ଶେଖ ହସିନାଙ୍କୁ ଆଶ୍ବସ୍ତି: ଆୱାମୀ ଲିଗ୍‌କୁ ନିଷିଦ୍ଧ କରିବା ଆବେଦନ ପ୍ରତ୍ୟାହାର

ଢାକା: ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ଏବଂ ତାଙ୍କ ଦଳ ପାଇଁ ଏକ ଆଶ୍ବସ୍ତି ଖବର ଆସିଛି। ବାସ୍ତବରେ ତାଙ୍କ ପାର୍ଟି ଆୱାମୀ ଲିଗ୍ ଏବଂ ଅନ୍ୟାନ୍ୟ ଦଳ ଉପରେ ପ୍ରତିବନ୍ଧକ ଲଗାଇବାକୁ ହାଇକୋର୍ଟରେ କରାଯାଇଥିବା ଆବେଦନକୁ ମଙ୍ଗଳବାର ପ୍ରତ୍ୟାହାର କରି ନିଆଯାଇଛି।

ସୋମବାର ଦିନ ଛାତ୍ର ଆନ୍ଦୋଳନର ନେତାମାନେ ଆୱାମୀ ଲିଗ୍ ଏବଂ ଅନ୍ୟ ୧୦ଟି ରାଜନୈତିକ ଦଳର କାର୍ଯ୍ୟକଳାପ ବନ୍ଦ କରିବାକୁ ଢାକା ହାଇକୋର୍ଟରେ ଏକ ପିଟିସନ ଦାଖଲ କରିଥିଲେ। ତେବେ ମଙ୍ଗଳବାର ଦିନ ଏହାକୁ ପ୍ରତ୍ୟାହାର କରି ନିଆଯାଇଛି। 

କୋର୍ଟର ଅଧିକାରୀ ତଥା ଆଇନଜୀବୀ କହିଛନ୍ତି ଯେ ଛାତ୍ର ଆନ୍ଦୋଳନର ତିନିଜଣ ବରିଷ୍ଠ ନେତା ତଥା ସଂଯୋଜକ ସରଜୀମ ଆଲାମ, ହସନାତ ଅବଦୁଲ୍ଲା ଏବଂ ହସିବୁଲ ଇସଲାମ ଏହି ଆବେଦନ ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଥିଲେ। ୨୦୧୪, ୨୦୧୮ ଏବଂ ୨୦୨୪ରେ ଅନୁଷ୍ଠିତ ହୋଇଥିବା ତିନୋଟି ସାଧାରଣ ନିର୍ବାଚନରେ ​​ହସିନାଙ୍କ ନେତୃତ୍ୱାଧୀନ ଆୱାମୀ ଲିଗ୍ କ୍ଷମତାକୁ ଆସିବା ନେଇ ଆବେଦନରେ ପ୍ରଶ୍ନ ଉଠାଯାଇଥିଲା।

ଢାକା ହାଇକୋର୍ଟର ଦୁଇ ଜଣିଆ ବେଞ୍ଚ ଛାତ୍ର ନେତାଙ୍କ ଏହି ଆବେଦନକୁ ଶୁଣାଣି ପାଇଁ ତାଲିକାଭୁକ୍ତ କରିଥିଲେ। କିନ୍ତୁ ମଙ୍ଗଳବାର ସକାଳେ ପ୍ରକ୍ରିୟା ଆରମ୍ଭ ହେବା ମାତ୍ରେ ଏହି ଆବେଦନ ପ୍ରତ୍ୟାହାର କରି ନିଆଯାଇଥିଲା। ଏହା ପରେ ଜଷ୍ଟିସ ଫାତିମା ନଜୀବ ଏବଂ ଜଷ୍ଟିସ ଶିକଦାର ମହମୁଦୁର ରାଜୀଙ୍କ ବେଞ୍ଚ ଏହି ଆବେଦନକୁ ତାଲିକାରୁ ହଟାଇବାକୁ ନିର୍ଦ୍ଦେଶ ଦେଇଥିଲେ।

ଭେଦଭାବ ବିରୋଧୀ ଆନ୍ଦୋଳନର ନେତୃତ୍ୱ ନେଉଥିବା ଛାତ୍ର ନେତାମାନେ ଆୱାମୀ ଲିଗ୍ ସମେତ ୧୧ଟି ରାଜନୈତିକ ଦଳ ଉପରେ ପ୍ରତିବନ୍ଧକ ଲଗାଇବାକୁ ଦାବି କରିଥିଲେ। ଏଥିରେ ଜାତୀୟ ପାର୍ଟି (ଏରଶାଦ), ଜାତୀୟ ପାର୍ଟି(ମଞ୍ଜୁ), ଗଣତାନ୍ତ୍ରିକ ପାର୍ଟି, ବାଂଲାଦେଶ ୱାର୍କର୍ସ ପାର୍ଟି, ବାଂଲାଦେଶ କମ୍ୟୁନିଷ୍ଟ ପାର୍ଟି (ସିପିବି), ଲିବରାଲ୍ ଡେମୋକ୍ରାଟିକ୍ ପାର୍ଟି, ବିକଳ୍ପ ଧାରା ବାଂଲାଦେଶ, ବାଂଲାଦେଶ ତାରିକେଟ୍ ଫେଡେରେସନ୍ ଏବଂ ଜାତୀୟ ସମାଜତାନ୍ତ୍ରିକ ଦଳ ଅନ୍ତର୍ଭୁକ୍ତ ରହିଥିଲେ।  

ଛାତ୍ର ନେତାଙ୍କ ଏହି ପିଟିସନ ଅନେକ ରାଜନୈତିକ ଦଳ ମଧ୍ୟରେ ଅସନ୍ତୋଷ ସୃଷ୍ଟି କରିଥିଲା। କେତେକ କ୍ଷମା ମାଗିଥିବାବେଳେ ଜାତୀୟ ପାର୍ଟି (ଏରଶାଦ) କହିଥିଲା ଯେ ଏହି ମାମଲା ଆଇନଗତ ଉପାୟରେ ସମାଧାନ ହେବ। ତେବେ ଛାତ୍ର ନେତାମାନେ ଏହି ଆବେଦନ ପ୍ରତ୍ୟାହାର କରିବା ପରେ ବର୍ତ୍ତମାନ ଏହି ଦଳଗୁଡ଼ିକୁ ଆଶ୍ବସ୍ତି ମିଳିଛି।

ଶେଖ ହାସିନାଙ୍କ ପାର୍ଟି ଆୱାମି ଲିଗ୍ ଏହି ସମସ୍ୟାରୁ ରକ୍ଷା ପାଇଥିଲେ ମଧ୍ୟ  ମହମ୍ମଦ ୟୁନୁସଙ୍କ ନେତୃତ୍ୱରେ ମଧ୍ୟବର୍ତ୍ତୀକାଳୀନ ସରକାର ଦଳର ଛାତ୍ର ୱିଙ୍ଗ୍‌କୁ ନିଷିଦ୍ଧ କରିଛନ୍ତି।

ବାସ୍ତବରେ, ଜୁନ୍ ଶେଷରେ ବାଂଲାଦେଶରେ ସଂରକ୍ଷଣ ବିରୋଧୀ ଆନ୍ଦୋଳନ ଆରମ୍ଭ ହୋଇଥିଲା। ଜୁଲାଇ ମଧ୍ୟଭାଗରେ ଏହି ଆନ୍ଦୋଳନ ହିଂସାତ୍ମକ ରୂପ ନେଇଥିଲା। ଛାତ୍ରମାନେ ଶାସକ ଆୱାମୀ ଲିଗ୍ ସମର୍ଥିତ ଛାତ୍ର ଲିଗ୍ ସେମାନଙ୍କୁ ଆକ୍ରମଣ କରିଥିବା ଅଭିଯୋଗ କରି ହିଂସାତ୍ମକ ଆନ୍ଦୋଳନ କରିଥିଲେ।

ଶହ ଶହ ଲୋକଙ୍କ ଜୀବନ ଯାଇଥିଲା ଏବଂ ଏହା ପରେ ଛାତ୍ରମାନେ ଶେଖ ହସିନାଙ୍କ ଇସ୍ତଫା ଦାବି କରିବା ଆରମ୍ଭ କରିଥିଲେ। ଦିନକୁ ଦିନ ହିଂସାତ୍ମକ ଆନ୍ଦୋଳନ ମଧ୍ୟରେ ଶେଖ ହସିନା ଅଗଷ୍ଟ ୫ରେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇ ନିଜ ଜୀବନ ରକ୍ଷା କରିବାକୁ ଭାରତ ପଳାଇ ଆସିଥିଲେ।

ଅଧିକ ପଢ଼ନ୍ତୁ:

ଜିଲ୍ଲା କୋର୍ଟରେ ବିଚାରପତି-ଆଇନଜୀବୀଙ୍କ ଯୁକ୍ତିତର୍କରୁ ହଙ୍ଗାମା: ପୁଲିସର ଲାଠିଚାର୍ଜ

ମହାରାଷ୍ଟ୍ର ବିଧାନସଭା ନିର୍ବାଚନରେ ​​ଅଣ୍ଡରୱାର୍ଲ୍ଡ ଡନ୍‌ ପ୍ରସଙ୍ଗ: ମହାୟୁତି ପ୍ରାର୍ଥୀଙ୍କୁ ଦାଉଦର ବନ୍ଧୁ କହିଲେ ପ୍ରିୟଙ୍କା