କିବ: ୟୁକ୍ରେନ୍ ପକ୍ଷରୁ କରାଯାଇଥିବା ଡ୍ରୋନ ଆକ୍ରମଣର ପ୍ରତିଶୋଧ ମାତ୍ର ୨୪ ଘଣ୍ଟା ମଧ୍ୟରେ ନେଇଛି ରୁଷିଆ। ଦକ୍ଷିଣ ୟୁକ୍ରେନର ଏକ ସହରରେ ରୁଷସେନାର ଏୟାର ଷ୍ଟ୍ରାଇକରେ ୭ ଜଣଙ୍କ ମୃତ୍ୟୁ ଘଟିଛି। ରୁଷ୍ କ୍ଷେପଣାସ୍ତ୍ର ମାଧ୍ୟମରେ ଏହି ଆକ୍ରମଣ କରିଥିଲା।
![Sambad Whatsapp](https://cdn-icons-png.flaticon.com/512/2504/2504957.png)
Sambad is now on WhatsApp
Join and get latest news updates delivered to you via WhatsApp
ୟୁକ୍ରେନର ଅଧିକାରୀଙ୍କ କହିବା ଅନୁଯାୟୀ, ଏହି ଆକ୍ରମଣରେ ଜଣେ ଶିଶୁଙ୍କ ସମେତ ୭ ଜଣ ସାଧାରଣ ନାଗରିକଙ୍କ ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି। ସ୍ଥାନୀୟ କର୍ତ୍ତୃପକ୍ଷ ଭିଲନିଆନ୍ସକର ଏକ ପାର୍କରେ ଏକ ମୃତଦେହ ପଡ଼ିଥିବାର ଫଟୋ ଜାରି କରିଛନ୍ତି। ଅଧିକାରୀମାନେ କହିଛନ୍ତି ଯେ ଶନିବାର ସନ୍ଧ୍ୟା ଏବଂ ରବିବାର ଏହି ଆକ୍ରମଣରେ ୩୬ ଜଣ ଆହତ ହୋଇଛନ୍ତି ଏବଂ ରବିବାରକୁ ଶୋକର ଦିନ ଘୋଷଣା କରାଯାଇଛି।
ଭିଲନିଆନ୍ସକ ଜାପୋରିଝିଆ ଅଞ୍ଚଳରେ ଅବସ୍ଥିତ, ଯାହା ସ୍ଥାନୀୟ ରାଜଧାନୀଠାରୁ ୩୦ କିଲୋମିଟର (୨୦ ମାଇଲ) ଦୂରରେ ଅବସ୍ଥିତ । ମୃତକଙ୍କ ମଧ୍ୟରେ ୩ ଜଣ ଶିଶୁ ଅଛନ୍ତି ବୋଲି ସ୍ଥାନୀୟ ଗଭର୍ଣ୍ଣର ଇଭାନ ଫେଡୋରୋଭ କହିଛନ୍ତି। ଫେଡୋରୋଭ ଏକ ଟେଲିଗ୍ରାମ ପୋଷ୍ଟରେ କହିଛନ୍ତି ଯେ ଏହି ଆକ୍ରମଣ ରେ ଭିଲନିଆନ୍ସକର ଏକ ଦୋକାନ, ଆବାସିକ କୋଠା ଏବଂ ଏକ ଭିତ୍ତିଭୂମି କ୍ଷତିଗ୍ରସ୍ତ ହୋଇଛି। ଭିଲନିଆନ୍ସକରେ ଆକ୍ରମଣ ପରେ ୟୁକ୍ରେନର ରାଷ୍ଟ୍ରପତି ଭୋଲୋଦିମିର ଜେଲେନସ୍କି ରୁଷୀୟ ଆକ୍ରମଣ ବନ୍ଦ କରିବାକୁ ନିଜର ପାଶ୍ଚାତ୍ୟ ସହଯୋଗୀମାନଙ୍କୁ ଆହ୍ୱାନ ଦେଇଛନ୍ତି।