ଭାରତକୁ ଆମେରିକାରୁ ଟଙ୍କା ପଠାଇବା ସହଜ ଆଉ ଶସ୍ତା ହେବ: ଟିକସରେ ବଡ଼ ରିହାତି!

ୱାଶିଂଟନ: ଆମେରିକାରେ ରହୁଥିବା ପ୍ରବାସୀ ଭାରତୀୟଙ୍କ ପାଇଁ ଏକ ବଡ଼ ଆଶ୍ୱସ୍ତି ଖବର ଆସିଛି। ୱାନ୍ ବିଗ୍ ବିଉଟିଫୁଲ୍ ବିଲ୍ ଆକ୍ଟର ନୂତନ ଡ୍ରାଫ୍ଟରେ, ରେମିଟେନ୍ସ ଟ୍ୟାକ୍ସକୁ ୩.୫% ରୁ  ୧%କୁ ହ୍ରାସ କରାଯାଇଛି। ପୂର୍ବରୁ, ଏହି ବିଲରେ ୫% ଟିକସର ବ୍ୟବସ୍ଥା ଥିଲା, ପରେ ଏହାକୁ ୩.୫% କୁ ହ୍ରାସ କରାଯାଇଥିଲା ଏବଂ ବର୍ତ୍ତମାନ ସେନେଟର ସଦ୍ୟତମ ସଂସ୍କରଣରେ, ଏହାକୁ  ୧%କୁ  ହ୍ରାସ କରାଯାଇଛି। ବିଲ୍ ଆଇନ ହେବା ପରେ ଭାରତକୁ ଟଙ୍କା ପଠାଉଥିବା ଲୋକମାନଙ୍କୁ ଏହା ଦ୍ବାରା ବହୁତ ଲାଭ ମିଳିବ।

ଇଟିର ରିପୋର୍ଟ ଅନୁଯାୟୀ, ନୂତନ ନିୟମ ଅନୁଯାୟୀ, ଏହି ଟିକସ କେବଳ ୩୧ ଡିସେମ୍ବର ୨୦୨୫ ପରେ ହେଉଥିବା କିଛି ନିର୍ଦ୍ଦିଷ୍ଟ ସ୍ଥାନାନ୍ତର ଉପରେ ଲାଗୁ ହେବ। ଭଲ କଥା ହେଉଛି ଯେ, ଏହି ଟିକସ ବ୍ୟାଙ୍କ କିମ୍ବା ଆର୍ଥିକ ପ୍ରତିଷ୍ଠାନର ଆକାଉଣ୍ଟରୁ କରାଯାଇଥିବା ସ୍ଥାନାନ୍ତର ଏବଂ ଆମେରିକାରେ ଜାରି ହୋଇଥିବା ଡେବିଟ୍ କିମ୍ବା କ୍ରେଡିଟ୍ କାର୍ଡ ଦ୍ୱାରା କରାଯାଇଥିବା ପେମେଣ୍ଟ ଉପରେ ଲାଗୁ ହେବ ନାହିଁ। ଅର୍ଥାତ୍, ଅଧିକାଂଶ ଦୈନିକ ରିମିଟାନ୍ସ ଏହି ଟିକସ ପରିସର ବାହାରେ ରହିବ।

ନୂତନ ବିଲ୍ ଅଣାଯିବା ଖବର ଆମେରିକାରେ ରହୁଥିବା ଭାରତୀୟମାନଙ୍କୁ ଚିନ୍ତିତ କରିଦେଇଥିଲା, କାରଣ ସେମାନଙ୍କ ପରିବାରକୁ ସାହାଯ୍ୟ କରିବା କିମ୍ବା ନିବେଶ ପାଇଁ ଭାରତକୁ ଟଙ୍କା ପଠାଇବା ଏକ ସାଧାରଣ କଥା।

୨୦୨୩ ତଥ୍ୟ ଅନୁଯାୟୀ, ୨୯ ଲକ୍ଷରୁ ଅଧିକ ଭାରତୀୟ ଆମେରିକାରେ ବାସ କରନ୍ତି, ଯାହା ସେଠାକାର ଦ୍ୱିତୀୟ ସର୍ବାଧିକ ବିଦେଶୀ ଜନସଂଖ୍ୟା। ଭାରତୀୟ ରିଜର୍ଭ ବ୍ୟାଙ୍କ ଅନୁଯାୟୀ, ୨୦୨୪ ମସିହାରେ ଆମେରିକାରୁ ଭାରତକୁ ପ୍ରାୟ ୩୨ ବିଲିୟନ ଡଲାର (ମୋଟ ରେମିଟେନ୍ସର ପ୍ରାୟ ୨୭.୭%) ପଠାଯାଇଥିଲା। ଏପରି ପରିସ୍ଥିତିରେ, ଟିକସ ବୃଦ୍ଧି ଯୋଗୁ ପ୍ରବାସୀ ଭାରତୀୟମାନେ କ୍ଷତିଗ୍ରସ୍ତ ହେବାର ଆଶଙ୍କା ଥିଲା। 

ଏହି ବିଲ୍ ଅନୁଯାୟୀ, ଏହି ଟିକସ କେବଳ ଅଣ-ନାଗରିକମାନଙ୍କ ଉପରେ ଲାଗୁ ହେବ, ଯେପରିକି ଉଚ୍ଚ କୁଶଳୀ ବୃତ୍ତିଗତ, ଛାତ୍ରଛାତ୍ରୀ ଏବଂ ଗ୍ରୀନ୍ କାର୍ଡ ଧାରକ। ଯଦି ଛାତ୍ରଛାତ୍ରୀମାନେ ସ୍ନାତକ ପରେ ଅଂଶକାଳୀନ ଚାକିରି କିମ୍ବା ଇଣ୍ଟର୍ନସିପ୍ ରୁ ଅର୍ଜିତ ଟଙ୍କା ଭାରତକୁ ପଠାଇଥାନ୍ତି। ତେବେ ତାହା ଉପରେ ମଧ୍ୟ ଟିକସ ଲାଗୁ ହୋଇପାରେ। ଏହି ଟିକସ ଏନଆରଇ ଆକାଉଣ୍ଟରେ ଜମା, ରିଅଲ୍ ଇଷ୍ଟେଟ୍ କ୍ରୟ କିମ୍ବା କର୍ପୋରେଟ୍ ଗତିଶୀଳତା କାର୍ଯ୍ୟକ୍ରମକୁ ମଧ୍ୟ ପ୍ରଭାବିତ କରିପାରେ।

ଯଦିଓ ୧% ଟିକସ ଟଙ୍କା ପଠାଇବାର ଖର୍ଚ୍ଚ ହ୍ରାସ କରିବ, କିଛି ଲୋକ ଏବେ ବି କମ୍ ଟଙ୍କା ପଠାଇପାରନ୍ତି, ବିଶେଷକରି ଯେଉଁମାନେ ନିୟମିତ ଭାବରେ ଭାରତରେ ନିଜ ପରିବାରକୁ ସାହାଯ୍ୟ କରନ୍ତି କିମ୍ବା ସମ୍ପତ୍ତି ଏବଂ ନିବେଶ ପାଇଁ ଟଙ୍କା ପଠାନ୍ତି। ତଥାପି, ବ୍ୟାଙ୍କ ସ୍ଥାନାନ୍ତର ଏବଂ କାର୍ଡ ପେମେଣ୍ଟ ଉପରେ କୌଣସି ଟିକସ ନଥିବାରୁ ଅଧିକାଂଶ ଲୋକ ଆଶ୍ୱସ୍ତି ପାଇବେ।

ଅଧିକ ପଢ଼ନ୍ତୁ: ଆରବ ସାଗରର ୩ ହଜାର ଫୁଟ ଉପରେ ୩୦୦ ଯାତ୍ରୀ ଆତଙ୍କିତ: ମୁମ୍ବାଇ ଆସୁଥିବା ଡ୍ରିମଲାଇନରରେ ତ୍ରୁଟି

ଏହି ଟିକସ ୩୧ ଡିସେମ୍ବର ୨୦୨୫ ରୁ ଲାଗୁ ହେବ। ସେତେବେଳକୁ, ପ୍ରବାସୀ ଭାରତୀୟମାନେ ସେମାନଙ୍କର ଆର୍ଥିକ ଯୋଜନା ସମୀକ୍ଷା କରିବା ପାଇଁ ସମୟ ପାଇବେ। ସାମଗ୍ରିକ ଭାବରେ, ଟିକସ ହ୍ରାସ ଯୋଗୁ ଆମେରିକାରୁ ଭାରତକୁ ଟଙ୍କା ପଠାଇବା ଏବେ ପୂର୍ବ ଅପେକ୍ଷା ସହଜ ଏବଂ ଶସ୍ତା ହେବ।

ଅଧିକ ପଢ଼ନ୍ତୁ: ଗାଈକୁ ଆକ୍ରମଣ କରିଥିବାରୁ ବାଘୁଣୀ ପରିବାରକୁ ବିଷ ଦେଇ ହତ୍ୟା କଲେ ଚାଷୀ

USA | India