ସଞ୍ଜୟ ଝା ଜେଡିୟୁ କାର୍ଯ୍ୟକାରୀ ଅଧ୍ୟକ୍ଷ ହେବା ପରେ ବିଜେପିର ବଢ଼ିଲା ଚିନ୍ତା
ନୂଆଦିଲ୍ଲୀ: ଦିଲ୍ଲୀରେ ଜନତା ଦଳ ୟୁନାଇଟେଡ (ଜେଡିୟୁ) ର ଜାତୀୟ କାର୍ଯ୍ୟନିର୍ବାହୀ ବୈଠକରେ ରାଜ୍ୟସଭା ସାଂସଦ ସଞ୍ଜୟ କୁମାର ଝାଙ୍କୁ ପୁଣି ଦଳର କାର୍ଯ୍ୟକାରୀ ସଭାପତି କରାଯାଇଛି। ଏହି ବୈଠକରେ ସଞ୍ଜୟ ଝାଙ୍କୁ କାର୍ଯ୍ୟକାରୀ ଅଧ୍ୟକ୍ଷ କରିବା ପ୍ରସ୍ତାବକୁ ଦଳର ସଭାପତି ଏବଂ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ନିଜେ ଆଣିଥିଲେ। ପ୍ରକାଶ ଥାଉକି, ଏହି ବୈଠକରେ ଜେଡିୟୁ ବିଜେପିର ଚିନ୍ତା ବଢ଼ାଇଦେଇଛି | ବାସ୍ତବରେ, କେନ୍ଦ୍ର ସରକାରଙ୍କ ଠାରୁ ବିହାର ପାଇଁ ସ୍ୱତନ୍ତ୍ର ବର୍ଗ ମାନ୍ୟତା (ସ୍ୱତନ୍ତ୍ର ରାଜ୍ୟ) କିମ୍ବା ସ୍ୱତନ୍ତ୍ର ପ୍ୟାକେଜ୍ ଦାବିରେ ଜେଡିୟୁର ଏହି ବୈଠକରେ ଏକ ସଂକଳ୍ପ ପାରିତ ହୋଇଥିଲା। ବିହାରକୁ ସ୍ୱତନ୍ତ୍ର ମାନ୍ୟତା ଦେବାର ଦାବି ଦୀର୍ଘ ଦିନ ଧରି ହୋଇଆସୁଛି। ଜେଡିୟୁ ବୈଠକରେ ଏହା ସ୍ୱୀକାର କରାଯାଇଛି ଯେ ବିହାର ଦୀର୍ଘ ଦିନ ଧରି ସ୍ୱତନ୍ତ୍ର ମାନ୍ୟତା ପାଇବାକୁ ଅପେକ୍ଷା କରିଛି। ରାଜ୍ୟର ଆର୍ଥିକ ବିକାଶ ପାଇଁ ଏହା ଉପରେ ନିଷ୍ପତ୍ତି ନେବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଏବେ ଦେଖିବାକୁ ବାକି ରହିଲା ବିଜେପି ଏହାକୁ ଗ୍ରହଣ କରୁଛି କି ନାହିଁ। ଜାତୀୟ କାର୍ଯ୍ୟନିର୍ବାହୀ ବୈଠକ ପରେ ବରିଷ୍ଠ ଜେଡିୟୁ ନେତା କେସି ତ୍ୟାଗୀ କହିଛନ୍ତି ଯେ ବିହାର ସଂରକ୍ଷଣ ଆଇନ ଉପରେ ପ୍ରତିବନ୍ଧକକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯିବ। ସେ କହିଛନ୍ତି ଯେ ବିହାର ପାଇଁ ସ୍ୱତନ୍ତ୍ର ରାଜ୍ୟ ମାନ୍ୟତା ପାଇବା ପାଇଁ ଆମେ ସଂଗ୍ରାମ ଜାରି ରଖିବୁ। କେସି ତ୍ୟାଗୀ କହିଛନ୍ତି, “ସେ (ମୁଖ୍ୟମନ୍ତ୍ରୀ ନୀତୀଶ କୁମାର) ଜାତୀୟ କାର୍ଯ୍ୟନିର୍ବାହୀ ବୈଠକରେ ଘୋଷଣା କରିଛନ୍ତି ଯେ ବର୍ତ୍ତମାନ ସେ ସର୍ବଦା ଏନଡିଏ ମିଳିତ ମେଣ୍ଟରେ ହିଁ ରହିବେ | ବିହାର ହାଇକୋର୍ଟଙ୍କ ଦ୍ୱାରା ରୋକ ଲାଗିଥିବା ସଂରକ୍ଷଣ ଆଇନ ସମ୍ପର୍କରେ ଆମେ ସୁପ୍ରିମକୋର୍ଟ ଯିବୁ। ଏହା ସହ ରାଜ୍ୟକୁ ସ୍ୱତନ୍ତ୍ର ମାନ୍ୟତା ଏବଂ ଆର୍ଥିକ ପ୍ୟାକେଜ୍ ପାଇଁ ସଂଗ୍ରାମ ଜାରି ରଖିବୁ।”