Government English spelling: ଇଂରାଜୀ ବନାନ ଶୁଦ୍ଧି କରିବେ ସରକାର: କଟକ, ବ୍ରହ୍ମପୁରର ନାମ ସଂଶୋଧନ ତାଲିକାରେ ନାହିଁ

ଭୁବନେଶ୍ବର: ସାଲେପୁରର ଇଂରାଜୀ ବନାନ ଆଉ Salipur ରହିବନି, ଏଣିକି ହେବ Salepur। ଆଳିର ଇଂରାଜୀ ବିକୃତ ବନାନ Aul ଲେଖିବାକୁ ପଡ଼ିବନି, Ali ହିଁ ଲେଖାଯିବ। ସେମିତି ଖୋରଧାର ଠିକ୍ ବନାନ ହେବ Khoradha, ବାଲେଶ୍ବରର ବନାନ ହେବ Baleshwar। ବର୍ଷ ବର୍ଷ ଧରି ରହି ଆସିଥିବା ଏହି ବିକୃତ ବନାନକୁ ସଂଶୋଧନ କରିବା ପାଇଁ ସରକାର ପ୍ରକ୍ରିୟା ଆରମ୍ଭ କରିଛନ୍ତି। ଏଥି ପାଇଁ ରାଜସ୍ବ ବିଭାଗ ପକ୍ଷରୁ ସର୍ବସାଧାରଣ ବିଜ୍ଞପ୍ତି ଜାରି କରାଯାଇଛି। ୧୧ଟି ଜିଲ୍ଲାର ୨୫ଟି ଜାଗା ନାମ ଇଂରାଜୀ ବନାନ ଠିକ୍ ଭାବେ ଲେଖିବା ପାଇଁ ତାଲିକା କରାଯାଇଛି। ଏହି ବିଜ୍ଞପ୍ତିରେ କୁହାଯାଇଛି ଯେ ଜାଗାଗୁଡ଼ିକର ମୌଳିକ ଓଡ଼ିଆ ନାମ ଇଂରାଜୀରେ ଠିକ୍ ଭାବେ ବନାନ ହେବାର ଆବଶ୍ୟକତା ରହିଛି। ଏହା ଦ୍ବାରା ସରକାରୀ ରେକର୍ଡରେ ରାଜ୍ୟର ଭାଷାଗତ, ଐତିହାସିକ ଓ ସାଂସ୍କୃତିକ ଐତିହ୍ୟ ଠିକ୍ ଭାବେ ପ୍ରତିଫଳିତ ହେବ। ଯଦି ପ୍ରସ୍ତାବିତ ସଂଶୋଧନ ତାଲିକା ଉପରେ ଲୋକଙ୍କର କିଛି ଆପତ୍ତି ଓ ପ୍ରସ୍ତାବ ଥିବ, ସେମାନେ ୧୫ ଦିନ ଭିତରେ ଜଣାଇପାରିବେ। 

ଓଡ଼ିଶାର ଜାଗାଗୁଡ଼ିକର ବିକୃତ ଇଂରାଜୀ ବନାନ ବର୍ଷ ବର୍ଷ ଧରି ରହି ଆସିଥିଲା। ଏମିତି ବନାନ ପଛର କିଛି ହିଁ ଯୁକ୍ତି ନଥିଲା। ପିଢ଼ି ପରେ ପିଢ଼ି ଏହି ଭୁଲ୍ ସହିତ ଅଭ୍ୟସ୍ତ ହୋଇ ଚାଲିଥିଲେ। ତେଣୁ ଏସବୁର ସଂଶୋଧନ ପାଇଁ ଲମ୍ବା ସମୟ ଧରି ଦାବି ହୋଇ ଆସୁଥିଲା। ‘ସମ୍ବାଦ’ରେ ଏ ସମ୍ପର୍କରେ ଲଗାତାର କିଛି ବର୍ଷ ହେଲା ଖବର ପ୍ରକାଶ ପାଇ ଆସୁଥିବାବେଳେ ସଚେତନ ନାଗରିକମାନେ ଏ ନେଇ ଉଦ୍‌ବେଗ ପ୍ରକାଶ କରୁଥିଲେ।