ଭାରତ-ନେପାଳ ସୀମାରୁ ଦୂରେଇ ରୁହ: ନାଗରିକଙ୍କୁ କଡ଼ା ଚେତାବନୀ ଦେଲା ଚୀନ୍

କାଠମାଣ୍ଡୁ: ଭାରତ-ନେପାଳ ସୀମାବର୍ତ୍ତୀ ଅଞ୍ଚଳକୁ ନଯିବା ପାଇଁ ଚୀନ୍ ନିଜର ନାଗରିକମାନଙ୍କୁ ସତର୍କ କରାଇ ଦେଇଛି। ନେପାଳରେ ଥିବା ଚୀନ୍ ଦୂତାବାସ ନିଜର ନାଗରିକମାନଙ୍କ ପାଇଁ ଏ ସମ୍ପର୍କରେ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଜାରି କରିଛି। ସାମ୍ପ୍ରତିକ ସମୟରେ, ଭାରତୀୟ ସୀମା ସୁରକ୍ଷା ବାହିନୀ ନେପାଳ-ଭାରତ ସୀମାରେ ଅନେକ ଚୀନ୍ ନାଗରିକଙ୍କୁ ଗିରଫ କରିଛନ୍ତି।

ଏହାକୁ ଧ୍ୟାନରେ ରଖି, କାଠମାଣ୍ଡୁରେ ଥିବା ଚୀନ୍ ଦୂତାବାସ ନିଜର ଲୋକମାନଙ୍କୁ ନେପାଳ ଏବଂ ଭାରତ ସୀମାରୁ ଦୂରରେ ରହିବାକୁ ଅନୁରୋଧ କରିଛି। ବିନା ଅନୁମତିରେ ଭାରତୀୟ ସୀମାରେ ପ୍ରବେଶ କରିବା ସମସ୍ୟା ଏଡାଇବା ପାଇଁ ଚୀନ୍ ନାଗରିକମାନଙ୍କୁ ସତର୍କ ରହିବାକୁ କହିଛି।

ଗଣମାଧ୍ୟମ ରିପୋର୍ଟ ଅନୁସାରେ, ନେପାଳରେ ଥିବା ଚୀନ୍ ଦୂତାବାସ ନିଜର ନାଗରିକମାନଙ୍କୁ ଏକ ବାର୍ତ୍ତା ଜାରି କରି କହିଛି ଯେ, ନେପାଳ-ଭାରତ ସୀମାର ସୀମା ନିର୍ଦ୍ଧାରଣ ସମ୍ପୂର୍ଣ୍ଣ ସ୍ପଷ୍ଟ ନୁହେଁ। ତେଣୁ, ଲୋକମାନେ ଅଜାଣତରେ ନେପାଳରୁ ଭାରତୀୟ ଅଞ୍ଚଳରେ ପ୍ରବେଶ କରିବାର ଆଶଙ୍କା ରହିଛି।  

ଯଦି ସେମାନେ ବିନା ଅନୁମତିରେ ଭାରତୀୟ ସୀମାରେ ପ୍ରବେଶ କରନ୍ତି, ତେବେ ସେମାନଙ୍କୁ ଗିରଫ କରାଯାଇପାରିବ ଏବଂ ପରବର୍ତ୍ତୀ ସମୟରେ କଠୋର ଆଇନଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହେବାକୁ ପଡ଼ିପାରେ।

ଚୀନ୍ ନାଗରିକଙ୍କ ଗିରଫଦାରୀ ଖବର ପରେ, ଦୂତାବାସ ଶୁକ୍ରବାର ପୁଣି ଥରେ ୱିଇ ଚାଟ୍ ସୋସିଆଲ ମିଡିଆରେ ଲୋକମାନଙ୍କୁ ନେପାଳ-ଭାରତ ସୀମାନ୍ତ ଅଞ୍ଚଳକୁ ନ ଯିବାକୁ ଚେତାବନୀ ଦେଇଛି। ଦୂତାବାସ ଚେତାବନୀ ଦେଇଛନ୍ତି ଯେ, ଭାରତୀୟ ଅଞ୍ଚଳରେ ପ୍ରବେଶ କଲେ ଗିରଫ ଏବଂ ଆଇନଗତ କାର୍ଯ୍ୟାନୁଷ୍ଠାନ ହୋଇପାରେ। ଏଥିରେ ଜାମିନ ପାଇବା କଷ୍ଟକର ଏବଂ ଅଭିଯୁକ୍ତଙ୍କୁ ଜରିମାନା ସହିତ ୨ ରୁ ୮ ବର୍ଷ ଜେଲ ଦଣ୍ଡ ହୋଇପାରେ।

ଅଧିକ ପଢ଼ନ୍ତୁ: ୨୧ ଦିନରେ ୧୧ ଥର ଯୁଦ୍ଧବିରତିର ଶ୍ରେୟ ନେଇଛନ୍ତି ଟ୍ରମ୍ପ୍: ପ୍ରଧାନମନ୍ତ୍ରୀ ଚୁପ୍ କାହିଁକି ବୋଲି କଂଗ୍ରେସର ପ୍ରଶ୍ନ

ନେପାଳ ଏବଂ ଭାରତର ସୁରକ୍ଷା ଏଜେନ୍ସିଗୁଡ଼ିକ ସମ୍ପ୍ରତି ନେପାଳ-ଭାରତ ସୀମାରେ କଡ଼ା ନଜର ରଖିବା ସହିତ ପାଟ୍ରୋଲିଂକୁ ଜୋରଦାର କରିଛନ୍ତି। ଏହା ଚୀନ୍‌ର ଚିନ୍ତାକୁ ଆହୁରି ବଢ଼ାଇ ଦେଇଛି। ଚୀନ୍ ଦୂତାବାସ ପୂର୍ବରୁ ନିଜର ନାଗରିକମାନଙ୍କୁ ସୀମାବର୍ତ୍ତୀ ଅଞ୍ଚଳରୁ ଦୂରେଇ ରହିବାକୁ ପରାମର୍ଶ ଦେଇଥିଲା। କିନ୍ତୁ କିଛି ଚୀନ୍ ନାଗରିକ ଏହି ଚେତାବନୀକୁ ଅଣଦେଖା କରି ଭାରତୀୟ ସୀମାରେ ପ୍ରବେଶ କରିଥିଲେ। ଯାହା ପରେ ତାଙ୍କୁ ଭାରତୀୟ ସୁରକ୍ଷା ବାହିନୀ ହେପାଜତକୁ ନେଇଥିଲେ।

ଏହାକୁ ଦୃଷ୍ଟିରେ ରଖି, ଚୀନ୍ ଏବେ ନିଜ ନାଗରିକମାନଙ୍କ ପ୍ରତି ଗମ୍ଭୀର ହୋଇଯାଇଛି ଏବଂ ତୁରନ୍ତ ସେମାନଙ୍କୁ ଭାରତ-ନେପାଳ ସୀମାରୁ ଦୂରେଇ ରହିବାକୁ ନିର୍ଦ୍ଦେଶ ଜାରି କରିଛି।

ଅଧିକ ପଢ଼ନ୍ତୁ: ମୋତେ ପାରିଶ୍ରମିକ ଦେଇପାରିଲେନି ସନ୍ଦୀପ; ନିର୍ଦ୍ଦେଶକଙ୍କ ସହ ବିବାଦକୁ ନେଇ ଦୀପିକାଙ୍କ ପ୍ରତିକ୍ରିୟା

India | Nepal | China