ପ୍ରତିଶ୍ରୁତି ରକ୍ଷାକଲେ ପ୍ରକୃତି ବନ୍ଧୁ କରୁଣାକର
ମାଲକାନଗିରି: ଆଜି ପବିତ୍ର ପଣାସଂକ୍ରାନ୍ତି ତଥା ହନୁମାନଙ୍କ ଜୟନ୍ତୀ ଅବସରରେ ପୂର୍ବ ପ୍ରତିଶ୍ରୁତି ରକ୍ଷାକରି ୧୦ ହଜାର ଟଂକାର ଏକ ଚେକ ମନ୍ଦିରକୁ ତାର୍ଲାକୋଟା ସରକାରୀ ଉଚ୍ଚ ବିଦ୍ୟାଳୟର ଆଦର୍ଶ ଶିକ୍ଷକ, ବରିଷ୍ଠ କବି, ସମାଜ ସେବୀ ତଥା ପ୍ରକୃତି ବନ୍ଧୁ କରୁଣାକର ମଲିକ ପ୍ରଦାନ କରିଛନ୍ତି।୨୦୨୧ ମସିହାରେ ରାଜ୍ୟ ସରକାରଙ୍କ ପରିବେଶ ଓ ଜଙ୍ଗଲ ବିଭାଗ ତରଫରୁ ପ୍ରକୃତି ବନ୍ଧୁ ପୁରସ୍କାର ବାବଦରେ ପାଇଥବା ଦଶ ହଜାର ଟଙ୍କା ପୁରୁଣା ଚିତାପାରି ହନୁମାନ ମନ୍ଦିର ପରିସରରେ ବୃକ୍ଷ ରୋପଣ ଓ ମନ୍ଦିର ପରିଚାଳନା ପାଇଁ ମନ୍ଦିର ପରିଚାଳନା କମିଟିକୁ ପ୍ରଦାନ କରିବେ ବୋଲି ଘୋଷଣା କରିଥିଲେ। ଯାହାକି ଗତ ସେପ୍ଟେମ୍ବର ମାସରେ ବିଭିନ୍ନ ଖବର କାଗଜ ରେ ପ୍ରକାଶ ପାଇଥିଲା। କିନ୍ତୁ ସେ ସମୟରେ ତାଙ୍କ ଧର୍ମପତ୍ନୀ ସ୍ବର୍ଗତ ମଧୁସ୍ମିତାଙ୍କ ଅକାଳ ବିୟୋଗରେ ମ୍ରିୟମାଣ ହୋଇପଡିଥିଲେ।
Sambad is now on WhatsApp
Join and get latest news updates delivered to you via WhatsApp
ପ୍ରକୃତି ବନ୍ଧୁ ପୁରସ୍କାର ପାଇଁ ଦରଖାସ୍ତ ଆହ୍ଵାନ ବେଳେ ତାଙ୍କ ସ୍ବର୍ଗତା ପତ୍ନୀ ମଧୁସ୍ମିତା ମଧ୍ୟ ଏ କଥା ଜାଣିଥିଲେ।ତେବେ ଆଜି ଏହି ପବିତ୍ର ଦିବସରେ ମନ୍ଦିର ପରିସରରେ ଭକ୍ତମାନଙ୍କ ଗହଣରେ ମନ୍ଦିର ପରିଚାଳନା କମିଟିର ସଭାପତି ଦେବା ପଡିଆମୀ, ସମ୍ପାଦକ ଲବ ପାତ୍ର, କୋଷାଧ୍ୟକ୍ଷ ଭକ୍ତରାମ ଦୋରା, ଗାଁ ନାୟକ ଶୁକୁ ମାଝୀଙ୍କ ହାତରେ ଦଶ ହଜାର ଟଙ୍କାର ଚେକ୍ ପ୍ରଦାନ କରିଛନ୍ତି। ଶ୍ରୀ ମଲିକ ବୃତ୍ତିରେ ଜଣେ ଶିକ୍ଷକ ହୋଇଥିଲେ ମଧ୍ୟ ପ୍ରବୃତ୍ତିରେ ଜଣେ ସୁସାହିତ୍ୟିକ, ପରିବେଶବିତ୍, ସମାଜସେବୀ ଭାବେ ଜିଲ୍ଲାରେ ବେଶ୍ ପରିଚିତ। ମନ୍ଦିର କମିଟି ଶ୍ରୀ ମଲିକଙ୍କ ଏଭଳି ସମାଜସେବା ପାଇଁ ପ୍ରଶଂସା କରିବା ସହ ଭବିଷ୍ୟତ ଉତ୍ତରୋତ୍ତର ଉନ୍ନତି ପାଇଁ ଭଗବାନଙ୍କ ନିକଟରେ ପ୍ରାର୍ଥନା କରିଥିଲେ।