ପାକିସ୍ତାନର ଅସ୍ତିତ୍ୱ ବିପଦରେ!: ପାକିସ୍ତାନୀ ସେନା ମୁଖ୍ୟ ଶାହବାଜ ସରକାରଙ୍କ ଉପରେ ବର୍ଷିଲେ

ଇସଲାମାବାଦ: ବେଲୁଚିସ୍ତାନରେ ଟ୍ରେନ୍ ଅପହରଣ ସମୟରେ ବାଲୁଚ୍ ଲିବରେସନ୍ ଆର୍ମି(ବିଏଲଏ ) ଯୋଗୁ ଲଜ୍ଜା ଜନକ ସ୍ଥିତି ପରେ ପାକିସ୍ତାନ ସେନା ମୁଖ୍ୟ ଜେନେରାଲ ଅସୀମ ମୁନିର ଅସନ୍ତୁଷ୍ଟ ହୋଇଛନ୍ତି।  ଜେନେରାଲ ମୁନିର ପାକିସ୍ତାନକୁ ଏକ 'କଠୋର ଦେଶ' କରିବା ଉପରେ ଗୁରୁତ୍ୱାରୋପ କରିଛନ୍ତି। ସେ କହିଛନ୍ତି ଯେ, ଦେଶର ଅସ୍ତିତ୍ୱକୁ ରକ୍ଷା କରିବା ପାଇଁ ଆତଙ୍କବାଦ ବିରୋଧରେ ଯୁଦ୍ଧ ହେବା ଜରୁରୀ। ଜାତୀୟ ସୁରକ୍ଷା ସଂସଦୀୟ କମିଟିର ଏକ ଉଚ୍ଚସ୍ତରୀୟ ବୈଠକ ସମୟରେ ପାକିସ୍ତାନୀ ସେନା ମୁଖ୍ୟ ପାକିସ୍ତାନର ଶାହବାଜ ସରକାରଙ୍କ ଉପରେ ବର୍ଷିଛନ୍ତି।  ସେ ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ଶାସନ ବ୍ୟବସ୍ଥାରେ ଉନ୍ନତି ଆଣିବାକୁ ଅନୁରୋଧ କରିଥିଲେ। ସେ କହିଥିଲେ ଯେ, ଏକ କଠୋର ଦେଶ ନ ହେବା ଯୋଗୁ ଲୋକମାନେ ଜୀବନ ହରାଉଛନ୍ତି। ମୁନିର ପ୍ରଶ୍ନ କରିଥିଲେ ଯେ, ଶାସନର ଏହି ଖାଲି ସ୍ଥାନ କେତେଦିନ ପର୍ଯ୍ୟନ୍ତ ପାକିସ୍ତାନ ସେନା ଏବଂ ଏହାର ସୈନିକଙ୍କ ରକ୍ତରେ ପୂରଣ ହେବ।

ବାଲୁଚ୍‌ମାନଙ୍କ ଦ୍ୱାରା ହୋଇଥିବା ଭୟଙ୍କର ଟ୍ରେନ ଆକ୍ରମଣ ପରେ ପାକିସ୍ତାନୀ ସେନା ମୁଖ୍ୟ ସଂସଦୀୟ କମିଟି ସମ୍ମୁଖରେ ଶାହବାଜ ସରକାର ଏବଂ ପ୍ରାଦେଶିକ ସରକାରଙ୍କୁ ଭର୍ତ୍ସନା କରିଥିଲେ। ବାଲୁଚ୍ ଲୋକମାନେ ଦାବି କରିଛନ୍ତି ଯେ, ଏହି ଆକ୍ରମଣରେ ୧୦୦ ରୁ ଅଧିକ ପାକିସ୍ତାନୀ ସୈନିକ ନିହତ ହୋଇଛନ୍ତି। ଏହି ଆକ୍ରମଣ ବାଲୁଚ୍ ଲିବରେସନ୍ ଆର୍ମିର ମାଜିଦ୍ ବ୍ରିଗେଡ୍ ଦ୍ୱାରା କରାଯାଇଥିଲା। ଏହି ବୈଠକ ନ୍ୟାସନାଲ ଆସେମ୍ବଲି ବାଚସ୍ପତି ଆୟାଜ ସାଦିକ ଡକାଇଥିଲେ। ପ୍ରଧାନମନ୍ତ୍ରୀ ଶାହବାଜ ସରିଫଙ୍କଠାରୁ ଆରମ୍ଭ କରି ଅଧିକାଂଶ ଦଳର ଶୀର୍ଷ ନେତା ଏଥିରେ ଉପସ୍ଥିତ ଥିଲେ। ଇମ୍ରାନ ଖାନଙ୍କ ଦଳ ପିଟିଆଇ ଏହାକୁ ବର୍ଜନ କରିଥିଲା। ଜେନେରାଲ ମୁନିର କହିଥିଲେ ଯେ, ଆତଙ୍କବାଦ ବିରୋଧରେ ଲଢ଼େଇ ଆମର ଏବଂ ଆମର ଭବିଷ୍ୟତ ପିଢ଼ିର ଅସ୍ତିତ୍ୱକୁ ରକ୍ଷା କରିବା ପାଇଁ।

ହାଇଲାଇଟ୍ସ :

ବେଲୁଚିସ୍ତାନରେ ଟ୍ରେନ୍ ଅପହରଣ ପରେ ପାକିସ୍ତାନର ସେନା ମୁଖ୍ୟ ଅସନ୍ତୁଷ୍ଟ ହୋଇଛନ୍ତି।
ଜେନେରାଲ ମୁନିର ପାକିସ୍ତାନକୁ ଏକ 'କଠୋର ଦେଶ' କରିବା ଉପରେ ଗୁରୁତ୍ୱାରୋପ କରିଥିଲେ।
ସେ କହିଥିଲେ ଯେ ଆତଙ୍କବାଦ ବିରୋଧରେ ଯୁଦ୍ଧ ଦେଶର ଅସ୍ତିତ୍ୱକୁ ରକ୍ଷା କରିବା ପାଇଁ ଉଦ୍ଦିଷ୍ଟ।

ଅସୀମ ମୁନିର ଗୁରୁତ୍ୱାରୋପ କରି କହିଛନ୍ତି, ଯେଉଁମାନେ ଭାବୁଛନ୍ତି ଯେ, ସେମାନେ ଆତଙ୍କବାଦ ମାଧ୍ୟମରେ ପାକିସ୍ତାନକୁ ଦୁର୍ବଳ କରିପାରିବେ, ସେମାନେ ଜାଣିବା ଉଚିତ୍ ଆମେ ଏକତାବଦ୍ଧ ଏବଂ କେବଳ ସେମାନଙ୍କୁ ନୁହେଁ ବରଂ ଯେଉଁମାନେ ସେମାନଙ୍କୁ ସାହାଯ୍ୟ କରୁଛନ୍ତି ସେମାନଙ୍କୁ ମଧ୍ୟ ପରାସ୍ତ କରିବୁ। ପୂର୍ବରୁ, ପାକିସ୍ତାନ ସରକାର ଏହି ଆକ୍ରମଣରେ ଭାରତ ଏବଂ ଆଫଗାନିସ୍ତାନ ବାଲୁଚ୍ ଲିବରେସନ ଆର୍ମିକୁ ସାହାଯ୍ୟ କରୁଥିବା ଅଭିଯୋଗ କରିଥିଲେ। 

ଦେଶର ସାମ୍ପ୍ରତିକ ସୁରକ୍ଷା ପରିସ୍ଥିତି ଉପରେ ଆଲୋଚନା କରିବା ପାଇଁ ମଙ୍ଗଳବାର ଡକାଯାଇଥିବା ଗୁରୁତ୍ୱପୂର୍ଣ୍ଣ ସୁରକ୍ଷା ବୈଠକକୁ ଇମ୍ରାନଙ୍କ ଦଳ ବୟକଟ କରିଥିଲା।

ମାର୍ଚ୍ଚ ୧୧ ତାରିଖରେ ନିଷିଦ୍ଧ ବେଲୁଚିସ୍ତାନ ଲିବରେସନ ଆର୍ମି (ବିଏଲଏ) ର ବିଦ୍ରୋହୀମାନଙ୍କ ଦ୍ୱାରା ଏକ ଟ୍ରେନ୍ ଅପହରଣ ପରେ ଜାତୀୟ ସଂସଦର ବାଚସ୍ପତି ଆୟାଜ ସାଦିକ ଜାତୀୟ ସୁରକ୍ଷା ସମ୍ପର୍କିତ ସଂସଦୀୟ କମିଟିର ଏକ ରୁଦ୍ଧଦ୍ୱାର ବୈଠକର ଅଧ୍ୟକ୍ଷତା କରିଥିଲେ। ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଦଳ ପିଟିଆଇ ଏହି ବୈଠକକୁ ବର୍ଜନ କରିଥିଲା।ଇମ୍ରାନ ବର୍ତ୍ତମାନ ଜେଲରେ ଅଛନ୍ତି।

ବାଲୁଚିସ୍ତାନର ବୋଲାନ ଅଞ୍ଚଳରେ ବିଏଲଏ ଟ୍ରେନ୍‌କୁ ଅପହରଣ କରିଥିଲା। ଯେଉଁଥିରେ ପ୍ରାୟ ୪୨୫ଜଣ ଯାତ୍ରୀ ଥିଲେ। ପ୍ରଧାନମନ୍ତ୍ରୀ ଶାହାବାଜ ସରିଫଙ୍କ ପରାମର୍ଶ କ୍ରମେ ଡକାଯାଇଥିବା ଏହି ବୈଠକରେ ପ୍ରମୁଖ ମନ୍ତ୍ରୀ, ବିଭିନ୍ନ ରାଜନୈତିକ ଦଳର ନେତା, ପ୍ରାଦେଶିକ ମୁଖ୍ୟମନ୍ତ୍ରୀ, ରାଜ୍ୟପାଳ ଏବଂ ସେନା ମୁଖ୍ୟ ଜେନେରାଲ ଅସୀମ ମୁନିର ଯୋଗ ଦେଇଥିଲେ।

ଅଧିକ ପଢ଼ନ୍ତୁ: ମହାକାଶରେ ଥାଏ କି ପାଇଖାନା ? କେଉଁଠି ମଳ-ମୂତ୍ର ତ୍ୟାଗ କରନ୍ତି ମହାକାଶଚାରୀ ?

କିନ୍ତୁ, ସରକାରଙ୍କ ନିମନ୍ତ୍ରଣ ସତ୍ତ୍ୱେ ପାକିସ୍ତାନ ତେହେରିକ୍-ଏ-ଇନସାଫ୍ (ପିଟିଆଇ) ବୈଠକରେ ଯୋଗ ଦେବାକୁ ମନା କରିଦେଇଥିଲା କାରଣ ଦଳ ବୈଠକ ପୂର୍ବରୁ ୭୨ ବର୍ଷୀୟ ଇମ୍ରାନଙ୍କ ସହ ସାକ୍ଷାତ ଦାବି କରିଥିଲା। ସରକାର ଦାବି ଗ୍ରହଣ କରି ନଥିଲେ । ପିଟିଆଇ ନେତୃତ୍ୱାଧୀନ ବିରୋଧୀ ମେଣ୍ଟ ତେହେରିକ ତହାଫୁଜ-ଏ-ଆଇନ୍ ପାକିସ୍ତାନ (ଟିଟିଏପି) ମଧ୍ୟ ବୈଠକରୁ ଦୂରେଇ ରହିଥିଲା।

ଟିଟିଏପି ମୁଖ୍ୟ ମହମୁଦ ଖାନ ଆଚକଜାଇ ଏକ ସାମ୍ବାଦିକ ସମ୍ମିଳନୀରେ ଇମ୍ରାନଙ୍କୁ ବୈଠକକୁ ନିମନ୍ତ୍ରଣ କରିବାକୁ ଦାବି କରିଥିଲେ। ସେ କହିଥିଲେ, ପିଟିଆଇ ପ୍ରତିଷ୍ଠାତାଙ୍କୁ ମଧ୍ୟ ନିମନ୍ତ୍ରଣ କରାଯିବା ଉଚିତ କାରଣ ତାଙ୍କ ବିନା କୌଣସି ବୈଠକର କୌଣସି ମୂଲ୍ୟ ରହିବ ନାହିଁ।

ଅଧିକ ପଢ଼ନ୍ତୁ: ପ୍ରେମିକ ପାଇଁ ସ୍ବାମୀଙ୍କୁ ହତ୍ୟା, ଖଣ୍ଡ ବିଖଣ୍ଡିତ ଶରୀର ଡ୍ରମରେ ରଖି ସିମେଣ୍ଟରେ ମୁଦିଦେଲା ସ୍ତ୍ରୀ