ମହିଳା ସଶକ୍ତିକରଣ ଏବଂ ଆର୍ଥିକ ସ୍ୱାବଲମ୍ବନର ଆଲୋକବର୍ତ୍ତିକା ସାଜିଛନ୍ତି କୋଟିଆ ମହିଳା

କୋରାପୁଟ: କୋରାପୁଟ ଜିଲ୍ଲାର କୋଟିଆ ପଞ୍ଚାୟତର ଏକ ଛୋଟ ଗାଁ ମାତଲାମ୍ବା । ଯାହା ଓଡ଼ିଶାର ସର୍ବୋଚ୍ଚ ଶିଖର ଦେଓମାଳର ପାଦଦେଶରେ ଅବସ୍ଥିତ। ମହିଳା ସଶକ୍ତିକରଣ ଏବଂ ଆର୍ଥିକ ସ୍ୱାବଲମ୍ବନର ଆଲୋକବର୍ତ୍ତିକା ଭାବରେ ଠିଆ ହୋଇଛି ଏହି ଗାଁ। ୧୧୦  ପରିବାର ବିଶିଷ୍ଟ ଏହି ଗାଁର ମହିଳାମାନେ ନିଜର ଏକ ମିନି ବ୍ୟାଙ୍କ ସୃଷ୍ଟି କରି ସ୍ଥିରତା ଏବଂ ସାମୂହିକ ଶକ୍ତିର ଏକ ସଫଳତାର କାହାଣୀ ଲେଖିଛନ୍ତି, ଯାହା ଗତ ୧୦ ବର୍ଷ ଧରି ଜାରି ରହିଛି।

ଗାଁର ପ୍ରତ୍ୟେକ ମହିଳା ନିଜ ରୋଜଗାରରୁ ପ୍ରତି ମାସରେ ଅତି କମରେ ୧୦ ଟଙ୍କା ଯୋଗଦାନ କରି ସେମାନଙ୍କର ସ୍ୱାବଲମ୍ବୀ ମହିଳା ଗୋଷ୍ଠୀ ‘ନାରୀ ସମାଜ’ ଗଠନ କରିଛନ୍ତି। ବର୍ତ୍ତମାନ ସେମାାନେ ୭୦,୦୦୦ ଟଙ୍କା ଜମା କରିପାଇଛନ୍ତି। ଏହି ପାଣ୍ଠି ମହିଳାମାନଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଆର୍ଥିକ ଜୀବନରେଖା ଭାବରେ କାର୍ଯ୍ୟ କରୁଛି।  

ଆବଶ୍ୟକ ଲୋକଙ୍କୁ ଋଣ ଏବଂ ଜରୁରୀକାଳୀନ ସହାୟତା ପ୍ରଦାନ କରୁଛି। ଏହା ସେମାନଙ୍କ କ୍ଷେତ ପାଇଁ ବିହନ ଏବଂ ସାର କିଣିବା, ପ୍ରିୟଜନଙ୍କ ପାଇଁ ହସ୍ପିଟାଲ ଖର୍ଚ୍ଚ ବହନ କରିବା, କିମ୍ବା ସେମାନଙ୍କ ପିଲାମାନଙ୍କ ପାଇଁ ସ୍କୁଲ ଏବଂ କଲେଜ ଶିକ୍ଷା ଫି ଦେବା କାର୍ଯ୍ୟ କରୁଛି।

ଏହି ଗୋଷ୍ଠୀ ପ୍ରତି ୧,୦୦୦ ଟଙ୍କା ଋଣ ପାଇଁ ମାସକୁ  ୫୦ ଟଙ୍କା ଏବଂ ବାର୍ଷିକ ସର୍ବାଧିକ   ୨୫୦ ଟଙ୍କା ପର୍ଯ୍ୟନ୍ତ ସୁଧ ହାର ରଖି ସମସ୍ତଙ୍କୁ ସହାୟତା କରୁଛନ୍ତି।  ଅଧିକାଂଶ ସଦସ୍ୟ ଫସଲ ଅମଳ କରିବା ପରେ କିମ୍ବା ଦୈନିକ ଶ୍ରମ ମାଧ୍ୟମରେ ମଜୁରୀ ଅର୍ଜନ କରିବା ପରେ ଚାରିରୁ ପାଞ୍ଚ ମାସ ମଧ୍ୟରେ ସେମାନଙ୍କର ଋଣ ପରିଶୋଧ କରନ୍ତି।

ଅଧିକ ପଢ଼ନ୍ତୁ: ୨୦ହଜାର ହେକ୍ଟରରେ ରବି ଧାନ: ଆରମ୍ଭ ହେଲା ରୁଆ

ପ୍ରାରମ୍ଭରେ, ଗାଁର ପୁରୁଷମାନେ ଏହି ପ୍ରକ୍ରିୟାର ସଫଳତାକୁ ନେଇ ସନ୍ଦିହାନ ଥିଲେ । ଏପରିକି ଜରୁରୀ ନଥିବା କାମ  ପାଇଁ ମଧ୍ୟ ମହିଳାଙ୍କୁ ଟଙ୍କା ମାଗୁଥିଲେ। ତେବେ  ମହିଳାମାନଙ୍କ ପ୍ରୟାସର ପ୍ରଭାବ ଦେଖି ସେମାନେ ସେମାନଙ୍କର ଦୃଷ୍ଟିକୋଣକୁ ସ୍ୱୀକାର କରିଥିଲେ ଏବଂ ସେମାନଙ୍କର ଆର୍ଥିକ ମିସନକୁ ସମର୍ଥନ କରିବା ଆରମ୍ଭ କରିଥିଲେ।

ସମ୍ଭାବ୍ୟ ଅସୁବିଧାକୁ ଦୂରେଇବା ପାଇଁ କୋରାପୁଟର ଏକତା ଅନୁଷ୍ଠାନ ଗତ ୨୦୧୫ରୁ ସହଯୋଗ କରି ଆସୁଛି ବୋଲି କହିଛନ୍ତି ଗାଁର ମହିଳା ।  ଏକତା ପକ୍ଷରୁ ମହିଳାମାନଙ୍କୁ ଜରୁରୀ ଆବଶ୍ୟକତା ପାଇଁ କିଛି ଅର୍ଥ ନିଜ ପାଖରେ ରଖିବା  ସହିତ ସେମାନଙ୍କର ପାଣ୍ଠିର ଏକ ବୃହତ ଅଂଶ ସୁରକ୍ଷିତ ଭାବରେ ଏକ ବ୍ୟାଙ୍କରେ ଜମା କରିବାରେ ମାର୍ଗଦର୍ଶନ କରିଛି। ମହିଳାମାନେ ଏକଜୁଟ ହେଲେ ସବୁ ସମ୍ଭବ ତାହା ପ୍ରମାଣିତ କରି ଜିଲ୍ଲାପାଇଁ ମାର୍ଗଦର୍ଶିକା ସାଜିଛନ୍ତି ଏହି ଗାଁର ମହିଳା।

ଅଧିକ ପଢ଼ନ୍ତୁ:  ଜାହାଜରୁ ମିଳିଲା ୩୩ କୋଟିର ନିଶାଦ୍ରବ୍ୟ, କୋଷ୍ଟଗାର୍ଡ ଓ ଡିଆରଆଇର ମିଳିତ ଅପରେସନ