ପିଓକେ ଜେଲରୁ ଫେରାର ହୋଇଗଲେ ୧୮ ଦୁର୍ଦ୍ଦାନ୍ତ ଅପରାଧୀ
ଇସଲାମାବାଦ: ପାକ୍ ଅଧିକୃତ କଶ୍ମୀରରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଜଣେ ସିକ୍ୟୁରିଟି ଗାର୍ଡଙ୍କୁ ଆକ୍ରମଣ କରି ୧୮ ଜଣ ଦୁର୍ଦ୍ଦାନ୍ତ ଅପରାଧୀ ଜେଲରୁ ଫେରାର ହୋଇଯାଇଛନ୍ତି। ସୋମବାର ପୁଲିସ ଅଧିକାରୀମାନେ ଏ ନେଇ ସୂଚନା ଦେଇଛନ୍ତି। ଫେରାର ହୋଇଥିବା କଏଦୀଙ୍କ ମଧ୍ୟରୁ ୬ ଜଣଙ୍କୁ ଫାଶୀ ଦଣ୍ଡାଦେଶ ଦିଆଯାଇଛି। ରାଓ୍ଵାଲାକୋଟ ଜେଲରେ ଶୁକ୍ରବାର ଜଣେ କଏଦୀ ସୁରକ୍ଷାକର୍ମୀଙ୍କୁ ବନ୍ଧୁକ ଦେଖାଇ ଜେଲ୍ ଚାବି ଛଡ଼ାଇ ନେଇଥିଲେ।
Sambad is now on WhatsApp
Join and get latest news updates delivered to you via WhatsApp
ଫେରାର ହୋଇଥିବା ୧୮ ଜଣ କଏଦୀଙ୍କ ମଧ୍ୟରୁ ୬ ଜଣଙ୍କୁ ଫାଶୀ ଦଣ୍ଡାଦେଶ ଦିଆଯାଇଥିବା ବେଳେ ଅନ୍ୟ ୩ ଜଣ ଆଜୀବନ କାରାଦଣ୍ଡ ଭୋଗୁଛନ୍ତି। ଖସି ଯିବାକୁ ଚେଷ୍ଟା କରୁଥିବା ବେଳେ ଅନ୍ୟ ଜଣେ କଏଦୀଙ୍କୁ ଗୁଳି କରି ହତ୍ୟା କରାଯାଇଛି। ସେ (କଏଦୀ) ୫ ବର୍ଷ ଜେଲ୍ ଦଣ୍ଡ ଭୋଗୁଥିଲା। ପୁଲିସ ଘଟଣାସ୍ଥଳରେ ବ୍ୟାପକ ସର୍ଚ୍ଚ ଅପରେସନ୍ ଆରମ୍ଭ କରିଛି। ସେପଟେ ଘଟଣାର ତଦନ୍ତ ଆରମ୍ଭ କରିବା ସହ ଜେଲ ମୁଖ୍ୟଙ୍କ ସମେତ ଅନ୍ୟ କିଛି ଅଧିକାରୀଙ୍କୁ ଚାକିରିରୁ ବହିଷ୍କାର କରାଯାଇଛି ।
କେତେକ ମାମଲାରେ ପଚରାଉଚରା ପାଇଁ ଅଧିକାରୀମାନଙ୍କୁ ଅଟକ ରଖାଯାଇଛି ବୋଲି ପୁଲିସ କହିଛି। ରାୱଲାକୋଟ ଜେଲର ଡେପୁଟି ସୁପରିଟେଣ୍ଡେଣ୍ଟଙ୍କ ସମେତ ୭ ଜଣ ଅଧିକାରୀଙ୍କୁ ଅଟକ ରଖାଯାଇଛି ଏବଂ ସୁରକ୍ଷା ଉଲ୍ଲଂଘନ ନେଇ ତଦନ୍ତ ଆରମ୍ଭ କରାଯାଇଛି ବୋଲି ସମା ଟିଭି ରିପୋର୍ଟ କରିଛି।