ରାଷ୍ଟ୍ରପତିଙ୍କ କ୍ଷମତା ଲୋଭ: ୯୨ ବର୍ଷ ବୟସରେ ପୁଣି ଲଢ଼ିବେ ନିର୍ବାଚନ

ୟାଓୟୁଣ୍ଡେ:  କାମେରୁନର ୯୨ ବର୍ଷୀୟ ରାଷ୍ଟ୍ରପତି ପୁଣି ଥରେ ନିର୍ବାଚନରେ  ପ୍ରତିଦ୍ୱନ୍ଦ୍ୱିତା କରିବାକୁ ଘୋଷଣା କରିଛନ୍ତି। କେନ୍ଦ୍ରୀୟ ଆଫ୍ରିକୀୟ ଦେଶ କାମେରୁନର ରାଷ୍ଟ୍ରପତି ପଲ ବିୟା ଅକ୍ଟୋବର ୨୦୨୫ରେ ଅନୁଷ୍ଠିତ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ନିଜର ପ୍ରାର୍ଥୀପତ୍ର ଦାଖଲ କରିଛନ୍ତି। ପଲ ବିୟା ବିଶ୍ୱର ସବୁଠାରୁ ବୟସ୍କ ଏବଂ ସବୁଠାରୁ ଦୀର୍ଘ ସମୟ ଧରି କ୍ଷମତାରେ  ଥିବା ରାଷ୍ଟ୍ରମୁଖ୍ୟମାନଙ୍କ ମଧ୍ୟରୁ ଜଣେ। ସେ ଗତ ୪୩ ବର୍ଷ ଧରି କାମେରୁନର ରାଷ୍ଟ୍ରପତି ଅଛନ୍ତି ଏବଂ ବର୍ତ୍ତମାନ ତାଙ୍କ ବୟସ ୯୨ ବର୍ଷ। ଏବେ ସେ ୧୦୦ ବର୍ଷ ବୟସ ପର୍ଯ୍ୟନ୍ତ କ୍ଷମତାରେ ରହିବାକୁ ଚାହାନ୍ତି।

ପଲ୍ ବିୟା ରବିବାର ସୋସିଆଲ ମିଡିଆ ପ୍ଲାଟଫର୍ମ ଏକ୍ସ ରେ ପୋଷ୍ଟ କରି ତାଙ୍କର ପ୍ରାର୍ଥୀତ୍ୱ ଘୋଷଣା କରିଛନ୍ତି। ସେ ଲେଖିଛନ୍ତି, ମୁଁ ୧୨ ଅକ୍ଟୋବର ୨୦୨୫ ରେ ଅନୁଷ୍ଠିତ ହେବାକୁ ଥିବା ରାଷ୍ଟ୍ରପତି ନିର୍ବାଚନ ପାଇଁ ମୋର ପ୍ରାର୍ଥୀତ୍ୱ ଘୋଷଣା କରୁଛି। ସେ  ୧୯୮୨ ମସିହାରେ ରାଷ୍ଟ୍ରପତି ଭାବରେ ଦାୟିତ୍ୱ ଗ୍ରହଣ କରିଥିଲେ ଏବଂ ସେବେଠାରୁ ଲଗାତାର  ଭାବରେ ଏହି ପଦବୀରେ ରହିଛନ୍ତି।

ପଲ୍ ବିୟା ତାଙ୍କ ପୋଷ୍ଟରେ ଦାବି କରିଛନ୍ତି ଯେ, ସେ ଜନସାଧାରଣଙ୍କ ଦାବି ଯୋଗୁ ଏହି ନିଷ୍ପତ୍ତି ନେଇଛନ୍ତି। ସେ ଲୋକଙ୍କୁ ଆଶ୍ୱାସନା ଦେଇଛନ୍ତି ଯେ, ସେ ଭବିଷ୍ୟତରେ ମଧ୍ୟ ସେମାନଙ୍କର ସେବା କରି ଚାଲିବେ।  ତେବେ  ୪୩  ବର୍ଷର ଦୀର୍ଘ ଶାସନ ପରେ, ଦେଶରେ ତାଙ୍କ ବିରୁଦ୍ଧରେ ପ୍ରତିବାଦର ସ୍ୱର ଜୋରଦାର ହେବାରେ ଲାଗିଛି। ଅନେକ ବିରୋଧୀ ନେତା ଏବଂ ସାମାଜିକ କର୍ମୀ କାମେରୁନର ବିକାଶ ଏବଂ ଗଣତନ୍ତ୍ରରେ ତାଙ୍କୁ ସବୁଠାରୁ ବଡ଼ ପ୍ରତିବନ୍ଧକ ବୋଲି ବିବେଚନା କରୁଛନ୍ତି।

ଅଧିକ ପଢ଼ନ୍ତୁ: ରକ୍ଷାବନ୍ଧନ ପୂର୍ବରୁ କେନ୍ଦ୍ରୀୟ କର୍ମଚାରୀଙ୍କୁ ମିଳିପାରେ ଉପହାର: ବଢ଼ିପାରେ ମହଙ୍ଗା ଭତ୍ତା

ତାଙ୍କ ପ୍ରାର୍ଥୀତ୍ୱ ଘୋଷଣା ପରେ, ବିଭିନ୍ନ ବିରୋଧୀ ଦଳ ମଧ୍ୟ ସେମାନଙ୍କର ପ୍ରାର୍ଥୀଙ୍କ ନାମ  ଘୋଷଣା କରିଛନ୍ତି। ସେମାନଙ୍କ ମଧ୍ୟରେ ସବୁଠାରୁ ପ୍ରମୁଖ ନାମ ହେଉଛନ୍ତି  କାମେରୁନ୍ ରେନାଇସାନ୍ସ ମୁଭମେଣ୍ଟର ମ୍ୟୁରିସ୍ କାମଟୋ।  ସେ ୨୦୧୮ରେ  ହୋଇଥିବା ରାଷ୍ଟ୍ରପତି ନିର୍ବାଚନରେ ଦ୍ୱିତୀୟ ସ୍ଥାନ ଅଧିକାର କରିଥିଲେ।  ସେହିପରି  ଜୋଶୁଆ ଓସିହ, ଆକେରେ ମୁନା ଏବଂ କାବ୍ରାଲ୍ ଲିବି ଭଳି ନେତାମାନେ ମଧ୍ୟ ରାଷ୍ଟ୍ରପତି ନିର୍ବାଚନ ପାଇଁ ସେମାନଙ୍କର ପ୍ରାର୍ଥୀତ୍ୱ ଉପସ୍ଥାପନ କରିଛନ୍ତି।

ବିରୋଧୀ ନେତାମାନେ ପଲ୍ ବିୟାଙ୍କ ବିରୁଦ୍ଧରେ ଦୁର୍ନୀତି , ଖରାପ ଶାସନ ଏବଂ ଦେଶର ଅର୍ଥନୈତିକ  ତଥା ଜାତୀୟ ସୁରକ୍ଷା ଚ୍ୟାଲେଞ୍ଜର ମୁକାବିଲା କରିବାରେ ବିଫଳ ହୋଇଥିବା ଅଭିଯୋଗ କରିଛନ୍ତି। କାମେରୁନ୍ ରେନେସାନ୍ସ ଆନ୍ଦୋଳନର ମହାସଚିବ କ୍ରିଷ୍ଟୋଫର ଏନକଙ୍ଗ୍ ବିୟାଙ୍କୁ ତାଚ୍ଛଲ୍ୟ କରି କହିଛନ୍ତି: ପାପା, ଆପଣ ଆପଣଙ୍କର ସର୍ବୋତ୍ତମ ଦେଇଛନ୍ତି। ଆପଣ କ'ଣ ଏବେ ଅନ୍ୟ ଜଣେ କାମେରୁନ୍‌ବାସୀଙ୍କୁ କ୍ଷମତା ହସ୍ତାନ୍ତର କରିବାକୁ ପ୍ରସ୍ତୁତ ନୁହଁନ୍ତି କି?

୧୯୮୨ ମସିହାରେ ଅହମଦୌ ଅହିଦଜୋଙ୍କ ଇସ୍ତଫା ପରେ ପଲ୍ ବିୟା ଦେଶରେ କ୍ଷମତା ଗ୍ରହଣ କରିଥିଲେ। ତାଙ୍କ ଶାସନ କାଳରେ, କାମେରୁନ୍ ଅନେକ ଗମ୍ଭୀର ଆର୍ଥିକ ସଙ୍କଟର ସମ୍ମୁଖୀନ ହୋଇଥିଲା।   ଦେଶ  ଏକ-ଦଳୀୟ ଶାସନ ବ୍ୟବସ୍ଥାରୁ ବହୁଦଳୀୟ ଗଣତନ୍ତ୍ରକୁ ଚାଲି ଯାଇଥିଲେ। ତାଙ୍କ ସରକାର ବିରୁଦ୍ଧରେ ଲଗାତାର ଦୁର୍ନୀତି, ପାଣ୍ଠିର ଅପବ୍ୟବହାର ଏବଂ ପ୍ରଶାସନିକ କଳର କୁପରିଚାଳନା ଅଭିଯୋଗ ଆସିଛି। ୨୦୦୮ ମସିହାରେ, ସେ ରାଷ୍ଟ୍ରପତିଙ୍କ  କାର୍ଯ୍ୟକାଳ ସୀମା ଉଚ୍ଛେଦ କରି  ସମ୍ବିଧାନ ସଂଶୋଧନ କରିଥିଲେ।  ଏହା ପରେ ତାଙ୍କୁ ଅନିର୍ଦ୍ଦିଷ୍ଟ କାଳ ପାଇଁ ନିର୍ବାଚନ ଲଢ଼ିବାର ଅଧିକାର ମିଳି ଯାଇଥିଲା।

ଅଧିକ ପଢ଼ନ୍ତୁ: ଦୀର୍ଘ ୬୨ ବର୍ଷ ପରେ ଅବସର ନେବ ପ୍ରତିଷ୍ଠିତ ଲଢୁଆ ବିମାନ ମିଗ୍‌-୨୧

paul-biya | cameroon