ଦେଶର ପରବର୍ତ୍ତୀ ମୁଖ୍ୟ ନିର୍ବାଚନ କମିସନର କିଏ ହେବେ: ନିଯୁକ୍ତି ପାଇଁ ଫେବ୍ରୁଆରି ୧୮ ପୂର୍ବରୁ ବୈଠକ

ନୂଆଦିଲ୍ଲୀ: ନୂତନ ମୁଖ୍ୟ ନିର୍ବାଚନ କମିସନରଙ୍କ ନିଯୁକ୍ତିକୁ ଚୂଡ଼ାନ୍ତ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଚୟନ କମିଟି ଆସନ୍ତା ସପ୍ତାହ ପ୍ରାରମ୍ଭରେ ବୈଠକ କରିବେ। ବର୍ତ୍ତମାନର ମୁଖ୍ୟ ନିର୍ବାଚନ କମିସନର ରାଜୀବ କୁମାରଙ୍କ କାର୍ଯ୍ୟକାଳ ଫେବ୍ରୁଆରି ୧୮ ରେ ଶେଷ ହେଉଛି।

ସୂତ୍ର ଅନୁସାରେ, ଚୟନ କମିଟିରେ ପ୍ରଧାନମନ୍ତ୍ରୀ, ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ଏବଂ ପ୍ରଧାନମନ୍ତ୍ରୀଙ୍କ ଦ୍ୱାରା ମନୋନୀତ ଜଣେ କେନ୍ଦ୍ରମନ୍ତ୍ରୀ ରହିବେ। ଏହି ବୈଠକ ୧୬ କିମ୍ବା ୧୭  ଫେବ୍ରୁଆରିରେ ହୋଇପାରେ।

ବୈଠକରେ ସର୍ଚ୍ଚ କମିଟି ଦ୍ୱାରା ସଂକ୍ଷିପ୍ତ ତାଲିକାଭୁକ୍ତ ନାମ ଉପସ୍ଥାପନ କରାଯିବ। ଚୟନ କମିଟି ଏକ ନାମ ଚୂଡ଼ାନ୍ତ କରିବେ ଏବଂ ଏହାକୁ ସୁପାରିଶ କରିବେ। କମିଟିର ସୁପାରିଶ ଆଧାରରେ ରାଷ୍ଟ୍ରପତି ମୁଖ୍ୟ ନିର୍ବାଚନ କମିସନରଙ୍କୁ ନିଯୁକ୍ତି ଦେବେ। ବର୍ତ୍ତମାନର ମୁଖ୍ୟ ନିର୍ବାଚନ କମିସନର ରାଜୀବ କୁମାରଙ୍କ ପରେ, ସବୁଠାରୁ ବରିଷ୍ଠ ନିର୍ବାଚନ କମିସନର ହେଉଛନ୍ତି ଜ୍ଞାନେଶ କୁମାର, ଯାହାଙ୍କ କାର୍ଯ୍ୟକାଳ ୨୬ ଜାନୁଆରି ୨୦୨୯ ପର୍ଯ୍ୟନ୍ତ ରହଛି। ଅନ୍ୟ ନିର୍ବାଚନ କମିସନର ହେଉଛନ୍ତି ସୁଖବୀର ସିଂହ ସାନ୍ଧୁ।

କେନ୍ଦ୍ର ସରକାର ନିର୍ବାଚନ କମିସନର ଏବଂ ମୁଖ୍ୟ ନିର୍ବାଚନ କମିସନରଙ୍କ ନିଯୁକ୍ତି ପାଇଁ ମୁଖ୍ୟ ନିର୍ବାଚନ କମିସନର ଏବଂ ଅନ୍ୟାନ୍ୟ ନିର୍ବାଚନ କମିସନର ନିଯୁକ୍ତି, ସେବା ସର୍ତ୍ତାବଳୀ ଏବଂ କାର୍ଯ୍ୟକାଳ ଆଇନ, ୨୦୨୩ ପ୍ରଣୟନ କରିଥିଲେ। ଏହା ଅଧୀନରେ, ପ୍ରଧାନମନ୍ତ୍ରୀ, ବିରୋଧୀ ଦଳ ନେତା ଏବଂ ପ୍ରଧାନମନ୍ତ୍ରୀଙ୍କ ଦ୍ୱାରା ନିଯୁକ୍ତ ଜଣେ କେନ୍ଦ୍ରମନ୍ତ୍ରୀଙ୍କୁ ନେଇ ଗଠିତ ଏକ ତିନି ସଦସ୍ୟ ବିଶିଷ୍ଟ କମିଟି ନିର୍ବାଚନ କମିସନର ଏବଂ ମୁଖ୍ୟ ନିର୍ବାଚନ କମିସନରଙ୍କ ନିଯୁକ୍ତି ପାଇଁ ସୁପାରିଶ କରିବେ।

ଏହା ପୂର୍ବରୁ ସର୍ଚ୍ଚ କମିଟି ପାଞ୍ଚଟି ନାମକୁ ସର୍ଟଲିଷ୍ଟ କରିବେ। ଏହି ନାମଗୁଡ଼ିକ ମଧ୍ୟରୁ ଗୋଟିଏକୁ ମୁଖ୍ୟ ନିର୍ବାଚନ କମିସନରଙ୍କ ପାଇଁ ଚୟନ କମିଟି ଚୂଡ଼ାନ୍ତ କରିବେ। ଆଇନ ଅନୁଯାୟୀ, ପ୍ରାର୍ଥୀ ଭାରତ ସରକାରଙ୍କ ସଚିବସ୍ତରୀୟ ଅଧିକାରୀ ହୋଇଥିବେ। ସେ ସଚ୍ଚୋଟ, ନିରପେକ୍ଷ ଏବଂ ନିର୍ବାଚନ ପରିଚାଳନା ଏବଂ ଆଚରଣରେ ଅଭିଜ୍ଞତା ଥିବା ବ୍ୟକ୍ତି ଥିବେ।

ନିର୍ବାଚନ କମିସନର ଏବଂ ମୁଖ୍ୟ ନିର୍ବାଚନ କମିସନରଙ୍କ ନିଯୁକ୍ତି ପାଇଁ ତିଆରି ହୋଇଥିବା ନୂତନ ଆଇନକୁ ଚ୍ୟାଲେଞ୍ଜ କରୁଥିବା ଆବେଦନର ଶୁଣାଣି ସୁପ୍ରିମକୋର୍ଟ ଫେବ୍ରୁଆରି ୧୯ରେ କରିବେ। ୨୦୨୩ ଆଇନ ଅନୁଯାୟୀ ନିର୍ବାଚନ କମିସନରଙ୍କ ନିଯୁକ୍ତି ପ୍ରକ୍ରିୟାରୁ ଭାରତର ମୁଖ୍ୟ ବିଚାରପତି (ସିଜେଆଇ)ଙ୍କୁ ବାହାର କରାଯାଇଥିଲା। ନୂତନ ଆଇନ ଅନୁଯାୟୀ, ନିଯୁକ୍ତି କମିଟିରେ ପ୍ରଧାନମନ୍ତ୍ରୀ, ବିରୋଧୀ ଦଳ ନେତା ଏବଂ ଜଣେ କେନ୍ଦ୍ରମନ୍ତ୍ରୀଙ୍କୁ ସାମିଲ କରାଯାଇଛି।

ଅଧିକ ପଢ଼ନ୍ତୁ: ଯୁଦ୍ଧ ବନ୍ଦ ହେଲେ ରୁଷିଆ ସହିତ ଆଲୋଚନା କରିବାକୁ ପ୍ରସ୍ତୁତ: ଜେଲେନସ୍କି

ଆବେଦନକାରୀ କହିଛନ୍ତି ଯେ, ୨୦୨୩ଆଇନ ନିର୍ବାଚନ କମିସନରଙ୍କ ନିଯୁକ୍ତି ପ୍ରକ୍ରିୟାରୁ ସିଜେଆଇଙ୍କୁ ବାହାର କରିଦେଇଛି ଏବଂ ପ୍ରଧାନମନ୍ତ୍ରୀ, ବିରୋଧୀ ଦଳ ନେତା ଏବଂ ଜଣେ କେନ୍ଦ୍ରମନ୍ତ୍ରୀଙ୍କୁ ନେଇ ଗଠିତ ଏକ କମିଟିକୁ କ୍ଷମତା ଦେଇଛି। ଆବେଦନକାରୀଙ୍କ ଯୁକ୍ତି ହେଉଛି, ମୁକ୍ତ ଏବଂ ନିରପେକ୍ଷ ନିର୍ବାଚନ ସୁନିଶ୍ଚିତ କରିବା ପାଇଁ ନିର୍ବାଚନ କମିସନଙ୍କୁ ରାଜନୈତିକ ଏବଂ କାର୍ଯ୍ୟନିର୍ବାହୀ ହସ୍ତକ୍ଷେପରୁ ମୁକ୍ତ ରଖିବା ଆବଶ୍ୟକ।

ଅଧିକ ପଢ଼ନ୍ତୁ: ଶିମିଳିପାଳରୁ ୬ ଶିକାରୀ ଗିରଫ, ୩ ଦେଶୀ ବନ୍ଧୁକ ଜବତ