ଆହତ ସୈନିକଙ୍କୁ ଯୁଦ୍ଧକୁ ପଠାଉଛି ରୁଷିଆ: ଆଶାବାଡ଼ି ଧରି ଲଢ଼ିବାକୁ ଯାଉଛନ୍ତି

ମସ୍କୋ: ୟୁକ୍ରେନ ସହିତ ଯୁଦ୍ଧରେ ରୁଷୀୟ ସେନା ଆହତ ସୈନିକମାନଙ୍କୁ ଆଶାବାଡ଼ି ସାହାଯ୍ୟରେ ଯୁଦ୍ଧ ପାଇଁ ପଠାଉଥିବା ଜଣାପଡ଼ିଛି। ସେନା ଗୁରୁତର ଆହତ ସୈନିକମାନଙ୍କୁ ଯୁଦ୍ଧରେ ପୁଣିନିୟୋଜନ କରୁଛି। ସିଏନଏନ ଏହାର ଏକ ରିପୋର୍ଟରେ ପ୍ରାପ୍ତ ଭିଡିଓ ଏବଂ ବିବୃତିକୁ ଉଦ୍ଧୃତ କରି ଏହି ସୂଚନା ପ୍ରକାଶ କରିଛି। ରିପୋର୍ଟରେ କୁହାଯାଇଛି ଯେ, ରୁଷିଆ ସେନା ବଢ଼ୁଥିବା ମାନବସମ୍ବଳ ସମସ୍ୟାର ସମ୍ମୁଖୀନ ହେଉଛି।

ୟୁକ୍ରେନୀୟ ଡ୍ରୋନ୍ ଅପରେଟର ଏବଂ ରୁଷିଆନ୍ ସୈନ୍ୟମାନଙ୍କ ଦ୍ୱାରା ପୋଷ୍ଟ କରାଯାଇଥିବା ଫ୍ରଣ୍ଟ-ଲାଇନ୍ ଫୁଟେଜ୍‌ରେ ଯୁଦ୍ଧ କ୍ଷେତ୍ରରେ ସୈନିକ ଆଶାବାଡ଼ି ବ୍ୟବହାର କରୁଥିବା ଦେଖିବାକୁ ମିଳୁଛି। କେତେକଙ୍କ ଗୋଡ଼ରେ ସ୍ପଷ୍ଟ ଆଘାତ ଲାଗିଥିବାର ଦେଖାଯାଉଛି। କେତେକଙ୍କ ଗୋଡ଼ରେ ଏବେ ବି ବ୍ୟାଣ୍ଡେଜରେ ବନ୍ଧାଥିବା ଦେଖାଯାଇଛି।  

ସେମାନଙ୍କୁ ୟୁକ୍ରେନୀୟ ଡ୍ରୋନ୍ ଦ୍ୱାରା ଟାର୍ଗେଟ କରାଯାଇଥିଲା। ରିପୋର୍ଟ ଅନୁସାରେ, ଜଣେ ପାଶ୍ଚାତ୍ୟ ଅଧିକାରୀ କହିଛନ୍ତି, ରୁଷିଆ ସେନା ଆହତମାନଙ୍କୁ ପୁଣି ଯୁଦ୍ଧକୁ ପଠାଉଛି। ଆଶାବାଡ଼ିରେ ଧରିଥିବା ସୈନିକମାନଙ୍କୁ ଆଗ ଧାଡ଼ି ଯୁଦ୍ଧକୁ ଫେରାଇ ନିଆଯାଉଥିବାର ଏକ ଭିଡିଓରେ ଏହା ଦେଖିବାକୁ ମିଳୁଛି।

ହାଇଲାଇଟ୍ସ:

ୟୁକ୍ରେନ ସହିତ ଯୁଦ୍ଧରେ ଆହତ ସୈନିକମାନଙ୍କୁ ପୁଣିନିୟୋଜନ କରୁଛି ରୁଷିଆ
ରିପୋର୍ଟରେ ଦାବି- ରୁଷିଆ ଆଶାବାଡ଼ି ଧରିଥିବା ସୈନିକଙ୍କୁ ଯୁଦ୍ଧ କରିବାକୁ ପଠାଉଛି
ଯୁଦ୍ଧକୁ ପଠାଯାଉଥିବା ଆହତ ସୈନିକମାନେ କ୍ୟାମେରା ଆଗରେ ସେମାନଙ୍କର ପରିସ୍ଥିତି ବର୍ଣ୍ଣନା କରିଛନ୍ତି

ୟୁକ୍ରେନର ୫୯ତମ ବ୍ରିଗେଡ ଦ୍ୱାରା ଜାନୁଆରି ମାସର ଏକ ଡ୍ରୋନ୍ ଭିଡିଓ ପୋଷ୍ଟ କରାଯାଇଥିଲା, ଯାହା ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ପୋକରୋଭସ୍କ ସହର ପାଖରେ ସକ୍ରିୟ ଅଛି। ଭିଡିଓଟିରେ ଦେଖାଯାଉଛି ଯେ, ଜଣେ ରୁଷୀୟ ସୈନିକ ଆଶା ଧରି ଆଶ୍ରୟସ୍ଥଳରେ ପହଞ୍ଚିବାକୁ ଚେଷ୍ଟା କରୁଛନ୍ତି। ଭିଡିଓରେ ସେ ଧୀରେ ଧୀରେ ଚାଲୁଥିବାର ଦେଖାଯାଉଛି।   ତାଙ୍କ ମୁଣ୍ଡ ଉପରେ ୟୁକ୍ରେନୀୟ ଡ୍ରୋନ୍‌ ଉଡି ବୁଲୁଛି।

ଅନ୍ୟ ଭିଡିଓଗୁଡ଼ିକରେ ଆହତ ସୈନିକଙ୍କୁ ବଳପୂର୍ବକ ଆଗ ଧାଡ଼ି ଯୁଦ୍ଧକୁ ପଠାଯାଉଥିବା ଦେଖାଯାଉଛି। ଏକ ଭିଡିଓରେ ଚଣେ ଆହତ ସୈନିକଙ୍କୁ ଦେଖାଯାଉଛି, ତାଙ୍କୁ କ୍ରାସନୋଡାର ଅଞ୍ଚଳର ଦକ୍ଷିଣ ରୁଷିଆ ସହର ୟେସ୍କର ଏକ ସାମରିକ ହସ୍ପିଟାଲରୁ ୟୁନିଫର୍ମ ପିନ୍ଧା ସୈନ୍ୟମାନେ ଯୁଦ୍ଧ କରିବାକୁ ଟାଣି ନେଉଛନ୍ତି।

ଆହତ ସୈନିକ ଜଣକ କହୁଛନ୍ତି, ମୁଁ ଆହତ, ତୁମେ ଦେଖିପାରୁନାହଁ କି ?। ରିପୋର୍ଟ ଅନୁସାରେ, ଆହତ ସୈନିକ କହୁଛନ୍ତି, ଗତକାଲି ମୋର ଅସ୍ତ୍ରୋପଚାର ହୋଇଥିଲା, ଧିକ୍!" କ୍ୟାମେରା ଆଡ଼କୁ ମୁହଁ ଫେରାଇ ସେ ଆହୁରି କହିଛନ୍ତି, ମୁଁ ରୁଷିଆର ସମସ୍ତ ବାସିନ୍ଦାଙ୍କୁ ସମ୍ବୋଧିତ କରୁଛି ଏବଂ ମୁଁ ସମସ୍ତଙ୍କୁ ଦେଖାଇବାକୁ ଚାହୁଁଛି ଯେ, ରୁଷିଆନ ଫେଡେରେସନର ସଶସ୍ତ୍ର ବାହିନୀରେ ଆମର ଜଣେ ଯୋଗ୍ୟ ସୈନିକଙ୍କ ସହିତ କ'ଣ ଘଟୁଛି।

ଅଧିକ ପଢ଼ନ୍ତୁ: ଭାରତକୁ ନ ହରାଇ ପାରିଲେ ମୋ ନାମ ବଦଳାଇ ଦେବ: ଶାହବାଜ ସରିଫଙ୍କ ଚ୍ୟାଲେଞ୍ଜ

ଗାଡ଼ି ଭିତରେ ସେ ତାଙ୍କର ଗୁରୁତର ଆଘାତପ୍ରାପ୍ତ ଗୋଡ଼ ଦେଖାଉଛନ୍ତି, ଯାହାର ଏକ ବଡ଼ ଅସ୍ତ୍ରୋପଚାର ହୋଇଛି। ସେ ତାଙ୍କର ଆହତ ହାତ ମଧ୍ୟ ଦେଖାଉଛନ୍ତି। ସେ କହୁଛନ୍ତି, ମୋର ଗୋଟିଏ ଆଙ୍ଗୁଠି ନାହିଁ। ଡାକ୍ତର ଗତକାଲି ତାହା ଅପରେସନ କରିଥିଲେ। ମୁଁ କେବଳ ଆଶାବାଡ଼ି ସାହାଯ୍ୟରେ ଚାଲିପାରୁଛି।

ସେ କହୁଛନ୍ତି ଯେ, ତାଙ୍କୁ ଆଗ ଧାଡିର ସହର ଲୁହାନସ୍କକୁ ଫେରିବା ପାଇଁ ଖରାପ ରାସ୍ତାରେ ୮ ଘଣ୍ଟାର ଏକ ଯନ୍ତ୍ରଣାଦାୟକ ଯାତ୍ରା କରିବାକୁ ପଡୁଛି। ଏହା ସହିତ କ୍ୟାମେରା ଅନ୍ୟ ସୈନିକମାନଙ୍କ ଉପରେ ପକାଯାଉଛି, ଯେଉଁମାନେ ସେମାନଙ୍କର କ୍ଷତ ମଧ୍ୟ ଦେଖାଉଛନ୍ତି। ଦ୍ୱିତୀୟ ସୈନିକ କହୁଛନ୍ତି, ମୋ ପେଟରେ ଏକ ନଳୀ ଲାଗିଛି। ଭିଡିଓଟି କେବେ ସୁଟିଂ କରାଯାଇଥିଲା ତାହା ସ୍ପଷ୍ଟ  ହୋଇ ନାହିଁ।

ଅଧିକ ପଢ଼ନ୍ତୁ: ଚିକେନ ସେଣ୍ଟରରେ ଭୟାବହ ଅଗ୍ନିକାଣ୍ଡ: ନିଆଁକୁ ଆୟତ୍ତ କଲା ଅଗ୍ନିଶମ ବାହିନୀ