‘ପାରମ୍ପରିକ ସୁଫି ସଙ୍ଗୀତ’ରେ ଝଙ୍କୃତ ହେଲା ରବୀନ୍ଦ୍ର ମଣ୍ଡପ
‘ସମର୍ପଣ’ର ଦ୍ବିତୀୟ ସଂଧ୍ୟା
ଭୁବନେଶ୍ବର: ଆଜି ବି ଭକ୍ତି ସଙ୍ଗୀତର ସୁମଧୁର ଧ୍ବନି ରବୀନ୍ଦ୍ର ମଣ୍ଡପ ପ୍ରେକ୍ଷାଳୟକୁ ଭକ୍ତିମୟ କରି ଦେଇଥିଲା। ‘ପାରମ୍ପରିକ ସୁଫି ସଙ୍ଗୀତ’ ଓ ‘ଆତ୍ମାର ସଙ୍ଗୀତ’ର ଝଙ୍କାରରେ ଝଙ୍କୃତ ହୋଇଥିଲା ସମ୍ପୂର୍ଣ୍ଣ ପ୍ରେକ୍ଷାଳୟ। ଅବସର ଥିଲା, ‘ଭୁବନେଶ୍ବର ମ୍ୟୁଜିକ୍ ସର୍କଲ’ ପକ୍ଷରୁ ଆୟୋଜିତ ୧୦ମ ସୁଫି ଓ ଭକ୍ତି ସଙ୍ଗୀତ ବାର୍ଷିକୋତ୍ସବ ‘ସମର୍ପଣ’ର ଦ୍ବିତୀୟ ସଂଧ୍ୟା।
Sambad is now on WhatsApp
Join and get latest news updates delivered to you via WhatsApp
ଏହି ଅବସରରେ ରାଜସ୍ଥାନ ଯୋଧପୁରରୁ ଆସିଥିବା ଜନାବ୍ ୟାର୍ ମହମ୍ମଦ ଲାଙ୍ଗା ଓ ସାଥୀମାନେ ‘ପରମ୍ପରାଗତ ସୁଫି ସଙ୍ଗୀତ’ ଗାନ କରିଥିଲେ। ଏଥିରେ ମୁଖ୍ୟ ଗାୟକ ଭାବେ ଜନାବ୍ ଫାରୁକ୍ଖାନ୍ ଯୋଗ ଦେଇଥିବା ବେଳେ ୟାସିନ ଖାନ୍ ସଙ୍ଗୀତରେ କଣ୍ଠଦାନ କରିବା ସହ ହାର୍ମୋନିୟମ୍ ବାଦନ କରିଥିଲେ। ବୁନ୍ଦୁଖାନ ମଧ୍ୟ ସଙ୍ଗୀତ ଗାନ କରିଥିଲେ ଓ ଢୋଲକ୍ ବାଦନ କରିଥିଲେ ଶାକିର୍ ଖାନ୍।
କାର୍ଯ୍ୟକ୍ରମର ଦ୍ବିତୀୟ ପର୍ଯ୍ୟାୟରେ ‘ଆତ୍ମାର ସଙ୍ଗୀତ’ ପରିବେଷିତ ହୋଇଥିଲା। ପଶ୍ଚିମବଙ୍ଗ ନବଦ୍ବୀପର ବିଦୁଷୀ ଇଲା ଓ ଆୟୁଷୀ ବିଶ୍ବାସ ଏହି ସଙ୍ଗୀତ ପରିବେଷଣ କରିଥିବା ବେଳେ ସେମାନଙ୍କୁ ବଂଶୀରେ କାନାଇ ମଣ୍ଡଲ୍, ତବଲା ଓ ଢୋଲରେ ପାର୍ଥ ଘୋଷ୍, ହାର୍ମୋନିୟମ୍ରେ ବିକାଶ କୁମାର ଶର୍ମା ଓ ଦୋ ତାରାରେ ଚନ୍ଦନ ଦାସ ପ୍ରମୁଖ ସହଯୋଗ କରିଥିଲେ।
କାର୍ଯ୍ୟକ୍ରମରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ମଧୁସୂଦନ ପାଢ଼ୀ ମୁଖ୍ୟ ଅତିଥି, କଣ୍ଠଶିଳ୍ପୀ ସଙ୍ଗୀତା ଗୋସାଇଁ ଅନ୍ୟତମ ଅତିଥି ଭାବେ ଉପସ୍ଥିତ ଥିଲେ। କାର୍ଯ୍ୟକ୍ରମରେ ଭୁବନେଶ୍ବର ମ୍ୟୁଜିକ୍ ସର୍କଲର ସଭାପତି ଅରବିନ୍ଦ ବେହେରା ଓ ସମ୍ପାଦକ କ୍ଷୀରୋଦ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ।