ବିଶ୍ବ ବିଶ୍ବବିଦ୍ୟାଳୟ ଚେସ୍: ସାଇନାଙ୍କୁ ରୌପ୍ୟ
ଭୁବନେଶ୍ବର: ଓଡ଼ିଆ ଝିଅ ସାଇ ସାଇନା ସଲୋନିକା ଉଗାଣ୍ଡାରେ ଆୟୋଜିତ ଏଫ୍ଆଇଏସ୍ୟୁ ବିଶ୍ବ ବିଶ୍ବବିଦ୍ୟାଳୟ ଚେସ୍ ପ୍ରତିଯୋଗିତାରେ ରୌପ୍ୟ ପଦକ ଜିତିଛନ୍ତି। ତାଙ୍କ ଭାରତୀୟ ସାଥୀ ଆକାଂକ୍ଷା ହାଗାୱାନେ ସ୍ବର୍ଣ୍ଣ ପଦକ ଜିତିଛନ୍ତି। ଫଳରେ ଏହି ପ୍ରତିଯୋଗିତାରେ ଭାରତ ୧-୨ ସଫଳତା ପାଇଛି। ରବିବାର ମହିଳା କ୍ଲାସିକ୍ ବର୍ଗର ଫାଇନାଲ୍ ତଥା ନବମ ରାଉଣ୍ଡ ପରସ୍ପର ବିରୋଧରେ ଖେଳି ଆକାଂକ୍ଷା ଓ ସାଇନା ଅମୀମାଂସିତ ରଖିଥିଲେ। ଫଳରେ ଉଭୟ ସମାନ ୬.୫ ପଏଣ୍ଟ ପାଇଥିଲେ ମଧ୍ୟ ଆକାଂକ୍ଷା ଆଗରେ ରହି ସ୍ବର୍ଣ୍ଣ ଜିତିଥିଲେ। ଭାରତର ଅନ୍ୟ ଦୁଇ ଖେଳାଳି ମୋକ୍ଷଦା ମହାଜନ ଓ ଓଡ଼ିଶାର ଜୁନୁ ବିରୁଆ (୪.୫ ପଏଣ୍ଟ୍) ଯଥାକ୍ରମେ ୧୭ ଓ ୧୮ତମ ସ୍ଥାନରେ ରହି ଅଭିଯାନ ଶେଷ କରିଥିଲେ। ସାଇନା ଦିଲ୍ଲୀ ବିଶ୍ବବିଦ୍ୟାଳୟ ଏବଂ ଜୁନୁ କିଟ୍ ବିଶ୍ବବିଦ୍ୟାଳୟ ଛାତ୍ରୀ।
Sambad is now on WhatsApp
Join and get latest news updates delivered to you via WhatsApp
ଆକାଂକ୍ଷା ଓ ମୋକ୍ଷଦା ପୁଣେସ୍ଥିତ ଭାରତୀୟ ବିଦ୍ୟାପୀଠରେ ପଢ଼ୁଛନ୍ତୁ। ବିଶ୍ବ ପ୍ରତିଯୋଗିତାରେ ଭାରତରୁ ଏହି ୪ ଖେଳାଳିଙ୍କ ସହ କିଟ୍ର ଶେଖର ଚନ୍ଦ୍ର ସାହୁ (ମୁଖ୍ୟପ୍ରଶିକ୍ଷକ) ଓ ଲକି ରାଣୀ ପାତ୍ର (ଅଫିସିଆଲ୍) ଯୋଗ ଦେଇଥିଲେ। ଏହି ସଫଳତା ଲାଗି କିଟ୍ ଓ କିସ୍ର ପ୍ରତିଷ୍ଠାତା ଅଚ୍ୟୁତ ସାମନ୍ତ ଏବଂ ଭାରତୀୟ ବିଶ୍ବବିଦ୍ୟାଳୟ ସଂଘର କ୍ରୀଡ଼ା ସମ୍ପାଦକ ବଲଜିତ ସିଂହ ସେଖୋନ ଖେଳାଳିମାନଙ୍କୁ ଅଭିନନ୍ଦନ ଜଣାଇଛନ୍ତି।