ଇରାନର ଆଣବିକ କାରଖାନା ଉପରେ ଯେକୌଣସି ସମୟରେ ହୋଇପାରେ ଆମେରିକା ଆକ୍ରମଣ

ତେହେରାନ: ଆମେରିକାର ରାଷ୍ଟ୍ରପତି ନିର୍ବାଚନରେ ​​ଡୋନାଲ୍ଡ ଟ୍ରମ୍ପ ଜିତିବା ପରେ ଇରାନର ଆଣବିକ କାର୍ଯ୍ୟକ୍ରମକୁ ଟାର୍ଗେଟ କରାଯାଇପାରେ ବୋଲି ଆଶଙ୍କା ସୃଷ୍ଟି ହୋଇଛି। ଇରାନର ଆଣବିକ କାର୍ଯ୍ୟକ୍ରମକୁ ନେଇ ଇସ୍ରାଏଲ୍ ଏବଂ ଆମେରିକା ଦୀର୍ଘ ଦିନ ଧରି ବିରୋଧ କରିଆସୁଥିଲେ। ଟ୍ରମ୍ପଙ୍କ ପ୍ରତ୍ୟାବର୍ତ୍ତନ ସହିତ ଇରାନ ପ୍ରତି ଆମେରିକାର ଆଭିମୁଖ୍ୟ ଅଧିକ ଆକ୍ରମଣାତ୍ମକ ହୋଇପାରେ ବୋଲି କୁହାଯାଇଛି।

ଏଭଳି ପରିସ୍ଥିତିରେ ୟୁରୋପୀୟ ଦେଶଗୁଡିକର କୂଟନୀତିଜ୍ଞମାନେ ଇରାନ ଉପରେ ସାମରିକ ଆକ୍ରମଣର ଆଶଙ୍କା ହ୍ରାସ କରିବାର ଉପାୟ ଖୋଜୁଛନ୍ତି ଯାହା ଦ୍ବାରା ଏକ ନୂତନ ବିବାଦ ଆରମ୍ଭ ହେବା ପୂର୍ବରୁ ବନ୍ଦ ହୋଇପାରିବ। 

ଅଲ ଆରବିୟାନ୍ୟୁଜ୍ ୱେବସାଇଟର ରିପୋର୍ଟ ଅନୁଯାୟୀ, ୟୁରୋପର ଜଣେ ବରିଷ୍ଠ କୂଟନୀତିଜ୍ଞ କହିଛନ୍ତି ଯେ, ପଶ୍ଚିମ ଏସିଆରେ ଘଟିଥିବା ଘଟଣା ପରେ ଇସ୍ରାଏଲ ଇରାନ ଉପରେ ଆକ୍ରମଣ କରିବାକୁ ନିଷ୍ପତ୍ତି ନେଇଛି। ତେବେ ଆକ୍ରମଣର ସମୟ ସମ୍ପର୍କରେ କୌଣସି ସ୍ପଷ୍ଟ ସୂଚନା ନାହିଁ। ଇରାନକୁ ଆଣବିକ ଅସ୍ତ୍ର ହାସଲ ନକରିବା ପାଇଁ ଏହା ଉପରେ ସିଧାସଳଖ ଆକ୍ରମଣ ପରିବର୍ତ୍ତେ ଅନ୍ୟ ଉପାୟ ଖୋଜିବା ପାଇଁ ୟୁରୋପୀୟ ଦେଶ ଟ୍ରମ୍ପ ପ୍ରଶାସନ ସହ ଆଲୋଚନା କରୁଛନ୍ତି।

ଗତ ବର୍ଷ ନଭେମ୍ବରରେ ଗୁପ୍ତ ବୈଠକ ପରେ ବ୍ରିଟେନ, ଫ୍ରାନ୍ସ ଏବଂ ଜର୍ମାନୀ ମଧ୍ୟ ଏହି ସପ୍ତାହରେ ଇରାନର ଆଣବିକ କାର୍ଯ୍ୟକ୍ରମ ଉପରେ ଆଲୋଚନା କରିଥିଲେ। ଡିସେମ୍ବରରେ ମଧ୍ୟ ତିନି ୟୁରୋପୀୟ ଦେଶ ଇରାନର ବଢୁଥିବା ୟୁରାନିୟମ ଭଣ୍ଡାରକୁ ନେଇ ଉଦ୍‌ବେଗ ପ୍ରକାଶ କରିଥିଲେ। ଆମେରିକା ଏବଂ ଇସ୍ରାଏଲ୍ ସହିତ ଇଉରୋପୀୟ ଦେଶମାନେ ମଧ୍ୟ ଅନୁଭବ କରୁଛନ୍ତି ଯେ, ଆଣବିକ ଅସ୍ତ୍ର ତିଆରି ପାଇଁ ଇରାନର ଯଥେଷ୍ଟ ସାମଗ୍ରୀ ଅଛି। ଡୋନାଲ୍ଡ ଟ୍ରମ୍ପଙ୍କ ପାଇଁ ଇରାନର ଆଣବିକ କାର୍ଯ୍ୟକ୍ରମ ଏକ ବଡ଼ ପ୍ରସଙ୍ଗ ହୋଇଛି।

ସିନେଟ ବୈଦେଶିକ ସମ୍ପର୍କ କମିଟିର ଅଧ୍ୟକ୍ଷ ଜିମ ରିସ୍କ କହିଛନ୍ତି ଯେ, ଟ୍ରମ୍ପଙ୍କ ଆଗମନ ସହିତ ଆମେରିକା 'ଇରାନ ଉପରେ ସର୍ବାଧିକ ଚାପ ଅଭିଯାନ' ନୀତିକୁ ଫେରିବ। ବିଶେଷଜ୍ଞମାନଙ୍କ ଅନୁସାରେ ଇରାନର ଆଣବିକ କାରଖାନା ଉପରେ ଆମେରିକା କିମ୍ବା ଇସ୍ରାଏଲର ପ୍ରତ୍ୟକ୍ଷ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଅଧିକ ସମ୍ଭାବନା ରହିଛି ଏବଂ କୂଟନୈତିକ ସମାଧାନର କମ୍ ଆଶା ଅଛି। ନିର୍ବାଚନ ବିଜୟ ପରେ ଟ୍ରମ୍ପ ଇରାନ ବିରୋଧରେ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଯୋଜନା କରୁଛନ୍ତି। ଯେକୌଣସି ସମୟରେ ଇରାନର ଆଣବିକ କାରଖାନା ଉପରେ ଆମେରିକା ଆକ୍ରମଣ କରିପାରେ ବୋଲି ଆଶଙ୍କା ପ୍ରକାଶ ପାଇଛି।

ଜେନେଭା ଗ୍ରାଜୁଏଟ୍ ଇନଷ୍ଟିଚ୍ୟୁଟ୍‌ର ବରିଷ୍ଠ ଗବେଷକ ଫାରଜେନ୍ ସାବେଟ୍ କହିଛନ୍ତି ଯେ, ଟ୍ରମ୍ପଙ୍କ ନେତୃତ୍ୱରେ ଇରାନର ଆଣବିକ ପ୍ରସଙ୍ଗରେ ତେହେରାନ ଉପରେ ସିଧାସଳଖ ଆମେରିକାର ଆକ୍ରମଣ ପୂର୍ବ ଅପେକ୍ଷା ଅଧିକ ସମ୍ଭବ ମନେ ହେଉଛି। ଟ୍ରମ୍ପ ଇସ୍ରାଏଲକୁ ଆଗରେ ରଖିବାର ସମ୍ଭାବନା ରହିଛି। ସେ ସାମରିକ ସହାୟତା ଯୋଗାଇ ଇସ୍ରାଏଲର ଆକ୍ରମଣକୁ ସମର୍ଥନ କରିବେ ଏବଂ ପ୍ରତିଶୋଧ ନେବାରେ ଇରାନକୁ ସାହାଯ୍ୟ କରିବେ।

ସାବେଟ ଏହା ମଧ୍ୟ କହିଛନ୍ତି ଡୋନାଲ୍ଡ ଟ୍ରମ୍ପଙ୍କର କୌଣସି ଲମ୍ବା ଏବଂ ଜଟିଳ ବାର୍ତ୍ତାଳାପରେ ଜଡିତ ହେବାର ପ୍ରକୃତି ନାହିଁ। ଏହା ପରିବର୍ତ୍ତେ, ସେ ଶୀଘ୍ର ଫଳାଫଳ ଆଶା କରନ୍ତି। ତାଙ୍କର ବୈଦେଶିକ ନୀତି ଏବଂ ଜାତୀୟ ସୁରକ୍ଷା ଦଳ ମଧ୍ୟ ସମ୍ପୂର୍ଣ୍ଣ ଭାବେ ଇରାନ ବିରୋଧୀ। ତାଙ୍କ ଦଳର ଲୋକମାନେ ମଧ୍ୟ ଯେକୌଣସି ଚୁକ୍ତିରେ ବାଧା ସୃଷ୍ଟି କରିପାରନ୍ତି। ଏଭଳି ପରିସ୍ଥିତିରେ ରାସ୍ତା କେବଳ ସାମରିକ ଆକ୍ରମଣ ଆଡକୁ ଯାଉଛି।

ଅଧିକ ପଢ଼ନ୍ତୁ: ଯୁଦ୍ଧ ଜାରି ରଖିବା ପାଇଁ ଇସ୍ରାଏଲର ଅଧିକାର ରହିଛି: ନେତାନ୍ୟାହୁ

ୟୁରାସିଆ ଗ୍ରୁପର ବରିଷ୍ଠ ବି‌ଶେଷଜ୍ଞ ଗ୍ରେଗୋରୀ ବ୍ରୁ କହିଛନ୍ତି, ସାମରିକ ଆକ୍ରମଣ ଉପରେ ବିଚାର କରିବା ପୂର୍ବରୁ ଟ୍ରମ୍ପ ପ୍ରତିବନ୍ଧକ ଏବଂ ଅର୍ଥନୈତିକ ଚାପ ବ୍ୟବହାର କରିବେ।  ଟ୍ରମ୍ପ ପ୍ରଥମେ ପ୍ରତ୍ୟକ୍ଷ ଆକ୍ରମଣରୁ ଦୂରେଇ ରହିବାକୁ ଚାହିଁବେ।

ବାହାରିନ ଭିତ୍ତିକ ସୁରକ୍ଷା ଏବଂ ବିପଦ ପରିଚାଳନା ସଂସ୍ଥା ଲେ ବ୍ୟାକ୍ ଇଣ୍ଟରନ୍ୟାସନାଲ୍‌ର ଗୁପ୍ତଚର ମୁଖ୍ୟ ମାଇକେଲ୍ ହୋରୋଭିଜ୍ କହିଛନ୍ତି ଯେ, ଟ୍ରମ୍ପ ଇରାନ ପ୍ରିୀ କୋହଳ ମନୋଭାବ ପୋଷଣ କରି ପାରନ୍ତି। ତେବେ ଆଣବିକ ପ୍ରସଙ୍ଗରେ ଇରାନ ବାରମ୍ବାର ସ୍ପଷ୍ଟୀକରଣ ଦେଇଛି ଯେ, ଆମର ଆଣବିକ ଅସ୍ତ୍ର ତିଆରି କରିବାର ଉଦ୍ଦେଶ୍ୟ ନାହିଁ।

ଅଧିକ ପଢ଼ନ୍ତୁ: ଟୁସୁ ମେଳା ଦେଖି ଫେରୁଥିଲେ, ବାଇକ୍ ଧକ୍କାରେ ଚାଲିଗଲା ବୃଦ୍ଧଙ୍କ ଜୀବନ