ରାଜ୍ୟରେ ୨.୩୪ ନିୟୁତରୁ ଅଧିକ ପକ୍ଷୀ ଥିବା ରେକର୍ଡ: ଜଙ୍ଗଲ ମନ୍ତ୍ରୀ

ଭୁବନେଶ୍ୱର: ଜାନୁଆରି ୨୦୨୪-୨୫ର ପ୍ରଥମ ଦୁଇ ସପ୍ତାହ ମଧ୍ୟରେ ଓଡ଼ିଶା ବନ ବିଭାଗ ଦ୍ୱାରା କରାଯାଇଥିବା ବାର୍ଷିକ ପକ୍ଷୀ ଗଣନାରେ ରାଜ୍ୟର ବନ୍ୟ ଅଞ୍ଚଳ ଏବଂ ଆର୍ଦ୍ରଭୂମିରେ ମୋଟ ୨,୩୪୯,୮୯୫ ପକ୍ଷୀ ରେକର୍ଡ କରାଯାଇଛି।

ଏହା ପୂର୍ବ ବର୍ଷର ୨,୨୨୨,୮୧୮ ପକ୍ଷୀ ଗଣନା ତୁଳନାରେ ଏକ ଗୁରୁତ୍ୱପୂର୍ଣ୍ଣ ବୃଦ୍ଧି, ଯାହା ରାଜ୍ୟର ସମୃଦ୍ଧ ପକ୍ଷୀ ଜୈବ ବିବିଧତାକୁ ପ୍ରତିଫଳିତ କରୁଛି।

ମଙ୍ଗଳବାର ଦିନ ଓଡ଼ିଶା ବିଧାନସଭାରେ ଝାରସୁଗୁଡାର ବିଜେପି ବିଧାୟକ ଟଙ୍କଧର ତ୍ରିପାଠିଙ୍କ ଏକ ପ୍ରଶ୍ନର ଲିଖିତ ଉତ୍ତରରେ ଜଙ୍ଗଲ ମନ୍ତ୍ରୀ ଗଣେଶ ରାମ ସିଂହଖୁଣ୍ଟିଆ ଏହା ପ୍ରକାଶ କରିଛନ୍ତି।

ମନ୍ତ୍ରୀ ତାଙ୍କ ଉତ୍ତରରେ ଦେଇଥିବା ସୂଚନା ଅନୁଯାୟୀ, ଓଡ଼ିଶାରେ ତିନି ପ୍ରକାରର କୁମ୍ଭୀର ଅଛନ୍ତି, ସେଥିମଧ୍ୟରେ ଲୁଣିଆ କୁମ୍ଭୀର, ମଗର କୁମ୍ଭୀର ଏବଂ ଘଡ଼ିଆଳ କୁମ୍ଭୀର। କୁମ୍ଭୀରଙ୍କ ଗଣନା ତଥ୍ୟ ସ୍ଥିର ସଂଖ୍ୟା ଧାରା ଦର୍ଶାଉଛି, ୨୦୨୪-୨୫ ମସିହାରେ ଲୁଣିଆ କୁମ୍ଭୀରଙ୍କ ସଂଖ୍ୟା ୧୮୮୧ ଏବଂ ଘଡ଼ିଆଳ କୁମ୍ଭୀରଙ୍କ ସଂଖ୍ୟା ୧୬କୁ ବୃଦ୍ଧି ପାଇଛି।

କୁମ୍ଭୀର ଗଣନା ମୁଖ୍ୟାଂଶ:

ଲୁଣିଆ କୁମ୍ଭୀର: ୨୦୨୦-୨୧ ରେ ୧,୮୩୦ରୁ ୨୦୨୪-୨୫ରେ ୧,୮୮୧କୁ ବୃଦ୍ଧି ପାଇଛି।

ମଗର କୁମ୍ଭୀର: ୨୦୨୩-୨୪ ରେ ୨୫୭ ରୁ ୨୦୨୪-୨୫ରେ ସାମାନ୍ୟ ହ୍ରାସ ପାଇ ୨୨୧ରେ ପହଞ୍ଚିଛି।

ଘଡ଼ିଆଳ:  ୨୦୨୦-୨୧ ରେ 11 ରୁ ୨୦୨୪-୨୫ରେ ୧୬କୁ ବୃଦ୍ଧି ପାଇଛି।

ଗଣନାରେ ଖର୍ଚ୍ଚ:

ରାଜ୍ୟ ସରକାର ଗତ ପାଞ୍ଚ ବର୍ଷ ମଧ୍ୟରେ ଏହି ଗଣନା ପାଇଁ ଯଥେଷ୍ଟ ପାଣ୍ଠି ଆବଣ୍ଟନ କରିଛନ୍ତି।

ପକ୍ଷୀ ଗଣନା: ୨୦୨୪-୨୫ ମସିହାରେ ଖର୍ଚ୍ଚ ୯,୫୦,୦୦୦ ଟଙ୍କାକୁ ବୃଦ୍ଧି ପାଇଛି, ଯାହା ୨୦୨୦-୨୧ ମସିହାରେ ୮,୮୦,୦୦୦ ଟଙ୍କା ଥିଲା।

କୁମ୍ଭୀର ଗଣନା: ୨୦୨୪-୨୫ରେ ଖର୍ଚ୍ଚ ୪,୧୭,୩୩୫ଟଙ୍କା ଥିଲା, ଯାହା ୨୦୨୨-୨୩ ରେ ୬,୯୦,୫୬୦ ଟଙ୍କା ଥିଲା।

ଅଧିକ ପଢ଼ନ୍ତୁ:  ୧୦ ବର୍ଷରେ ହାତୀ ଆକ୍ରମଣରେ ରାଜ୍ୟରେ ୧,୨୦୯ ଜଣଙ୍କ ମୃତ୍ୟୁ

କୁମ୍ଭୀର ଗଣନା ପାଇଁ କୌଣସି ନିର୍ଦ୍ଦିଷ୍ଟ ସଂଗଠନ କିମ୍ବା ବ୍ୟକ୍ତିଙ୍କୁ ନିଯୁକ୍ତ କରାଯାଇ ନାହିଁ। ତଥାପି, ବାର୍ଷିକ ଶୀତକାଳୀନ ପକ୍ଷୀ ଗଣନାରେ ସ୍ଥାନୀୟ ବିଶ୍ୱବିଦ୍ୟାଳୟ ଏବଂ କଲେଜର ଛାତ୍ରଛାତ୍ରୀଙ୍କ ସହିତ ଏନଜିଓର ସଦସ୍ୟମାନେ ସକ୍ରିୟ ଅଂଶଗ୍ରହଣ କରନ୍ତି ବୋଲି ମନ୍ତ୍ରୀ କହିଛନ୍ତି।

ଅଧିକ ପଢ଼ନ୍ତୁ: ବିବାହର ମାତ୍ର ୩୪ଦିନ ପରେ ସ୍ବାମୀଙ୍କୁ ହରାଇଥିବା ମହିଳା ହେଲେ ସେନା ଅଧିକାରୀ