ପୃଥିବୀକୁ କେବେ ଫେରିବେ ସୁନୀତା ଓ୍ବିଲିୟମ୍ସ ? ବଢିଲା ଅନିଶ୍ଚିତତା
ୱାଶିଂଟନ: ଆମେରିକାରୁ ସ୍ୱତନ୍ତ୍ର ମିସନରେ ଅନ୍ତର୍ଜାତୀୟ ମହାକାଶ ଷ୍ଟେସନକୁ ପଠାଯାଇଥିବା ମହାକାଶଚାରୀଙ୍କ ଏକ ଟିମ୍ ମହାକାଶ ଯାନରେ ତ୍ରୁଟି ଯୋଗୁଁ ସେଠାରେ ଅଟକି ରହିଛନ୍ତି। ଅଟକିଥିବା ମହାକାଶଚାରୀମାନଙ୍କ ମଧ୍ୟରେ ଅଛନ୍ତି ଭାରତୀୟ ବଂଶୋଦ୍ଭବ ସୁନୀତା ୱିଲିୟମ୍ସ । ଷ୍ଟାରଲାଇନର କ୍ୟାପସୁଲ ବିଫଳ ହେବା ପରେ ସୁନିତା ୱିଲିୟମ୍ସଙ୍କ ଫେରିବାର କେତେ ଆଶା ରହିଛି ତାହାକୁ ନେଇ ନାସା ଏକ ବଡ ବୟାନ ଦେଇଛି । ନାସା କହିଛି ଯେ ଏହାର ଦୁଇ ଜଣ ମହାକାଶଚାରୀ ଅନ୍ତର୍ଜାତୀୟ ମହାକାଶ ଷ୍ଟେସନ (ଆଇଏସଏସ)ରେ ଅଧିକ ସମୟ ରହିବେ । ଏହି ସମୟରେ ସେମାନେ ବୋଇଂର ନୂତନ ମହାକାଶ କ୍ୟାପସୁଲରେ ଦେଖାଦେଇଥିବା ଯାନ୍ତ୍ରିକ ତ୍ରୁଟିର ସମାଧାନ କରିବେ।
Sambad is now on WhatsApp
Join and get latest news updates delivered to you via WhatsApp
ଇତି ମଧ୍ୟରେ ଅନ୍ତର୍ଜାତୀୟ ମହାକାଶ ଷ୍ଟେସନ ନିକଟରେ ଆଉ ଏକ ଘଟଣା ଘଟିଛି ଯାହାକି ସ୍ଥିତିକୁ ଆଉ ଟିକିଏ ଜଟିଳ କରିଦେଇଛି । ପୃଥିବୀ ଚାରିପଟେ ବୁଲୁଥିବା ରୁଷର ଏକ ପୁରୁଣା ମହାକାଶ ଯାନରେ ବିସ୍ଫୋରଣ ହୋଇଛି ଓ ତାହା ଖଣ୍ଡ ଖଣ୍ଡ ହୋଇ ମହାକାଶରେ ଆବର୍ଜନା ସୃଷ୍ଟି କରିଛି । ଏପରି କ୍ଷେତ୍ରରେ ସୁନୀତାଙ୍କ ପ୍ରତ୍ୟାବର୍ତ୍ତନ ଆହୁରି ବିଳମ୍ବିତ ହୋଇପାରେ । ଏପରିକି ପୃଥିବୀପୃଷ୍ଠରୁ ମହାକାଶକୁ ଯିବାକୁ ଥିବା ମିସନଗୁଡ଼ିକ ବି ଏହି କାରଣରୁ ବିଳମ୍ବିତ ହୋଇପାରେ । ଏହି ଆବର୍ଜନା ଗୁଡ଼ିକ ଅପସାରିତ ହେବାକୁ କିଛି ସପ୍ତାହ ଏପରିକି କିଛି ମାସ ଲାଗିପାରେ । ସେପର୍ଯ୍ୟନ୍ତ ସୁନୀତାଙ୍କ ପ୍ରତ୍ୟାବର୍ତ୍ତନ ବିଳମ୍ବ ହୋଇପାରେ ।