ନୂଆପଲ୍ଲୀ ହଜରେ ବୋଟିଂ କେବେ?
ଭୁବନେଶ୍ବର: ନୂଆପଲ୍ଲୀ ହଜକୁ ନେଇ ମାମଲା ଏନ୍ଜିଟିରେ ପହଞ୍ଚିବା ପରେ ତନାଘନା ହେଲା। ବିଏମ୍ସି ତତ୍ପର ହେଲା। ହଜକୁ ନୂଆ ରୂପ ଦେବା ସହ ଏଠାରେ ବୋଟିଂ ବ୍ୟବସ୍ଥା କରିବାକୁ ବିଏମ୍ସି ଯୋଜନା କରିଥିଲା। ୪ କୋଟି ଟଙ୍କା ବ୍ୟୟ ବରାଦ ହେଲା। ସୌନ୍ଦର୍ଯ୍ୟୀକରଣ ପାଇଁ ୬୪ଲକ୍ଷ ଖର୍ଚ୍ଚ ହେଲା। ଆବଶ୍ୟକ ପଡ଼ିଲେ ଅଧିକ ଅର୍ଥ ବି ବିନିଯୋଗ ହୋଇ ପାରିବ ବୋଲି ଘୋଷଣା ହେଲା। ଏହି ଘୋଷଣାକୁ ଠିକ୍ ବର୍ଷେ ପୂରିଛି। ଗତ ବର୍ଷ ଜୁନ୍ ମାସରେ ଏଭଳି ଯୋଜନା କରିଥିଲା ବିଏମ୍ସି। ହେଲେ ଯୋଜନା କେବଳ ଯୋଜନାରେ ରହିଯାଇଛି। ପୋଖରୀ ହୁଡ଼ାରେ ଓ କେତେକ ଜାଗାରେ ପେଭର ବ୍ଲକ ପଡ଼ିଛି ଓ ଘାସ ଲାଗିଛି। ଯେତିକି ବି ସୌନ୍ଦର୍ଯ୍ୟୀକରଣ ହୋଇଥିଲା ତାହା ଉଜୁଡ଼ିଗଲାଣି। ସେଠାରେ ଏବେ ଅନାବନା ଘାସ ଉଠିଗଲାଣି। ପୋଖରୀ ପାଣି ବି ନଷ୍ଟ ହୋଇଗଲାଣି। ସବୁଠାରୁ ବଡ଼ କଥା ହେଉଛି ଏନ୍ଜିଟିଙ୍କ ଆଦେଶ ଆଧାରରେ ଏ ଯାବତ୍ ଶତ ପ୍ରତିଶତ ଜବରଦଖଲ ହଟିପାରି ନାହିଁ। କେବଳ ଧର୍ମକୁ ଆଖି ଠାର ଭଳି ଅଳ୍ପ କିଛି ଜବରଦଖଲ ହଟାଇ ହଜ ପାଣିକୁ ସଫା କରାଯାଇଛି। ପୂର୍ବ ଯୋଜନା ଭଳି ହଜ କେବେ ହେବ ସେ ନେଇ ଏବେ କାହା ପାଖରେ ଖବର ନାହିଁ। କେବଳ ଏନ୍ଜିଟିଙ୍କ କାର୍ଯ୍ୟାନୁଷ୍ଠାନରୁ ବର୍ତ୍ତିବା ପାଇଁ ବିଏମ୍ସି ଏଭଳି ସ୍ବପ୍ନ ଦେଖାଯାଇଥିଲା ବୋଲି ଚର୍ଚ୍ଚା ହେଉଛି।
Sambad is now on WhatsApp
Join and get latest news updates delivered to you via WhatsApp
ନୂଆପଲ୍ଲୀର ହଜ ପୋଖରୀ ୭ ଏକର ଜାଗାରେ ରହିଥିଲା। ଜବରଦଖଲ ହେବା ପରେ ଏହା ୪.୫ଏକରରେ ସୀମିତ ରହିଥିଲା। ୧.୫ଏକର ଜମି ସରକାରୀ ଜବରଦଖଲ ରହିଥିଲା। ରାଜୀବ ଆବାସ ଯୋଜନାରେ ବିଏମ୍ସି ପୋଖରୀ ଭିତରେ ଘର କରିଥିଲା। ଗୋଟିଏ ଏକର ଜମି ବ୍ୟକ୍ତିଗତ ଜବରଦଖଲରେ ଥିଲା। ଶନି ମନ୍ଦିର ସହ ଆଉ ଗୋଟିଏ ମନ୍ଦିର ମଧ୍ୟ ରହିଥିଲା। ଏହାର ପୁନରୁଦ୍ଧାର ପାଇଁ ମାମଲା ଏନ୍ଜିଟିରେ ପହଞ୍ଚିଥିଲା। ୨୦୧୩ ମସିହା ମାର୍ଚ୍ଚ ମାସରେ ଏନ୍ଜିଟି ୬ ମାସ ମଧ୍ୟରେ ପୋଖରୀ ଓ ୧୦ ନମ୍ବର ପ୍ରାକୃତିକ ନାଳରୁ ସମସ୍ତ ଜବରଦଖଲ ହଟାଇବା ପାଇଁ ବିଏମ୍ସି ଓ ବିଡିଏକୁ ଆଦେଶ ଦେଇଥିଲେ। ଏଣୁ ବିଏମ୍ସି କିଛି ଜବରଦଖଲ ହଟାଇବା ପରେ ବୋଟିଂ ବ୍ୟବସ୍ଥା କରିବାକୁ ଯୋଜନା କରିଥିଲା।
ବୋଟିଂ ପାଇଁ ୪ କୋଟି ବ୍ୟୟ ବରାଦ ହୋଇଥିବା ବେଳେ ପାରିପାର୍ଶ୍ବୀକ ଉନ୍ନତୀକରଣ ପାଇଁ ୬୪ ଲକ୍ଷ ଟଙ୍କା ବ୍ୟୟ ବରାଦ ହୋଇଥିଲା। ଏଥିରେ ଜଳାଶୟକୁ ବ୍ୟାରିକେଡ୍ କରାଯାଇଥିଲା। ଏହା ସହ ଯୋଗ ମଣ୍ଡପ, ୱାକିଂ ଟ୍ରାକ, ମୁକ୍ତାକାଶ ବ୍ୟାୟାମଶାଳା, ଶିଶୁ ଉଦ୍ୟାନ ଆଦି ଯୋଜନା ହୋଇଥିଲା। ସ୍ଥାନୀୟ ବାସିନ୍ଦାଙ୍କ କହିବା କଥା ହେଉଛି, ଏନ୍ଜିଟିଙ୍କ ଆଦେଶ ପରେ ଏଠାରେ ଥିବା ଶନି ମନ୍ଦିର ଉଚ୍ଛେଦ ହୋଇଛି। ଏହା ସହିତ ଅନ୍ୟ କେତେକ ଜବରଦଖଲ ମଧ୍ୟ ଉଚ୍ଛେଦ ହୋଇଛି। ବୋଟିଂ ପାଇଁ ଖୋଳା ଯାଇ ପାଣି ବ୍ୟବସ୍ଥା କରାଯାଇଛି। ହେଲେ ବୋଟିଂ ବ୍ୟବସ୍ଥା ହୋଇନାହିଁ। ଯେଉଁ ଗଛସବୁ ଲାଗିଥିଲା ନଷ୍ଟ ହୋଇଗଲାଣି। ପୁଣି ଜଙ୍ଗଲ ଭଳି ହୋଇଗଲାଣି। ପୂର୍ବତନ କମିସନର ଘଟଣାସ୍ଥଳ ଅନୁଧ୍ୟାନ କରୁଥିଲେ। କାମ ଚାଲିଥିଲା। ହେଲେ ତାଙ୍କର ହଠାତ୍ ବଦଳି ପରଠାରୁ କାମ ବନ୍ଦ ରହିଛି। ତେବେ ଖୁବ୍ଶୀଘ୍ର କାମ ଆରମ୍ଭ ହେବ ବୋଲି ବିଏମ୍ସି କହିଛି।