୨୦୨୩ରେ ହୋଇପାରେ ବିବାହ
୨୦୨୨ ମସିହା ବଲିଉଡ୍ ବିବାହ ପର୍ବରେ ଏକ ପ୍ରକାର ପରିପୂର୍ଣ୍ଣ ଥିଲା। ଏ ବର୍ଷ ଆଲିଆ ଭଟ୍ଟ-ରଣବୀର କପୁର, ଫରହାନ ଅକତର-ଶିବାନୀ ଦାଣ୍ଡେକର, ମୌନୀ ରାୟ-ସୂରଜ ନାମ୍ବିଆର୍, ଅଲୀ ଫେଜଲ-ଋଚା ଚଢ଼ା ଭଳି ଚର୍ଚ୍ଚିତ ବଲିଉଡ୍ ଯୋଡ଼ି ବିବାହ ବନ୍ଧନରେ ଆବଦ୍ଧ ହୋଇଥିଲେ। ୨୦୨୩ ମସିହା ଆଉ କେତେକ ଲୋକପ୍ରିୟ ଯୋଡ଼ିଙ୍କ ବିବାହର ସମ୍ଭାବନା ନେଇ ଆସୁଛି। ସେ ମଧ୍ୟରେ ଅଗ୍ରଣୀ ହେଉଛନ୍ତି ସିଦ୍ଧାର୍ଥ ମଲ୍ହୋତ୍ରା ଓ କିଆରା ଆଡ଼ଭାନୀ। ଉଭୟ ନିଜର ପ୍ରେମ ଜୀବନ ନେଇ ନିରବତା ଅବଲମ୍ବନ କରିଆସୁଥିଲେ ହେଁ ଆସନ୍ତା ବର୍ଷ ସେମାନଙ୍କ ହାତଗଣ୍ଠି ପଡ଼ିବାର ସବୁ ଯୋଜନା ପ୍ରସ୍ତୁତ ହୋଇସାରିଥିବାର ଜଣାପଡ଼ିଛି। ଚଣ୍ଡୀଗଡ଼ରେ ସେମାନଙ୍କ ବିବାହ ଅନୁଷ୍ଠିତ ହେବ ବୋଲି ଚର୍ଚ୍ଚା ହେଉଛି।
Sambad is now on WhatsApp
Join and get latest news updates delivered to you via WhatsApp
ଏ ବର୍ଷ ତମାମ ଆଉ ଏକ ଯୋଡ଼ି ଚର୍ଚ୍ଚାର କେନ୍ଦ୍ରରେ ରହିଥିଲା- ଆଥିୟା ସେଟ୍ଟୀ ଓ କେ ଏଲ୍ ରାହୁଳ। ନୂଆ ବର୍ଷ ଆରମ୍ଭରୁ ଏମାନଙ୍କ ବିବାହ ସମ୍ପନ୍ନ ହୋଇଯିବ ବୋଲି କୁହାଯାଉଛି। ଜାନୁଆରି ୨୧ରୁ ୨୩ ତାରିଖ ଯାଏ ଆଥିଆଙ୍କ ବାସଭବନରେ ଦକ୍ଷିଣ ଭାରତୀୟ ରୀତିନୀତିରେ ଏମାନଙ୍କ ବିବାହ ଉତ୍ସବ ଅନୁଷ୍ଠିତ ହେବ। ସେହିପରି ଅର୍ଜୁନ କପୁର ଓ ମଲାଇକା ଅରୋଡ଼ା ବିବାହ କରିବା ନେଇ ପରସ୍ପର ମଧ୍ୟରେ ଆଲୋଚନା କରିଥିବାର ଜଣାପଡ଼ିଛି। ତେବେ ସେମାନେ ବିବାହ ନେଇ କୌଣସି ତାରିଖ ଏ ଯାଏଁ ଧାର୍ଯ୍ୟ କରିନାହାନ୍ତି। ଗତ ବର୍ଷ ରକୁଲ ପ୍ରୀତ ସିଂହ ଓ ଜ୍ୟାକି ଭଗନାନି ସେମାନଙ୍କ ପ୍ରେମ ସମ୍ପର୍କ ନେଇ ଘୋଷଣା କରି ସଭିଙ୍କୁ ଆଶ୍ଚର୍ଯ୍ୟ କରିଦେଇଥିଲେ। ସେମାନେ ୨୦୨୩ରୁ ଏକାଠି ନୂଆ ଜୀବନ ଆରମ୍ଭ କରିବାର ସମ୍ଭାବନା ରହିଛି। ପୂର୍ବତନ ବିଗ୍ ବସ୍ ପ୍ରତିଯୋଗୀ ତେଜସ୍ବୀ ପ୍ରକାଶ ଓ କରଣ କୁନ୍ଦ୍ରାଙ୍କ ସମ୍ପର୍କ କାହାରିକୁ ଅଛପା ନାହିଁ। ଆସନ୍ତା ବର୍ଷ ମଝି ଆଡ଼କୁ ସେମାନେ ବିବାହ କରିବେ ବୋଲି ପ୍ରଶଂସକ ମହଲରେ ଚର୍ଚ୍ଚା ହେଉଛି।