ଜୟପୁର: ବିଜେପି ପ୍ରଥମ ଥର ପାଇଁ ବିଧାୟକ ହୋଇଥିବା ଭଜନଲାଲ ଶର୍ମାଙ୍କୁ ରାଜସ୍ଥାନର ମୁଖ୍ୟମନ୍ତ୍ରୀ ଭାବେ ନିଯୁକ୍ତ କରିଛି। ରାଜନାଥ ସିଂହଙ୍କ ସହ ଅନ୍ୟ ପର୍ଯ୍ୟବେକ୍ଷକ ବିନୋଦ ତାୱଡେ ଓ ସରୋଜ ପାଣ୍ଡେଙ୍କ ମଧ୍ୟରେ ଆଲୋଚନା ପରେ ଏହି ଘୋଷଣା କରାଯାଇଛି। ଶ୍ରୀ ଶର୍ମା ଭରତପୁରର ବାସିନ୍ଦା ହୋଇଥିବା ବେଳେ ଏହି ଆସନରେ ବିଜୟ ସମ୍ଭାବନା ନ ଥିବାରୁ ସେଠାରୁ ଲଢ଼ିବା ପାଇଁ ତାଙ୍କୁ ଟିକେଟ୍ ଦିଆଯାଇ ନ ଥିଲା। ସେ ସାଙ୍ଗାନେରରୁ ନିର୍ବାଚନ ଲଢ଼ି ବିଜୟୀ ହୋଇଥିଲେ। ସେ ଜଣେ ସାଂଗଠନିକ ବ୍ୟକ୍ତି।
![Sambad Whatsapp](https://cdn-icons-png.flaticon.com/512/2504/2504957.png)
Sambad is now on WhatsApp
Join and get latest news updates delivered to you via WhatsApp
ସେ ସବୁଠାରୁ ଅଧିକ ସମୟ ଧରି ରାଜ୍ୟରେ ବିଜେପିର ସାଧାରଣ ସମ୍ପାଦକ ଭାବେ ଦାୟିତ୍ୱ ନିର୍ବାହ କରିଥିଲେ। ରାଜନୀତିରେ ନିଜର ପ୍ରାରମ୍ଭିକ ଦିନରେ ଶ୍ରୀ ଶର୍ମା ବିଜେପିର ଆଦର୍ଶ ରାଷ୍ଟ୍ରୀୟ ସ୍ୱୟଂସେବକ ସଂଘ (ଆର୍ଏସ୍ଏସ୍)ର ଛାତ୍ରଶାଖା ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି)ରେ କାର୍ଯ୍ୟ କରିଥିଲେ। ରାଜସ୍ଥାନରେ ଦଳର ଯେକୌଣସି କାର୍ଯ୍ୟକଳାପରେ ସେ ଯୋଗ ଦେଉଥିଲେ। ନିର୍ବାଚନ କମିସନଙ୍କ ନିକଟରେ ଦାଖଲ ସତ୍ୟପାଠରେ କୁହାଯାଇଛି ଯେ ୫୬ ବର୍ଷୀୟ ଶ୍ରୀ ଶର୍ମା ସ୍ନାତକୋତ୍ତର ପାସ୍ କରିଛନ୍ତି। ସେ ଦେଢ଼ କୋଟି ଟଙ୍କାର ସମ୍ପତ୍ତି ଘୋଷଣା କରିଛନ୍ତି, ଯେଉଁଥିରେ ୪୩.୬ ଲକ୍ଷ ଟଙ୍କାର ଅସ୍ଥାବର ଏବଂ ୧ କୋଟି ଟଙ୍କାର ସ୍ଥାବର ସମ୍ପତ୍ତି ରହିଛି।