ସୁଯୋଗ ମିଳିଲେ ମଧ୍ୟ ନିର୍ବାଚନମଣ୍ଡଳୀ ସ୍ବର୍ଣ୍ଣିମ ଅଧ୍ୟାୟ ରଚିବ: ଜଗନ୍ନାଥ
ଭୁବନେଶ୍ବର: ପ୍ରଚାରର ଶେଷ ଦିନରେ ଭୁବନେଶ୍ବର ମଧ୍ୟ ନିର୍ବାଚନମଣ୍ଡଳୀରେ ବିଜେପିର ବିଧାୟକ ପ୍ରାର୍ଥୀ ଜଗନ୍ନାଥ ପ୍ରଧାନ ଏକସଙ୍ଗେ ବାଇକ୍, କାର୍ ଓ ଅଟୋ ଶୋଭାଯାତ୍ରା କରି ଶକ୍ତି ପ୍ରଦର୍ଶନ କରିଛନ୍ତି। ମଧ୍ୟାହ୍ନ ୧୨ଟାରେ ଜଗନ୍ନାଥ ରସୁଲଗଡ଼ ଛକରୁ ହଜାର ହଜାର ସମର୍ଥକଙ୍କ ସହ ବମିଖାଲ, କଳ୍ପନା ଛକ,ଏଜି ଛକ, ସାଇନ୍ସ ପାର୍କ ଛକ ଓ ୟୁନିଟ-୬ ଅଞ୍ଚଳ ପରିକ୍ରମା କରିଥିଲେ। ବିଭିନ୍ନ ଛକରେ ସମର୍ଥକମାନେ ଜଗନ୍ନାଥଙ୍କୁ ସ୍ବାଗତ ସମ୍ବର୍ଦ୍ଧନା ଦେଇଥିବା ଦେଖିବାକୁ ମିଳିଥିଲା।
Sambad is now on WhatsApp
Join and get latest news updates delivered to you via WhatsApp
ଏହି ଅବସରରେ ଜଗନ୍ନାଥ କହିଛନ୍ତି ଯେ ମୋତେ ଥରୁଟିଏ ସୁଯୋଗ ଦିଅନ୍ତୁ, ମଧ୍ୟ ନିର୍ବାଚନ ମଣ୍ଡଳୀ ବିକାଶର ସ୍ବର୍ଣ୍ଣିମ ଅଧ୍ୟାୟ ରଚିବ। ଆପଣମାନଙ୍କ ସ୍ନେହ ଓ ବିଶ୍ବାସ ମୋର ଶକ୍ତି। ୨୫ ବର୍ଷ ବିଜେଡି ଶାସନରେ ମଧ୍ୟ ନିର୍ବାଚନମଣ୍ଡଳୀବାସୀଙ୍କୁ ବିକାଶ ବଦଳରେ ଡେଙ୍ଗୁ, ଜଳବନ୍ଦୀ ଓ ମୁକୁଳା ଡ୍ରେନ୍ ଉପହାର ମିଳିଛି। ବିଜେଡି ନେତା ନିର୍ବାଚନ ହାରିବା ଭୟରେ ହିଂସାକୁ ଆପଣାଇଛନ୍ତି। କିନ୍ତୁ ଏଥର ପରିବର୍ତ୍ତନ ନିଶ୍ଚିତ ହେବ। ଓଡ଼ିଶାରେ ବିଜେପି ସରକାର ଗଠନ ପାଇଁ ତାଙ୍କୁ ପଦ୍ମ ଫୁଲରେ ଭୋଟ୍ ଦେବାକୁ ନିବେଦନ କରିଥିଲେ।