଷ୍ଟ ଭାବରେ ଉପସ୍ଥାପନ କରାଯାଇଛି। କେନ୍ଦ୍ର ସରକାର ସୁପ୍ରିମକୋର୍ଟଙ୍କୁ ୨୦୧୬ରେ ଦାଏର ହୋଇଥିବା ଆବେଦନକୁ ଖାରଜ କରିବାକୁ ଅନୁରୋଧ କରିଛନ୍ତି।

ସୁପ୍ରିମକୋର୍ଟ ଏହି ମାମଲାରେ ସରକାର ଏବଂ ନିର୍ବାଚନ କମିସନଙ୍କଠାରୁ ଜବାବ ମାଗିଥିଲେ ଏବଂ କହିଥିଲେ ଯେ, ଯଦି ଜଣେ ସରକାରୀ କର୍ମଚାରୀ ଦୋଷୀ ସାବ୍ୟସ୍ତ ହୁଅନ୍ତି, ସେ ଜୀବନବ୍ୟାପୀ ଚାକିରିରୁ ବାହାର ହୋଇଯାଆନ୍ତି, ତେବେ ଦୋଷୀ ବ୍ୟକ୍ତି କିପରି ସଂସଦକୁ ଫେରିପାରିବେ? ଆଇନ ଭଙ୍ଗକାରୀମାନେ ଆଇନ ତିଆରି କରିବା ପାଇଁ କିପରି କାମ କରିପାରିବେ?

ଆଇନଜୀବୀ ଅଶ୍ୱିନୀ ଉପାଧ୍ୟାୟ ୨୦୧୬ରେ ଏକ ପିଆଇଏଲ୍ ଦାଏର କରିଥିଲେ। ଏଥିରେ, ଜନପ୍ରତିନିଧି ଆଇନ ୧୯୫୧ର ଧାରା ୮ ଏବଂ ୯ ର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରାଯାଇଥିଲା। ଆବେଦନକାରୀଙ୍କ ପକ୍ଷରୁ କୁହାଯାଇଥିଲା ଯେ, ରାଜନୈତିକ ଦଳଗୁଡ଼ିକ ସ୍ପଷ୍ଟ କରିବା ଉଚିତ୍ ସେମାନେ କାହିଁକି ସ୍ୱଚ୍ଛ ଭାବମୂର୍ତ୍ତି ଥିବା ଲୋକଙ୍କୁ ପାଇପାରୁନାହାନ୍ତି।

ଅଧିକ ପଢ଼ନ୍ତୁ: ଭାରତର ବନ୍ଧୁ ବିରୁଦ୍ଧରେ ହାଇପରସୋନିକ୍ କ୍ଷେପଣାସ୍ତ୍ର ବ୍ୟବହାର କରିବାକୁ ଚୀନ୍‌ର ଯୋଜନା

ପ୍ରଚଳିତ ଆଇନ ଅନୁଯାୟୀ, ଯଦି କୌଣସି ବ୍ୟକ୍ତିଙ୍କୁ ଫୌଜଦାରୀ ମାମଲାରେ ୨ ବର୍ଷ କିମ୍ବା ତା’ଠାରୁ ଅଧିକ ଜେଲ୍ ଦଣ୍ଡ ଦିଆଯାଏ, ତେବେ ସଜା ପୂରଣ ହେବା ପରେ ତାଙ୍କୁ ୬ ବର୍ଷ ପର୍ଯ୍ୟନ୍ତ ନିର୍ବାଚନ ଲଢ଼ିବା ପାଇଁ ବାରଣ କରାଯାଇଥାଏ। ଆବେଦନକାରୀ ଅଶ୍ୱିନୀ ଉପାଧ୍ୟାୟ ଆବେଦନରେ ଦୋଷୀ ରାଜନେତାଙ୍କ ଉପରେ ଆଜୀବନ ପ୍ରତିବନ୍ଧକ ଲଗାଇବା ଏବଂ ବିଭିନ୍ନ ଅଦାଲତରେ ସେମାନଙ୍କ ବିରୁଦ୍ଧରେ ବିଚାରାଧୀନ ମାମଲାଗୁଡ଼ିକର ଶୀଘ୍ର ସମାଧାନ କରିବାକୁ ଦାବି କରିଥିଲେ।

ଅଧିକ ପଢ଼ନ୍ତୁ: କେତେ ଦିନର ପୁରୁଣା ପାଣି ପିଇବା ସ୍ୱାସ୍ଥ୍ୟ ପାଇଁ ସୁରକ୍ଷିତ ଜାଣିରଖନ୍ତୁ...