ଭାରତୀୟ ମତ୍ସ୍ୟଜୀବୀଙ୍କ ଉପରେ ଶ୍ରୀଲଙ୍କା ନୌସେନାର ଗୁଳିମାଡ଼: ୫ ଆହତ

ନୂଆଦିଲ୍ଲୀ:  ଶ୍ରୀଲଙ୍କା ନୌସେନା ଭାରତ-ଶ୍ରୀଲଙ୍କା ସାମୁଦ୍ରିକ ସୀମାରେ ଗୁଳି ଚଳାଇଛି। ଏହି ଗୁଳିରେ ୫ଜଣ ଭାରତୀୟ ମତ୍ସ୍ୟଜୀବୀ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ଗୁରୁତର ଥିବା କୁହାଯାଉଛି। ଏହା ବ୍ୟତୀତ ତିନି ଜଣ ସାମାନ୍ୟ ଆହତ ହୋଇଛନ୍ତି। ମଙ୍ଗଳବାର ସକାଳେ ଡେଲଫ୍ଟ ଦ୍ୱୀପ ନିକଟରେ ଏହି ଘଟଣା ଘଟିଛି।

ଏହି ପ୍ରସଙ୍ଗରେ ଭାରତୀୟ ବୈଦେଶିକ ମନ୍ତ୍ରଣାଳୟ ଏନେଇ ଆପତ୍ତି ଜଣାଇଛି। ଏହି କାର୍ଯ୍ୟାନୁଷ୍ଠାନ ବିରୋଧ କରି ଆନୁଷ୍ଠାନିକ ଭାବେ ଶ୍ରୀଲଙ୍କାର କାର୍ଯ୍ୟନିର୍ବାହୀ ହାଇ କମିଶନରଙ୍କୁ ଡକାଯାଇଛି। ଏହି କାର୍ଯ୍ୟକୁ ଅନୁପଯୁକ୍ତ ଏବଂ ଗ୍ରହଣୀୟ ନୁହେଁ ବୋଲି ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି।

ମଙ୍ଗଳବାର ସକାଳେ କରାଇକାଲ ବନ୍ଦରରୁ ଡେଲଫ୍ଟ ଦ୍ୱୀପ ନିକଟରେ ମାଛ ଧରିବାକୁ ଯାଇଥିବା ୧୩ ଜଣ ଭାରତୀୟ ମତ୍ସ୍ୟଜୀବୀଙ୍କୁ ଶ୍ରୀଲଙ୍କା ନୌସେନା ସାମୁଦ୍ରିକ ସୀମା ପାର କରିବା ଅଭିଯୋଗରେ ଗିରଫ କରିଛି। ଏହି ସମୟ ମଧ୍ୟରେ ଶ୍ରୀଲଙ୍କା ନୌସେନାର ଗୁଳି ଚାଳନା ସମ୍ପର୍କରେ ସୂଚନା ମିଳିଥିଲା।

ପ୍ରକାଶିତ ବିବୃତି ଅନୁଯାୟୀ, ମତ୍ସ୍ୟଜୀବୀଙ୍କ ଏକ ଦଳ ପାରୁଥି ଥୁରାଇ ନିକଟରେ ମାଛ ଧରୁଥିଲେ। ଏହି ସମୟ ମଧ୍ୟରେ ଶ୍ରୀଲଙ୍କା ନୌସେନାର ପାଟ୍ରୋଲିଂ ଡଙ୍ଗା ଏହାକୁ ଘେରି ରହିଥିଲା। ନୌସେନା ମତ୍ସ୍ୟଜୀବୀମାନେ ଶ୍ରୀଲଙ୍କାର ଅନ୍ତର୍ଜାତୀୟ ଜଳସୀମାକୁ ଉଲ୍ଲଂଘନ କରିଥିବା ଅଭିଯୋଗ କରିଛି। ଗୋଟିଏ ଡଙ୍ଗା ସହିତ ତେର ଜଣ ମତ୍ସ୍ୟଜୀବୀଙ୍କୁ ଗିରଫ କରାଯାଇଥିଲା। 

ଯେତେବେଳେ ମତ୍ସ୍ୟଜୀବୀମାନେ ଡଙ୍ଗାକୁ ତାମିଲନାଡୁ ଆଡକୁ ନେବାକୁ ଚେଷ୍ଟା କରିଥିଲେ, ସେତେବେଳେ ଶ୍ରୀଲଙ୍କା ନୌସେନା ଗୁଳି ଚଳାଇଥିଲା। ଏହି ଗୁଳି ବିନିମୟ ସମୟରେ ଶ୍ରୀଲଙ୍କାର ନୌସେନା ଅଧିକାରୀ ମଧ୍ୟ ଡଙ୍ଗାରେ ଥିଲେ। ଜଣେ ମତ୍ସ୍ୟଜୀବୀଙ୍କ ଗୋଡ଼ରେ ଗୁଳି ବାଜିଥିବା କୁହାଯାଉଛି। ଗିରଫ ମତ୍ସ୍ୟଜୀବୀମାନଙ୍କୁ କଙ୍ଗେସନ୍ତୁରାଇ ପୁଲିସକୁ ହସ୍ତାନ୍ତର କରାଯାଇଥିଲା।

ଅଧିକ ପଢ଼ନ୍ତୁ: ‘ଏନ୍‌ପିସିଆଇଜନିତ ସମସ୍ୟା ଥିଲେ ବ୍ୟାଙ୍କ ଯାଆନ୍ତୁ ମହିଳା, ମିଳିଯିବ ସୁଭଦ୍ରା ଟଙ୍କା’

ମତ୍ସ୍ୟଜୀବୀ ଡଙ୍ଗାରେ ଥିବା ୧୩ ଜଣ ମତ୍ସ୍ୟଜୀବୀଙ୍କ ମଧ୍ୟରୁ ଦୁଇଜଣ ଗୁରୁତର ଆହତ ହୋଇଛନ୍ତି ଏବଂ ବର୍ତ୍ତମାନ ଜାଫନା ଟିଚିଂ ହସ୍ପିଟାଲରେ ଚିକିତ୍ସିତ ହେଉଛନ୍ତି ବୋଲି ବୈଦେଶିକ ମନ୍ତ୍ରଣାଳୟ ଏକ ବିବୃତିରେ କହିଛି। ସାମାନ୍ୟ ଆହତ ମତ୍ସ୍ୟଜୀବୀମାନେ ଅନ୍ୟ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଏହି ସମୟରେ, ଜାଫନାରେ ଥିବା ଭାରତୀୟ କନସୁଲେଟର ଅଧିକାରୀମାନେ ଆହତ ମତ୍ସ୍ୟଜୀବୀଙ୍କୁ ଭେଟି ସେମାନଙ୍କୁ ସମସ୍ତ ସାହାଯ୍ୟର ଆଶ୍ୱାସନା ଦେଇଛନ୍ତି।

ଅଧିକ ପଢ଼ନ୍ତୁ: ତାଲିବାନ ରାସ୍ତାରେ ୟୁନୁସ୍‌ଙ୍କ ସରକାର: ପାଠ୍ୟପୁସ୍ତକରେ ପରିବର୍ତ୍ତନ