ହାରିଲେ ଇଭିଏମ୍ ଖରାପ: ବାଲାଟ ପେପରରେ ନିର୍ବାଚନ ଆବେଦନ ସୁପ୍ରିମକୋର୍ଟରେ ଖାରଜ

ନୂଆଦିଲ୍ଲୀ: ଦେଶରେ ନିର୍ବାଚନରେ ଇଲେକ୍ଟ୍ରୋନିକ୍ ଭୋଟିଂ ମେସିନ୍ (ଇଭିଏମ୍) ବଦଳରେ ବାଲାଟ ପେପର ବ୍ୟବହାର ଦାବି ନେଇ କରାଯାଇଥିବା ଏକ ଜନସ୍ବାର୍ଥ ଆବେଦନକୁ ସୁପ୍ରିମକୋର୍ଟ ମଙ୍ଗଳବାର ଖାରଜ କରିଛନ୍ତି। କୋର୍ଟ କହିଛନ୍ତି ଯେ ଯେତେବେଳେ  ହାରୁଛ ଏହାର ଅର୍ଥ ହେଉଛି ଇଭିଏମ୍ ଟାମ୍ପରିଂ କରାଯାଇଥିଲା ଏବଂ ଯେତେବେଳେ ନିର୍ବାଚନରେ ​​ଜିତୁଛ ସେତେବେଳେ  କିଛି ନ କହି ଚୁପ୍ ରହୁଛ। ଆମେ ଏହାକୁ କିପରି ଭାବେ ଦେଖିବୁ? 

ଆବେଦନକାରୀ ଏକ ଜନସ୍ବାର୍ଥ ମାମଲାରେ ଦର୍ଶାଇଥିଲେ ଯେ ଚନ୍ଦ୍ରବାବୁ ନାଇଡୁ ଏବଂ ୱାଇଏସ୍ ଜଗନ୍ ମୋହନ ରେଡ୍ଡୀଙ୍କ ପରି ବିଶିଷ୍ଟ ନେତାମାନେ ମଧ୍ୟ ଇଭିଏମ୍ ଟାମ୍ପରିଂକୁ ନେଇ ଚିନ୍ତା ପ୍ରକଟ କରିଛନ୍ତି। ସୁପ୍ରିମକୋର୍ଟର ଏକ ବେଞ୍ଚ କହିଛନ୍ତି ଯେ ଯେତେବେଳେ ଚନ୍ଦ୍ରବାବୁ ନାଇଡୁ କିମ୍ବା ରେଡ୍ଡୀ ହାରିଗଲେ, ସେତେବେଳେ ସେମାନେ କହିଥିଲେ ଯେ ଇଭିଏମ୍ ଟାମ୍ପରିଂ କରି ଜିତିଛନ୍ତି, ଆମେ ଏହାକୁ କିପରି ଭାବେ ଦେଖିବା ଏବଂ ଏହାକୁ କ’ଣ କହିବା ବୋଲି ଶୀର୍ଷକୋର୍ଟ ପ୍ରଶ୍ନ କରିଛନ୍ତି।

ଆବେଦନକାରୀ ଡ. କେଏ ପାଲ୍ ଏଲନ୍ ମସ୍କଙ୍କ ମନ୍ତବ୍ୟର ଉଦାହରଣ ଦେଇଥିଲେ। ମସ୍କ ଇଭିଏମ୍ ଟ୍ୟାମ୍ପରିଂ କରାଯାଇପାରିବ ବୋଲି ମତ ଦେଇଥିଲେ। ସେ ଆହୁରି ମଧ୍ୟ ସୂଚାଇ ଦେଇଥିଲେ ଯେ ଏଲନ୍ ମସ୍କ ୧୫୦ରୁ ଅଧିକ ଦେଶ ଗସ୍ତ କରିଛନ୍ତି ଏବଂ ଅଧିକାଂଶ ବିଦେଶୀ ଦେଶ ବାଲାଟ ପେପରରେ ଭୋଟ୍ ଗ୍ରହଣ କରୁଛନ୍ତି ଏବଂ ଭାରତ ମଧ୍ୟ ସମାନ ପଦ୍ଧତି ଗ୍ରହଣ କରିବା ଉଚିତ୍ ବୋଲି ପାଲ୍ ଯୁକ୍ତି ବାଢ଼ିଥିଲେ।

ମସ୍କଙ୍କର ଉଦାହରଣ ଶୁଣିବା ପରେ ବିଚାରପତି ବିକ୍ରମ ନାଥଙ୍କ ନେତୃତ୍ବରେ ଗଠିତ ବେଞ୍ଚ ପଚାରିଥିଲେ, ଆପଣ କାହିଁକି ବିଶ୍ବର ଅନ୍ୟମାନଙ୍କଠାରୁ ଅଲଗା ହେବାକୁ ଚାହୁଁନାହାନ୍ତି? ନିର୍ବାଚନ ପ୍ରଚାର ସମୟରେ ଟଙ୍କା ଏବଂ ମଦ ବ୍ୟବହାରକୁ ନିୟନ୍ତ୍ରିତ କରିବା ପାଇଁ ଏକ ବିସ୍ତୃତ ଢାଞ୍ଚା ପ୍ରସ୍ତୁତ କରିବାକୁ ଆବେଦନକାରୀ ଅନୁରୋଧ କରିଥିଲେ। ଆଇନ ଅନୁଯାୟୀ ଏପରି ଅଭ୍ୟାସ ନିଷେଧ ଏବଂ ଦଣ୍ଡନୀୟ ଅଟେ। ଏଥିସହ, ସୂଚନାଯୋଗ୍ୟ ନିଷ୍ପତ୍ତି ଗ୍ରହଣର ଗୁରୁତ୍ୱ ବିଷୟରେ ସଚେତନତା ସୃଷ୍ଟି କରିବାକୁ ଏକ ବ୍ୟାପକ ଭୋଟର ଶିକ୍ଷା ଅଭିଯାନ ପାଇଁ ଆବେଦନ କରାଯାଇଥିଲା। 

ଅଧିକ ପଢ଼ନ୍ତୁ:  ସିଏମ୍ ଘୋଷଣା ପୂର୍ବରୁ ବିଜେପିର ପ୍ରସ୍ତୁତି: ଜାଣିଶୁଣି ବିଳମ୍ବ ହେଉଛି

ପାଲ୍ କାହିଁକି ରାଜନୀତିରେ ପ୍ରବେଶ କରୁଛନ୍ତି ବୋଲି ବିଚାରପତି ପ୍ରଶ୍ନ କରିଥିଲେ। ପାଲ୍ କହିଥିଲେ ଯେ ସେ ଗ୍ଲୋବାଲ ଶାନ୍ତି ସମ୍ମିଳନୀରୁ ସମର୍ଥନ ପାଇଛନ୍ତି ଏବଂ ଏହି ପ୍ରସଙ୍ଗରେ ୧୮ ଟି ରାଜନୈତିକ ଦଳ ତାଙ୍କ ସହ ଅଛନ୍ତି। ଏଥିସହ, ପାଲ୍  ସୂଚନା ଦେଇଥିଲେ ଯେ ବିଶ୍ବର ୧୯୭ ଟି ଦେଶ ମଧ୍ୟରୁ ୧୮୦ ଟି ଦେଶରେ ବାଲାଟ ପେପର ବ୍ୟବସ୍ଥା ଜାରି ରହିଛି।

ଏହା ପରେ କୋର୍ଟ ଏହି ଆବେଦନକୁ ଖାରଜ କରି କହିଥିଲେ ଯେ ଏହା ସେହି ସ୍ଥାନ ନୁହେଁ ଯେଉଁଠାରେ ଆପଣ ଏସବୁ ଉପରେ ବିତର୍କ କରିପାରିବେ। ଏଥି ପାଇଁ ଅନ୍ୟ ଫୋରମ୍ ରହିଛି ବୋଲି କୋର୍ଟ କହିଥିଲେ।

ଅଧିକ ପଢ଼ନ୍ତୁ: ତୃତୀୟ ବିଶ୍ୱଯୁଦ୍ଧର ପଦଧ୍ବନୀ: ପୁଟିନଙ୍କୁ ଶକ୍ତି ପ୍ରଦର୍ଶନ କଲା ନାଟୋ