ନୂଆଦିଲ୍ଲୀ: ଆଇପିଏଲ୍‌ର ତ୍ରୟୋଦଶ ସଂସ୍କରଣକୁ ୟୁଏଇରେ ଆୟୋଜନ କରିବା ଲାଗି ବିସିସିଆଇକୁ ସୋମବାର କେନ୍ଦ୍ରସରକାରଙ୍କ ଆନୁଷ୍ଠାନିକ ଅନୁମତି ମିଳିଛି। ଆଇପିଏଲ୍ ମୁଖ୍ୟ ବ୍ରିଜେଶ ପଟେଲ ଆଜି ଏହି ଘୋଷଣା କରିଛନ୍ତି। ସେହିଭଳି ଆସନ୍ତା ୧୮ ତାରିଖ ସୁଦ୍ଧା ପ୍ରତିଯୋଗିତାର ନୂଆ ପ୍ରାୟୋଜକଙ୍କ ନାଁ ଘୋଷଣା କରାଯିବ ବୋଲି ସେ ସୂଚନା ଦେଇଛନ୍ତି। ନୂଆ ପ୍ରାୟୋଜକ ଦୌଡ଼ରେ ସାମିଲ ହେବାକୁ ଥିବା କଂପାନିଗୁଡ଼ିକୁ ନିଜ ନିଜର ବିଡ୍ ଦାଖଲ କରିବା ଲାଗି ୪ରୁ ୭ ଦିନର ସମୟ ମିଳିବ ବୋଲି ବ୍ରିଜେଶ କହିଛନ୍ତି। ଗତ ସପ୍ତାହରେ କେନ୍ଦ୍ର ସରକାର ନୀତିଗତ ଭାବେ ୟୁଏଇରେ ଆଇପିଏଲ୍‌ ଆୟୋଜନକୁ ଅନୁମତି ଦେଇଥିଲେ। ତେବେ ଏଥିଲାଗି ଆନୁଷ୍ଠାନିକ ଅନୁମତି ପତ୍ର ଦେଇ ନଥିଲେ। ସୋମବାର ଏଥିନେଇ ଆବଶ୍ୟକ ସମସ୍ତ ଲିଖିତ ଅନୁମତି ପତ୍ର ସରକାରଙ୍କ ବିଭିନ୍ନ ବିଭାଗ ବିସିସିଆଇକୁ ପଠାଇ ଦେଇଥିବା ଜଣାପଡ଼ିଛି।

Advertisment

ଉଭୟ ସୌରାଷ୍ଟ୍ର ଓ ବୈଦେଶିକ ବ୍ୟାପାର ମନ୍ତ୍ରାଳୟ ଅନୁମତି ଦେଇ ସାରିଛନ୍ତି ଏବଂ ଏହି ବିଷୟ ଏମିରେଟ୍ସ କ୍ରିକେଟ୍ ବୋର୍ଡକୁ ମଧ୍ୟ ଜଣାଇ ଦିଆଯାଇଥିବା ବ୍ରିଜେଶ ଘୋଷଣା କରିଛନ୍ତି। ସୂଚନାଯୋଗ୍ୟ ଯେ ଗତ ଦୁଇ ବର୍ଷ ହେବ ଚୀନ ମୋବାଇଲ କଂପାନି ‘ଭିଭୋ’ ଆଇପିଏଲ୍‌ର ମୁଖ୍ୟ ପ୍ରାୟୋଜକ ଥିଲା। ତେବେ ଲଦାଖ ସୀମାରେ ୨୦ ଜଣ ଭାରତୀୟ ବୀର ସୈନିକ ସହିଦ ହେବା ପରେ ଦେଶସାରା ଚୀନ ବିରୋଧୀ ଲହର ଜୋର ଧରିଥିଲା ବେଳେ ଏହାକୁ ଆଖି ଆଗରେ ରଖି ‘ଭିଭୋ’ ଶେଷ ମୁହୂର୍ତରେ ପ୍ରାୟୋଜକ ପଦରୁ ଓହରି ଯାଇଥିଲା। ଫଳରେ ବିସିସିଆଇ ଏବେ ନୂ୍ଆ ପ୍ରାୟୋଜକ ସନ୍ଧାନରେ ରହିଛି। ବିସିସିଆଇ ମଧ୍ୟ ସୋମବାର ମୁଖ୍ୟ ପ୍ରାୟୋଜକ ଲାଗି ନୂଆ ବିଡ୍ ଆହ୍ବାନ କରିଛି। ଏହି ଦୌଡ଼ରେ ସାମିଲ ହେବାକୁ ଥିବା କଂପାନିର ବାର୍ଷିକ ରାଜସ୍ବ ୩୦୦ କୋଟି ଟଙ୍କାରୁ କମ୍ ହୋଇ ନଥିବ ଏବଂ ଚୁକ୍ତି ଅବଧି ଚଳିତ ବର୍ଷ ଡିସେମ୍ବର ମାସ ୩୧ ତାରିଖ ପର୍ଯ୍ୟନ୍ତ ରହିବ ବୋଲି ଏଥିରେ କୁହାଯାଇଛି।

ନୂଆଦିଲ୍ଲୀ: ଅଷ୍ଟ୍ରେଲୀୟ ଦ୍ରୁତ ବୋଲର ମିଚେଲ ଷ୍ଟାର୍କଙ୍କ ଆଇପିଏଲ୍‌-୨୦୧୮ ବୀମା ରାଶି ଦାବିର ଆପୋଷ ସମାଧାନ ହୋଇଯାଇଛି। ଷ୍ଟାର୍କଙ୍କୁ କୋଲକାତା ନାଇଟ୍ ରାଇଡର୍ସ (କେକେଆର) ୯.୪ କୋଟିରେ କଣିଥିଲା। ସେ କିନ୍ତୁ ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ୍ ମ୍ୟାଚ୍‌ ବେଳେ ଆହତ ‌ହେବାରୁ ୨୦୧୮ ମସିହା ଆଇପିଏଲ୍‌ ଋତୁରେ ଗୋଟିଏ ବି ମ୍ୟାଚ୍‌ ଖେଳିପାରିନଥିଲେ। ଏହି କାରଣରୁ ଷ୍ଟାର୍କ ନିଜ ବୀମା କମ୍ପାନିଠାରୁ ୮.୨୦ କୋଟି ଦାବି କରିଥିଲେ। କିନ୍ତୁ ନିଜ ଆାହତ ସମସ୍ୟାର ପ୍ରମାଣ ଦେବାକୁ ନେଇ ଦୁଇ ପକ୍ଷ ଟଣା ଓଟରା ହେବା ପରେ ଶେଷରେ ଏହାକୁ ଅପୋଷ ମାଧ୍ୟମରେ ସମାଧାନ କରିଦିଆଯାଇଛି।

ଷ୍ଟାର୍କଙ୍କ ବୀମା ମାମଲାର ଆପୋସ ସମାଧାନ, ବାତିଲ ହେବ ୨୦୨୧ ଖେଳାଳି ନିଲାମ

ନୂଆଦିଲ୍ଲୀ: ଚଳିତ ବର୍ଷର ଆଇପିଏଲ୍‌ ପାଖାପାଖି ୬ ମାସ ବିଳମ୍ବରେ ଖେଳାଯିବାକୁ ଥିବାବେଳେ ଆସନ୍ତାବର୍ଷର ସଂସ୍କରଣ ପୂର୍ବରୁ ହେବାକୁ ଥିବା ଖେଳାଳି ନିଲାମ ପ୍ରକ୍ରିୟାକୁ ନ କରିବା ସପକ୍ଷରେ ରହିଛି ବିସିସିଆଇ। ଚଳିତ ବର୍ଷର ବିଳମ୍ବ, ଆବଶ୍ୟକ ଯୋଜନା ଲାଗି ସମୟର ଆଭାବ ଏବଂ କିଛି ଆର୍ଥିକ କାରଣରୁ ଏହାକୁ ଏଡ଼ାଇଯିବା ଯୋଜନା ପ୍ରସ୍ତୁତ ହେଉଛି। କାରଣ ଚଳିତ ବର୍ଷର ଆଇପିଏଲ୍‌ ନଭେମ୍ବର ୧୦ ତାରିଖରେ ଶେଷ ହେବା ପରେ ଏହାର ସାଢ଼େ ୪ ମାସ ପରେ ୨୦୨୧ ମସିହାର ସଂସ୍କରଣ ଖେଳାଯିବାର ଯୋଜନା ରହିଛି। ବୋର୍ଡ ସହ ଏକମତ ହୋଇ ଫ୍ରାଞ୍ଚାଇଜ୍‌ଗୁଡିକ ମଧ୍ୟ ସମାନ ଚିନ୍ତାରେ ରହିଛନ୍ତି। ନିଲାମ ନ କରାଇବା ପାଇଁ ସମୟ ଓ ସୁବିଧାର ୪ଟି କାରଣ ମଧ୍ୟ ଦର୍ଶାଯାଇଛି। ନିଲାମ ପାଣ୍ଠିର ପୁନର୍ଗଠନ (ବର୍ତମାନ ଏହା ୮୫ କୋଟି ରହିଛି), ଭାରତୀୟ ଏବଂ ବିଦେଶୀ ଖେଳାଳିଙ୍କୁ ନେଇ ମିଳିତ ନିଲାମି ତାଲିକା ପ୍ରସ୍ତୁତି, ନିଲାମିରେ ସାମିଲ ହେବାକୁ ଦଳଗୁଡିକ ଅନ୍ୟନ ୪/୬ ମାସ ନେଇଥାନ୍ତି, ନୂଆ ଖେଳାଳିଙ୍କୁ ନେବା ପରେ ଫ୍ରାଞ୍ଚାଇଜ୍‌ଗୁଡିକ ବ୍ରାଣ୍ଡିଂକୁ ପୁନଃପ୍ରଚଳନ କରିଥାନ୍ତି। ଏସବୁ କରାଇବା ଲାଗି ଯଥେଷ୍ଟ ସମୟ ନାହିଁ। ତେଣୁ କେବଳ ଖେଳାଳିଙ୍କ ଆହତ ସମସ୍ୟା ଏବଂ ଉପଲବ୍‌ଧ ସ୍ଥିତିକୁ ନେଇ ଅଦଳବଦଳ କରି ଚତୁଃର୍ଦଶ ସଂସ୍କରଣ ଶେଷ କରାଯିବ ବୋଲି ଗୋଟିଏ ସୂତ୍ରରୁ ସୂଚନା ମିଳିଛି। କୋଲକାତା ନାଇଟ୍‌ ରାଇଡର୍ସ ସହମାଲିକ ସାହରୁଖ ଖାନ୍‌ଙ୍କ ସହ ଅନ୍ୟ ମାଲିକମା‌ନେ ଏଥି ସହ ସହମତ ଥିଲେ ମଧ୍ୟ ଏଥି ପାଇଁ ଚୁକ୍ତିବଦ୍ଧ ହେବାକୁ ପଡ଼ିବ ବୋଲି ଜଣାପଡିଛି।

ଆଇପିଏଲ୍‌-୨୦୨୧ ପୂର୍ବରୁ ଇଂଲଣ୍ଡ ଦଳ ଭାରତ ଗସ୍ତରେ ଆସି ଏକ ପୂର୍ଣ୍ଣକାଳୀନ ଶୃଙ୍ଖଳାରେ ଟେଷ୍ଟ, ଦିନିକିଆ ଓ ଟି-୨୦ ଖେଳିବ। କିନ୍ତୁ ଏଥି ପାଇଁ ବିସିସିଆଇକୁ ୪୦/୪୫ ଦିନରୁ ଅଧିକ ମିଳିବା ସମ୍ଭାବନା କମ୍‌। କାରଣ ସଙ୍ଗରୋଧ ନିୟମକୁ ମାନି ସବୁକିଛି ପ୍ରସ୍ତୁତ କରିବାକୁ ପଡିବ। ଏଭଳି କ୍ଷେତ୍ରରେ ଟେଷ୍ଟ୍ ସଂଖ୍ୟା ହ୍ରାସ କରିବା ଯୋଜନା ମଧ୍ୟ ରହିଛି। ସେହିଭଳି ଆଇପିଏଲ୍‌ ପରେ ଭାରତୀୟ ଦଳ ଶ୍ରୀଲଙ୍କା ଗସ୍ତ କରିବା କାର୍ଯ୍ୟକ୍ରମ ରହିଛି। ଏହା ପରେ ଏସିଆ କପ୍‌ ଏବଂ ଅକ୍ଟୋବର-ନଭେମ୍ବରରେ ଆଇସିସି ଟି-୨୦ ବିଶ୍ବକପ୍‌ ମଧ୍ୟ ଭାରତରେ ଖେଳାଯିବ। ସବୁ ଦୃଷ୍ଟିକୋଣରୁ ଆଇପିଏଲ୍‌-୧୪କୁ ଆଗୁଆ କରାଇବା ନେଇ ବିସିସିଆଇ ମଧ୍ୟ ଏବେଠାରୁ ଯୋଜନା କରିବାରେ ଲାଗିଛି।