BJD-BJP clash: ବିଜେଡି-ବିଜେପିରେ ଛକାପଞ୍ଝା: ରାଜ୍ୟସଭା ଉତ୍କଣ୍ଠା ବଢ଼ୁଛି, ବିଜେପି ୩ ଆସନ ହାତେଇବା ସମ୍ଭାବନା

ଭୁବନେଶ୍ବର: ରାଜ୍ୟସଭା ନିର୍ବାଚନକୁ ନେଇ ରାଜ୍ୟ ରାଜନୀତି ଉଠୁଛି ପଡ଼ୁଛି। ସଂଖ୍ୟା ଗଣିତରେ ବିଜେପି ଦୁଇଟି ଓ ବିଜେଡି ଗୋଟିଏ ଆସନରେ ନିଶ୍ଚିତ ଜିତିବେ। ଚତୁର୍ଥ ଆସନ ପାଇଁ ଚର୍ଚ୍ଚା ଜୋର୍‌ଦାର ଚାଲିଥିଲେ ବି ବିଜେପି ଏହି ଆସନଟି ହାତେଇବାର ସମ୍ଭାବନା ସର୍ବାଧିକ ରହିଛି। ତେବେ ସମ୍ଭାବ୍ୟ ପ୍ରାର୍ଥୀଙ୍କୁ ନେଇ ଦୁଇ ଦଳ ବିଜେପି ଓ ବିଜେଡିର ଆଭ୍ୟନ୍ତରୀଣ ରାଜନୀତି ଚଳଚଞ୍ଚଳ ହୋଇଛି। ଆଶାୟୀଙ୍କ ତାଲିକା ଲମ୍ବା ଥିବାରୁ ପ୍ରାର୍ଥୀ ବାଛିବା ସହଜ ନୁହେଁ। ବିଜେପି ଆଶାୟୀଙ୍କ ନଜର ନୂଆଦିଲ୍ଲୀ ଉପରେ ଥିଲା ବେଳେ ବିଜେଡି ନେତାଙ୍କ ନଜର ନବୀନ ନିବାସ ଉପରେ। ନାମାଙ୍କନ ପତ୍ର ଦାଖଲର ଶେଷ ତାରିଖ ମାର୍ଚ୍ଚ ୫। ତାହା ଭିତରେ ଚାରି ଦିନ ଛୁଟି ଥିବାରୁ ନାମାଙ୍କନ ପତ୍ର ଦାଖଲ ପାଇଁ କେବଳ ଦୁଇ ଦିନ(ମାର୍ଚ୍ଚ ୨ ଓ ୫) ସମୟ ଅଛି। 

ବିଜେପି ଶାସକ ଦଳରେ ଥିବାରୁ ଏଥିରୁ କିଏ ରାଜ୍ୟସଭାକୁ ଯିବେ, ତାହାକୁ ନେଇ ସର୍ବାଧିକ ଚର୍ଚ୍ଚା। ଦୁଇଟି ଆସନରେ ବିଜେପି ଜିତିବାରେ କିଛି ସମସ୍ୟା ନାହିଁ। କିନ୍ତୁ ତୃତୀୟ ଆସନଟି ବି ବିଜେପି ସପକ୍ଷରେ ଯିବାର ସମ୍ଭାବନା ଅଧିକ ଥିବାରୁ ଆଶାୟୀଙ୍କ ସଂଖ୍ୟା ବଢ଼ିଚାଲିଛି। ସୁଜିତ କୁମାର ଓ ମମତା ମହନ୍ତ ବିଜେଡିର ରାଜ୍ୟସଭା ସଦସ୍ୟ ଥିଲା ବେଳେ ଇସ୍ତଫା ଦେଇ ପୁନର୍ବାର ବିଜେପି ପ୍ରାର୍ଥୀ ଭାବେ ଜିତିଥିଲେ। ଉଭୟଙ୍କର କାର୍ଯ୍ୟକାଳ ଏବେ ଶେଷ ହେଉଛି।  ବିଜେପିର ଆଭ୍ୟନ୍ତରୀଣ ମହଲର ସୂଚନା ଅନୁଯାୟୀ ସୁଜିତ କୁମାରଙ୍କୁ ଆଉ ଥରେ ଦଳ ପ୍ରାର୍ଥୀ କରିପାରେ। ବିଜେପିର କେନ୍ଦ୍ରୀୟ ନେତୃତ୍ବ ମଧ୍ୟ ଏ ନେଇ ପରୋକ୍ଷରେ ଇଙ୍ଗିତ ଦେଇଥିବା ବହୁ ନେତା ଖୋଲାଖୋଲି କହୁଛନ୍ତି। ବିଜେପି ରାଜ୍ୟ ସଭାପତି ମନମୋହନ ସାମଲ, ପୂର୍ବତନ ସଭାପତି ବସନ୍ତ ପଣ୍ଡା ଓ ସମୀର ମହାନ୍ତିଙ୍କ ନାମ ଚର୍ଚ୍ଚାର ଆଗରେ ରହିଛି। ବସନ୍ତ ପଣ୍ଡାଙ୍କ ପୁଅଙ୍କୁ ବିଜେପି ନୂଆପଡ଼ାରେ ଟିକେଟ ଦେଇ ନଥିବାରୁ ତାଙ୍କୁ ରାଜ୍ୟସଭା ପଠାଇବାକୁ ପ୍ରତିଶ୍ରୁତି ଦେଇଥିବା କୁହାଯାଉଛି। ଅବଶ୍ୟ ଶ୍ରୀ ପଣ୍ଡା ଏ ସମ୍ପର୍କରେ ନିଜେ ମୁହଁ ଖୋଲିନାହାନ୍ତି। ରାଜ୍ୟ ବାହାରୁ ଜଣେ ଦଳୀୟ ନେତାଙ୍କୁ ପ୍ରାର୍ଥୀ କରାଯିବା ନେଇ ଦଳ ଭିତରେ ଆଲୋଚନା ଚାଲିଛି। ନିକଟରେ ଦଳର କୋର୍ କମିଟି ବୈଠକ ବସିଥିଲା। ଏହି ବୈଠକରେ ରାଜ୍ୟସଭା ପ୍ରାର୍ଥୀଙ୍କ ଉପରେ ଆଲୋଚନା ହେବ ବୋଲି ସମସ୍ତେ ଆକଳନ କରୁଥିଲେ। କିନ୍ତୁ ସେପରି କିଛି ହୋଇ ନଥିଲା। ରାଜ୍ୟସଭା ପ୍ରସଙ୍ଗ ହିଁ ସେଥିରେ ଉଠି ନଥିଲା। ବିଜେପିର ପ୍ରାର୍ଥିତ୍ବ ସମ୍ପର୍କରେ ଓଡ଼ିଶା ନେତୃତ୍ବ ନିଷ୍ପତ୍ତି ନେବାର କୌଣସି ଅବକାଶ ନାହିଁ। ଏହି ନିଷ୍ପତ୍ତି ସମ୍ପୂର୍ଣ୍ଣ ଭାବେ କେନ୍ଦ୍ରୀୟ ନେତୃତ୍ବ ହିଁ ନେବେ।