ଟମାଟୋ ଦର କମିଲା : ମହୀଶୂରରେ କିଲୋ ପିଛା ୧୪ ଟଙ୍କା, ଭୁବନେଶ୍ବରରେ ୪୦
ନୂଆଦିଲ୍ଲୀ: କିଛି ସପ୍ତାହ ପୂର୍ବେ କେଜି ପିଛା ୨୫୦ ଟଙ୍କାରେ ବିକ୍ରି ହେଉଥିବା ଟମାଟୋ ଦାମ୍ ଏବେ ୧୪ ଟଙ୍କା ଭଳି ନିମ୍ନ ସ୍ତରକୁ ଖସିଆସିଛି। ବିଭିନ୍ନ ସ୍ଥାନରେ ଟମାଟୋ ଦାମ୍ ଏବେ ୧୪-୪୦ ଟଙ୍କା ମଧ୍ୟରେ ବିକ୍ରି ହେଉଛି। ଭୁବନେଶ୍ବରରେ ଟମାଟୋ କେଜି ୩୦-୪୦ ଟଙ୍କା ରହିଛି। କର୍ଣ୍ଣାଟକରେ କେଜି ପିଛା ୨୦ ଟଙ୍କାରେ, ମହୀଶୂରର ପାଇକାରୀ ବଜାରରେ ଟମାଟୋର କେଜି ପିଛା ଦାମ୍ ରବିବାର ୧୪ ଟଙ୍କା ଥିଲା। ଶନିବାର ତାହା ୨୦ ଟଙ୍କାରେ ବିକ୍ରି ହେଉଥିଲା। ଖୁଚୁରା ବଜାରରେ କିନ୍ତୁ ଟମାଟୋ ୩୦-୩୫ ଟଙ୍କାରେ ବିକ୍ରି ହେଉଛି। ବଜାରକୁ ନୂଆ ଫସଲ ଆସିବା ପରେ ଟମାଟୋ ମୂଲ୍ୟରେ ୯୦ ପ୍ରତିଶତ ଭଳି ହ୍ରାସ ଘଟିଛି। ନେପାଳରୁ ଟମାଟୋ ଆମଦାନି କରାଯିବା ପରେ ଉତ୍ତର ଭାରତ ରାଜ୍ୟଗୁଡ଼ିକରେ ଟମାଟୋ ଶସ୍ତା ହୋଇଛି। ପାଇକାରୀ ବଜାରରେ ଟମାଟୋ ୫-୧୦ ଟଙ୍କାରେ ବିକ୍ରି ହେଉଛି।
Sambad is now on WhatsApp
Join and get latest news updates delivered to you via WhatsApp
ଗତ ଜୁଲାଇରେ ହଠାତ୍ ଟମାଟୋ ଦାମ୍ ବଢ଼ିଯାଇଥିଲା। କିଛି ଦିନ ଭିତରେ ତାହାର ଦାମ୍ ୨୦୦ ଟଙ୍କା ଟପିଯିବାରୁ ସାଧାରଣ ଲୋକଙ୍କଠାରୁ ଆରମ୍ଭ କରି ସରକାର ଓ ରିଜର୍ଭ ବ୍ୟାଙ୍କ ସମସ୍ତେ ଚିନ୍ତିତ ହୋଇପଡ଼ିଥିଲେ। ଟମାଟୋ ଦରବୃଦ୍ଧି ଆନ୍ଧ୍ର, ତେଲେଙ୍ଗାନା ଓ କର୍ଣ୍ଣାଟକରେ କିଛି ଚାଷୀଙ୍କୁ କୋଟିପତି ମଧ୍ୟ କରିଦେଇଥିଲା। ଅଳ୍ପ କିଛି ଦିନ ଭିତରେ ଟମାଟୋ ଦାମ୍ ୧୪ ଟଙ୍କାକୁ ଖସିଆସିବାରୁ ଚାଷୀମାନେ କ୍ଷତି ସହିବେ ବୋଲି କୁହାଯାଉଛି। କାରଣ ଟମାଟୋର କେଜି ପିଛା ଉତ୍ପାଦନ ଖର୍ଚ୍ଚ ୧୦-୧୨ ଟଙ୍କା ରହୁଛି। ସେଥିରେ ୩ ଟଙ୍କାର ପରିବହନ ଖର୍ଚ୍ଚ ଯୋଡ଼ି ୧୪ ଟଙ୍କାରେ ବିକ୍ରି କଲେ ଚାଷୀଙ୍କୁ କୌଣସି ଲାଭ ମିଳିବ ନାହିଁ। ଏହା ବ୍ୟତୀତ ପ୍ୟାକେଜିଂ, ସଂରକ୍ଷଣ ଓ ବିକ୍ରି ଖର୍ଚ୍ଚ ବି ଅଲଗା ରହିଛି।