ଦୁଇ ବର୍ଷ ପରେ, କେସିଆର ପୁଣି ଥରେ ପୁରୁଣା ରୂପରେ: ପ୍ରଥମ ରାଲିରେ କହିଲେ, 'ଟାଇଗର ଅଭି ଜିନ୍ଦା ହୈ'

ହାଇଦ୍ରାବାଦ୍: ତେଲେଙ୍ଗାନାର ପୂର୍ବତନ ମୁଖ୍ୟମନ୍ତ୍ରୀ ଏବଂ ବିଆରଏସ ମୁଖ୍ୟ କେସିଆର ପୁଣି ଥରେ ପୁରୁଣା ରୂପରେ ନଜର ଆସିଛନ୍ତି। ୨୦୨୩ ମସିହାରେ କ୍ଷମତାରୁ ବହିଷ୍କୃତ ହେବା ପରେ, କେସିଆର ପରଦାପଛରେ  ରହିଥିବା ବେଳେ ଏବେ ଦୁଇ ବର୍ଷ ପରେ, ତାଙ୍କୁ ତାଙ୍କ ଦଳ ବିଆରଏସର ରୌପ୍ୟ ଜୟନ୍ତୀରେ ଏକ ସାଧାରଣ ସଭାକୁ ସମ୍ବୋଧିତ କରୁଥିବାର ଦେଖାଯାଇଥିଲା।

କେସିଆର ରେଭନ୍ତ ରେଡ୍ଡୀଙ୍କ ନେତୃତ୍ୱାଧୀନ କଂଗ୍ରେସ ସରକାରଙ୍କୁ ଟାର୍ଗେଟ କରି କହିଛନ୍ତି ଯେ, କଂଗ୍ରେସ ପ୍ରତ୍ୟେକ କ୍ଷେତ୍ରରେ ବିଫଳ ହୋଇଛି। କଂଗ୍ରେସ  ପାଣି, ବିଦ୍ୟୁତ୍, ରାଇଥୁ ବନ୍ଧୁ, ବେକାରୀ, ମହିଳା ଏବଂ ହାଇଦ୍ରାବାଦ ବିଶ୍ୱବିଦ୍ୟାଳୟ ଜମି ବିକ୍ରୟ ଭଳି ପ୍ରସଙ୍ଗ ଉଠାଇଥିଲେ। କଂଗ୍ରେସର ରେବନ୍ତ ରେଡ୍ଡୀ ସରକାରଙ୍କ କାର୍ଯ୍ୟକାରିତା ଉପରେ ପ୍ରଶ୍ନ ଉଠାଇବା ସହିତ, ଦଳର ରୌପ୍ୟ ଜୟନ୍ତୀ ଅବସରରେ, ସେ ବାର୍ତ୍ତା ଦେଇଛନ୍ତି ଯେ 'ଟାଇଗର ଅଭି ଜିନ୍ଦା ହୈ' ଏବଂ ପୁଣି ଫେରିବା ପାଇଁ ପ୍ରସ୍ତୁତ। 

ନଭେମ୍ବର ୨୦୨୩ ବିଧାନସଭା ନିର୍ବାଚନରେ ​​ପରାଜୟ ପରେ, କେସିଆର କ୍ଷମତା ହରାଇଥିଲେ ଏବଂ ଦଶ ବର୍ଷ ଧରି କ୍ଷମତାରେ ଥିବା ବିଆରଏସ ୩୯ ଆସନକୁ ହ୍ରାସ ପାଇଥିଲା। ଏହି ପରାଜୟ ପରେ, ଦଳର ମୁଖ୍ୟ କେସିଆର ନିଜକୁ ସାର୍ବଜନୀନ କାର୍ଯ୍ୟକ୍ରମରୁ ଦୂରେଇ ରଖିଥିଲେ ଏବଂ ତାଙ୍କ ସ୍ୱାସ୍ଥ୍ୟାବସ୍ଥା ମଧ୍ୟ ଖରାପ ହୋଇଯାଇଥିଲା। ଏହି କାରଣରୁ ସେ ୨୦୨୪ ଲୋକସଭା ନିର୍ବାଚନରୁ ମଧ୍ୟ ଦୂରତା ରକ୍ଷା କରିଥିଲେ। କେସିଆରଙ୍କ ପ୍ରତିଛବି ଜଣେ ଆନ୍ଦୋଳନକାରୀ ନେତାଙ୍କ ପରି ଏବଂ ଦଳ ଦୀର୍ଘ ସମୟ ଧରି ଏଥିରୁ ଲାଭ ପାଇ ଆସୁଛି। ବିଆରଏସଙ୍କ ରୌପ୍ୟ ଜୟନ୍ତୀ ଅବସରରେ କେସିଆରଙ୍କ ସାର୍ବଜନୀନ ଉପସ୍ଥିତିକୁ ଅନେକ ତାଙ୍କର 'ରାଜନୈତିକ ପ୍ରତ୍ୟାବର୍ତ୍ତନ' ଭାବରେ ଦେଖୁଛନ୍ତି।

ତେଲେଙ୍ଗାନାରେ କ୍ଷମତା ପରିବର୍ତ୍ତନ ପରେ, କେସିଆର ନୀରବତା ଅବଲମ୍ବନ କରିଥିଲେ, ଯାହା ଯୋଗୁ ବିଭିନ୍ନ  ପ୍ରକାରର ଆକଳନ କରାଯାଉଥିଲା। ବିଏସଆର କଂଗ୍ରେସ ସରକାରଙ୍କୁ ସୁଯୋଗ ଦେବାକୁ ଚାହୁଁଛି।  ଦୁଇ ବର୍ଷ ପରେ, ସେ କଂଗ୍ରେସକୁ କୋଣଠେସା କରିବାକୁ ଆସିଛନ୍ତି। ତାଙ୍କ ଭାଷଣରେ, ବିଆରଏସ ସୁପ୍ରିମୋ କହିଥିଲେ, ସେ ପୂର୍ବ ଅପେକ୍ଷା ଦଳୀୟ କାର୍ଯ୍ୟକଳାପରେ ଅଧିକ ସାମିଲ ହେବେ, ଯାହା ଫଳରେ ସେ ନିର୍ବାଚନ ରାଜନୀତିରୁ ଓହରି ଯାଇପାରନ୍ତି ବୋଲି ଅନୁମାନ କରାଯାଉଛି।  

ପୂର୍ବତନ ମୁଖ୍ୟମନ୍ତ୍ରୀଙ୍କ ପୁଅ କେଟିଆର  କହିଛନ୍ତି ଯେ, ଯେତେବେଳେ କେସିଆର କହିଥିଲେ, ଆମେ ୨୦୨୮ରେ କ୍ଷମତାକୁ ଫେରିବୁ, ସେତେବେଳେ କରତାଳିର ପ୍ରବଳ ଶବ୍ଦ ସୃଷ୍ଟି ହୋଇଥିଲା। ସେ ଆମର ନେତା ଏବଂ ମାର୍ଗଦର୍ଶକ।  ଆଗକୁ ମଧ୍ୟ ସେ ଏହା କରିବେ  । ସେ ୨୦୨୮ରେ ମୁଖ୍ୟମନ୍ତ୍ରୀ ହେବେ, ଏଥିରେ କୌଣସି ସନ୍ଦେହ ନାହିଁ। କେଟିଆର କହିଛନ୍ତି ଯେ, କେସିଆର ଏବେ ଲୋକଙ୍କ ମଧ୍ୟକୁ ଯିବେ ଏବଂ ତେଲେଙ୍ଗାନାର ପ୍ରତ୍ୟେକ ପ୍ରସଙ୍ଗରେ ଠିଆ ହୋଇଥିବାର ଦେଖାଯିବେ।

କେସିଆର କଂଗ୍ରେସ ସରକାର ଉପରେ କଡ଼ା ଆକ୍ରମଣ କରିଥିଲେ।  ସେ କଂଗ୍ରେସକୁ 'ତେଲେଙ୍ଗାନାର ଶତ୍ରୁ ନମ୍ବର ୱାନ୍' ବୋଲି କହିଥିଲେ। ଶାସକ ରେଭନ୍ତ ସରକାରଙ୍କୁ ଭାଙ୍ଗିବା ପାଇଁ ବିଆରଏସ  ଦ୍ୱାରା ପ୍ରୟାସ କରାଯାଇଥିବା କଳ୍ପନାଜଳ୍ପନାକୁ ଖଣ୍ଡନ କରି, କେସିଆର କହିଛନ୍ତି ଯେ, କାର୍ଯ୍ୟକାଳ ଶେଷ ହେବା ପୂର୍ବରୁ ରେଭନ୍ତ ରେଡ୍ଡୀଙ୍କ ନେତୃତ୍ୱାଧୀନ ସରକାରଙ୍କୁ ଭାଙ୍ଗିବା ପାଇଁ ଦଳର କୌଣସି ଉଦ୍ଦେଶ୍ୟ ନାହିଁ।

ସେ କହିଥିଲେ, ତେଲେଙ୍ଗାନାର ଲୋକମାନଙ୍କୁ ଆମ ଦଳ ଏବଂ ବର୍ତ୍ତମାନର ସରକାରଙ୍କ ଦ୍ୱାରା କରାଯାଇଥିବା କାମକୁ ଦେଖିବାକୁ ଏବଂ ତୁଳନା କରିବାକୁ ଦିଅନ୍ତୁ। ସକ୍ରିୟ ରାଜନୀତିରୁ ଦୂରେଇ ରହିବା ବିଷୟରେ ସେ କହିଛନ୍ତି ଯେ, ସେ କଂଗ୍ରେସ ସରକାରଙ୍କୁ ସମୟ ଦେବାକୁ ଚାହାନ୍ତି ଏବଂ ଦେଖିବାକୁ ଚାହାନ୍ତି ଯେ ସେମାନେ ସେମାନଙ୍କର ନିର୍ବାଚନୀ ପ୍ରତିଶ୍ରୁତି କିପରି ପୂରଣ କରୁଛନ୍ତି। ସେ କହିଥିଲେ ଯେ, ପର୍ଯ୍ୟାପ୍ତ ସମୟ ଦିଆଯାଇଛି ଏବଂ ଏବେ ପ୍ରଶ୍ନ ପଚାରିବା ଏବଂ ଦାୟିତ୍ୱ ନେବାର ସମୟ ଆସିଛି। ବିଆରଏସ ରାସ୍ତାକୁ ଓହ୍ଲାଇ କଂଗ୍ରେସ ସରକାରଙ୍କର ପର୍ଦ୍ଦାଫାସ କରିବ।

କେସିଆର କହିଛନ୍ତି ଯେ, ସେ ତେଲେଙ୍ଗାନା ଆନ୍ଦୋଳନ ଆରମ୍ଭ କରିବା ପାଇଁ ପ୍ରଭୁ ଶ୍ରୀରାମଙ୍କ ବାଣୀ 'ଜନନୀ ଜନ୍ମଭୂମିଶ୍ଚ ସ୍ୱର୍ଗାଦପୀ ଗରିୟସୀ (ମାତା ଏବଂ ମାତୃଭୂମି ସ୍ୱର୍ଗଠାରୁ ମଧ୍ୟ ଗୁରୁତ୍ୱପୂର୍ଣ୍ଣ)' ଦ୍ୱାରା ଅନୁପ୍ରାଣିତ ହୋଇଛନ୍ତି। ଏହିପରି ଭାବରେ, ଏହାକୁ ହିନ୍ଦୁତ୍ୱ ଏଜେଣ୍ଡାରେ ଆଗକୁ ବଢ଼ିବା ପାଇଁ କେସିଆରଙ୍କ ରଣନୀତି ଭାବରେ ବିବେଚନା କରାଯାଉଛି। ତଥାପି, କେସିଆର ପୂର୍ବରୁ କହିସାରିଛନ୍ତି ଯେ, ସେ ଜଣେ ହିନ୍ଦୁ, କିନ୍ତୁ ଘରେ। ବିଆରଏସ ନେତା କହିଛନ୍ତି ଯେ, ଦଳୀୟ ନୀତି ଅନୁଯାୟୀ, ଆମେ ଧର୍ମ ବ୍ୟବହାର କରୁନାହୁଁ ଏବଂ ସମସ୍ତଙ୍କୁ ସମ୍ମାନ କରୁ।

ପ୍ରଭୁ ଶ୍ରୀରାମଙ୍କ ଚାରିପାଖରେ ଘୂରି ବୁଲୁଥିବା ତାଙ୍କର ହିନ୍ଦୁତ୍ୱ ଏଜେଣ୍ଡାକୁ ଆଗକୁ ବଢାଇବା ସହିତ, କେସିଆରଙ୍କ ହିନ୍ଦୁ ଦେବତାଙ୍କ ନାମକୁ ହିନ୍ଦୁ ଭୋଟ ଆଧାର ସହିତ ଯୋଡ଼ିବାର ଏକ ପ୍ରୟାସ ଭାବରେ ମଧ୍ୟ ଦେଖାଯାଉଛି, ଯାହା ୨୦୨୩ବିଧାନସଭା ନିର୍ବାଚନ ଏବଂ ଗତ ବର୍ଷର ଲୋକସଭା ନିର୍ବାଚନରେ ​​ବିଜେପି ପଛରେ ଏକତ୍ରିତ ହୋଇଥିଲା। ଏହି କାରଣରୁ କେସିଆର ଏବେ ହିନ୍ଦୁ ଭୋଟ ଉପରେ ନିଜର କବ୍‌ଜା ବଜାୟ ରଖିବାକୁ ଚେଷ୍ଟା କରୁଛନ୍ତି।

ବିଆରଏସ ସୁପ୍ରିମୋଙ୍କ ଅଧିକାଂଶ ଭାଷଣ ଚାଷୀଙ୍କ ଚିନ୍ତା ପାଇଁ ଉତ୍ସର୍ଗୀକୃତ ଥିଲା। ସେ କହିଥିଲେ ଯେ, ଇତିହାସରେ ସମସ୍ତ ସରକାର ଚାଷୀଙ୍କଠାରୁ ଟିକସ ଆଦାୟ କରିଛନ୍ତି, କିନ୍ତୁ ଚାଷୀମାନଙ୍କୁ ସବସିଡି ଦେଇଥିବା ଏକମାତ୍ର ସରକାର ହେଉଛି ବିଆରଏସସରକାର। ରାଇଥୁ ବନ୍ଧୁ ଯୋଜନାରେ ସହାୟତା ବୃଦ୍ଧିର ପ୍ରତିଶ୍ରୁତି ପୂରଣ ନକରିବା ପାଇଁ କଂଗ୍ରେସ ସରକାର ଉପରେ ଆକ୍ରମଣ କରି କେସିଆର କହିଛନ୍ତି, ଡୁପ୍ଲିକେଟ ଗାନ୍ଧୀ ଦିଲ୍ଲୀରୁ ଆସିଥିଲେ ଏବଂ ରାଇଥୁ ବନ୍ଧୁ ଯୋଜନାରେ ୧୫,୦୦୦ ଟଙ୍କା ପ୍ରତିଶ୍ରୁତି ଦେଇଥିଲେ। ସେହି ପ୍ରତିଶ୍ରୁତିର କ'ଣ ହେଲା?

କେସିଆର କହିଛନ୍ତି ଯେ କଂଗ୍ରେସ ସରକାର ନିରବଚ୍ଛିନ୍ନ ପାନୀୟ ଜଳ ଏବଂ ବିଦ୍ୟୁତ ଯୋଗାଣ ଠାରୁ ଆରମ୍ଭ କରି ଚାଷୀମାନଙ୍କୁ ଆର୍ଥିକ ସହାୟତା, ବିହନ ଏବଂ ସାର ଯୋଗାଇବା, ଧାନ ସଂଗ୍ରହ ଏବଂ ଗ୍ରାମୀଣ ଏବଂ ସହରାଞ୍ଚଳ ତେଲେଙ୍ଗାନାରେ ବିକାଶ ପର୍ଯ୍ୟନ୍ତ ସମସ୍ତ ଦିଗରେ ବିଫଳ ହୋଇଛି। କେସିଆର ଏହା ମଧ୍ୟ କହିଛନ୍ତି ଯେ, ଟିଜିଏସଆରଟିସି ବସ୍‌ରେ ଗରିବ ମହିଳାଙ୍କୁ ମାଗଣା ଯାତ୍ରା ଯୋଗାଇବା ପାଇଁ ମହାଲକ୍ଷ୍ମୀ ଯୋଜନା ଏକ ଅଦରକାରୀ ଯୋଜନା, ଯାହା ଯୋଗୁ ରାଜ୍ୟର ମହିଳାମାନେ ପରସ୍ପରର କେଶ ଧରି ସିଟ୍ ପାଇଁ ଲଢ଼ୁଛନ୍ତି। ବିଧାନସଭା ନିର୍ବାଚନ ପାଇଁ ଏକ ଦୃଢ଼ ଭିତ୍ତିଭୂମି ପ୍ରସ୍ତୁତ କରିବା ପାଇଁ ଦଳ ଆଗାମୀ ପୌର ପରିଷଦ ନିର୍ବାଚନରେ ​​ଏକ ଚମତ୍କାର ପ୍ରତ୍ୟାବର୍ତ୍ତନ କରିବାକୁ ଯୋଜନା କରୁଛି।

ଅଧିକ ପଢ଼ନ୍ତୁ: ଅସୀମ ମୁନିରଙ୍କ କାର୍ଯ୍ୟକଳାପକୁ ଲୁଚାଇବାକୁ ଚେଷ୍ଟା କରୁଛି ଆଇଏସଆଇ, ପହଲଗାମ ଆକ୍ରମଣ ନେଇ ସଙ୍କଟରେ ପାକିସ୍ତାନ

ଛତିଶଗଡ଼-ତେଲେଙ୍ଗାନା ସୀମାରେ ନକ୍ସଲଙ୍କୁ ନିପାତ କରିବା ପାଇଁ କେନ୍ଦ୍ର ସରକାରଙ୍କ 'ଅପରେସନ୍ କାଗର' ଉପରେ କେସିଆର ପ୍ରଶ୍ନ ଉଠାଇଥିଲେ। ସେ କହିଥିଲେ ଯେ, କେନ୍ଦ୍ର ପାଖରେ ସେନା ଏବଂ ଶକ୍ତି ଥାଇପାରେ କିନ୍ତୁ ଗଣତନ୍ତ୍ରରେ ନକ୍ସଲବାଦୀଙ୍କ ବିରୁଦ୍ଧରେ ହତ୍ୟାର ଧାରା ଜାରି ରହିପାରିବ ନାହିଁ। କେନ୍ଦ୍ର ନକ୍ସଲପନ୍ଥୀଙ୍କ ସହିତ ଆଲୋଚନା କରିବା ଉଚିତ୍। ସେ ଅଭିଯୋଗ କରିଛନ୍ତି ଯେ, ଏହି ଅପରେସନରେ ଆଦିବାସୀ ଯୁବକମାନେ ପ୍ରାଣ ହରାଉଛନ୍ତି। ଏକ ଗଣତାନ୍ତ୍ରିକ ପରିବେଶ ସୃଷ୍ଟି କରନ୍ତୁ ଏବଂ ସେମାନଙ୍କୁ ଆଲୋଚନା ପାଇଁ ନିମନ୍ତ୍ରଣ କରନ୍ତୁ। ଲୋକମାନଙ୍କୁ ସେମାନଙ୍କର କଥା ଶୁଣିବାକୁ ଦିଅନ୍ତୁ। ସେ ଘୋଷଣା କଲରିଛନ୍ତି  ଯେ, ବିଆରଏସ ଏକ ପ୍ରସ୍ତାବ ପାସ୍ କରି କେନ୍ଦ୍ରକୁ ପଠାଇବ, ଅପରେସନ୍ କାଗରକୁ ତୁରନ୍ତ ବନ୍ଦ କରିବା ପାଇଁ ଅନୁରୋଧ କରିବ।

କେସିଆରଙ୍କ ନକ୍ସଲ ଏବଂ ଆଦିବାସୀ ଯୁବକଙ୍କ ସମ୍ପର୍କରେ ଏପରି ଏକ ସୂଚନା ଆସିଛି ଯେତେବେଳେ କଂଗ୍ରେସ ଅଭିଯୋଗ କରିଛି ଯେ, ବିଆରଏସ ଏବଂ ବିଜେପି ପରସ୍ପର ସହିତ ସଙ୍ଗଠିତ ଅଛନ୍ତି। ଗୋଟିଏ ପଟେ, କେସିଆର କେନ୍ଦ୍ରର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସରକାରଙ୍କୁ ଟାର୍ଗେଟ କରି ବିଜେପିଠାରୁ ଦୂରେଇ ରହିବାକୁ ଇଙ୍ଗିତ ଦେଇଥିଲେ, ଅନ୍ୟପଟେ ଏହାକୁ ୧୦ ପ୍ରତିଶତ ଆଦିବାସୀ ସମ୍ପ୍ରଦାୟର ଭୋଟ ହାସଲ କରିବାର ପ୍ରୟାସ ଭାବରେ ଦେଖାଯାଉଛି। ଆଦିବାସୀ ଜନସଂଖ୍ୟା ଉତ୍ତର ତେଲେଙ୍ଗାନାର ଆଦିଲାବାଦ ଏବଂ କୋମାରାମ ଭୀମ ଆସିଫାବାଦ ପରି ଜିଲ୍ଲାମାନଙ୍କରେ ଅଧିକ ରହିଛି। କେସିଆର ଏବେ ଆଦିବାସୀଙ୍କ ଭୋଟ ହାତେଇବା ପାଇଁ ଏଭଳି ପ୍ରୟାସ କରୁଥିବା ଚର୍ଚ୍ଚା ହେଉଛି।

ଅଧିକ ପଢ଼ନ୍ତୁ: ପନିର୍ ନମିଳିବାରୁ ବିବାହରେ ଆସିଥିବା ଅତିଥିଙ୍କ ଉପରେ ଟ୍ରାଭେଲର୍ ଚଢ଼ାଇ ଦେଲେ ଯୁବକ

 KCR | Telengana | BRS