Poem Debt by Ajay Kumar Jena: ଅଜୟ କୁମାର ଜେନାଙ୍କ କବିତା ‘କରଜ’

କରଜ

ଅଜୟ କୁମାର ଜେନା 

ଧରୁ ଧରୁ ଅଗାଡ଼ି ହେଇଗଲା ଧାନ!

ସକାଳୁ ଶହେ ଦେବତାର ତିଳକ ପିନ୍ଧି ଯାଉ ଯାଉ
ପରୀକ୍ଷା ହଲରୁ ଫେରିଆସିଲା ପୁଅ
ବନ୍ଧା ଭିଟମାଟିର ଲୁହରେ ସଦ୍ୟ ହସହସ ବେଦୀରୁ
ଉଠିଗଲା ବର, ବାଡୁଅ ରହିଲା ଝିଅ
ମହାପ୍ରୁ, ଟିକେ ରୁହ ରୁହ!

ଗଲାକାଲି ଦୁଃଖର ପଣତରେ ଖୁଦ ବାନ୍ଧି
ଫେରିଲା ବାଟରେ ସୁଅ ମୁହଁରେ ଭାସିଗଲା ଅନ୍ଧ ମାଆ
ଆଜି ସକାଳୁ ଉଦ୍ଧାର ହେଲା ଶବ
ଛାତିରେ ତାର ସ୍ତନ କାମୁଡି ଓହଳି ରହିଥିଲା
ତିନି ମାସର ନିଷ୍ପାପ ମୁହଁ
ମହାପ୍ରୁ, ଟିକେ ରୁହ ରୁହ!

କଠୋରତା ଠାରୁ ମୁକୁଳା ହେଇନି କଂସା ବାସନ
ଚାବୁକର ଅତିକ୍ରମଣରୁ ମୁକୁଳା ହେଇନି ଭିଟାମାଟି
ଦୁଃଖର କାରାଗାରରୁ ମୁକୁଳା ହେଇନି ଶେଷ ଟୋପାଏ କୋହ
ଦ୍ବିପ୍ରହରେ ଅମାନିଆ ସୁଧର ଦଉଡ଼ିରେ 
ଲଟକିପଡିଛି ଗୋଟେ ହାଡ ମଲମଲ ଦେହ 
ମହାପ୍ରୁ, ଏଥର ହେଲେ ଟିକେ ରୁହ!

ଆହୁରି ପଢ଼ନ୍ତୁ- Aamir Khan & Manoj Mishra: ମନୋଜ କହିଲେ, ଆମିର ଶୁଣିଲେ… ବଦଳିବ କି ଓଡ଼ିଆ ସିନେମାର ଭାଗ୍ୟ ? ଖୁବଶୀଘ୍ର ଆମିର ଖାନଙ୍କ ସହ ମନୋଜ ମିଶ୍ରଙ୍କ ଭେଟଘାଟ

ଆଉ ଏବେ, ଅନିଚ୍ଛାର ଓଠରେ ଅନ୍ଧାରର ଛାତି ଚିରି 
ସରକାରୀ ମହଲରେ ଆଲୁଅର କରଜ ସୁଝୁଛି ଝିଅ
ଛାତିରେ ସନ୍ତ୍ରାସ, ଆଖିରେ ପ୍ରତିଶୋଧର ଧାରୁଆ ଅସ୍ତ୍ର ଧରି
ଜଙ୍ଗଲରେ ଜଗି ବସିଛି ପୁଅ।

ଏଇଠି ଅଟକିଗଲା ପାଦ
ଫେରି ଚାହିଁଲେ ମହାପ୍ରୁ
ଓଠ ଖୋଲୁ ଖୋଲୁ, ଆଖିରେ ତାଙ୍କର
ସମୁଦ୍ର ପରାଏ ଲୁହ!

ଆହୁରି ପଢ଼ନ୍ତୁ- SIR in Bengal :  ନିର୍ବାଚନ କମିସନଙ୍କ କଡ଼ା ନିର୍ଦ୍ଦେଶ, ବୁଥ୍ ଅଧିକାରୀମାନଙ୍କୁ ଧମକ ଦିଅନାହିଁ

ବଡ଼ରମ୍ପାସ, କେନ୍ଦୁଝର 
ଯୋଗାଯୋଗ- ୬୩୭୨୨୬୦୪୭୯