ଶିକ୍ଷକଙ୍କ ଘରେ କଳା କନା ବୁଲାଇଲେ ଦୁର୍ବୃତ୍ତ, କବାଟ ଭାଙ୍ଗି ନେଇଗଲେ ଲକ୍ଷାଧିକ ଟଙ୍କାର ଆସବାବପତ୍ର
ଡାବୁଗାଁ: ନବରଙ୍ଗପୁର ଜିଲ୍ଲା ଡାବୁଗାଁ ଥାନା ସଦରରେ କିଛି ଦିନର ବିରତି ପରେ ପୁଣି ଚୋରି ଆରମ୍ଭ ହୋଇଛି | ଡାବୁଗାଁ ସଦର ଜୟନ୍ତିନଗରରେ ରହୁଥିବା ଜଣେ ଶିକ୍ଷକଙ୍କ ଘରୁ ଗତ ସୋମବାର ବିଳମ୍ବିତ ରାତିରେ ତାଙ୍କ ଅନୁପସ୍ଥିତିରେ ଘର ତାଲା ଭାଙ୍ଗି ଘରର ଆସବାବପତ୍ର ନେଇଯାଇଛନ୍ତି | ଏନେଇ ଶିକ୍ଷକ ଜଣକ ଡାବୁଗାଁ ଥାନାରେ ଏତଲା ଦେବା ପରେ ପୁଲିସ ତଦନ୍ତ ଆରମ୍ଭ କରିଛି |ସୂଚନା ଅନୁଯାୟୀ ଜୟନ୍ତିନଗରରେ ରହୁଥିବା ଶିକ୍ଷକ ଧନଞ୍ଜୟ ବଡ଼ଜେନା ପୁରୀରେ ଥିବା ନିଜ ସମ୍ପର୍କୀୟଙ୍କ ଲୋକର ଦଶାହ କାର୍ଯ୍ୟରେ ଯୋଗ ଦେବା ପାଇଁ ସପରିବାର ଘର ତାଲା ପକାଇ ଅଗଷ୍ଟ ମାସ ୨୩ ତାରିଖରେ ଯାଇଥିଲେ | ତେବେ ଶିକ୍ଷକଙ୍କ ଅନୁପସ୍ଥିତି ଯୋଗୁଁ ଦୁର୍ବୃତ୍ତମାନେ ଗତ ସୋମବାର ବିଳମ୍ବିତ ରାତିରେ ତାଙ୍କ ଘର କାନ୍ଥ ଡେଇଁ ମୁଖ୍ୟ କବାଟର ତାଲା ଭାଙ୍ଗି ଘରେ ପଶିଥିଲେ | ଆଉ ଲୁଟେରାମାନେ ମୂଲ୍ୟବାନ ସାମଗ୍ରୀ ସହ ନଗଦ ୪ ହଜାର ଟଙ୍କା ନେଇ ଯାଇଥିଲେ |
Sambad is now on WhatsApp
Join and get latest news updates delivered to you via WhatsApp
ଘରେ ଥିବା ୩୨ ଇଞ୍ଚର ଏଲଇଡି କଲର ଟିଭି, ଇଣ୍ଡକସନ୍ କରେଣ୍ଟ ଚୁଲା, ଟେବୁଲ୍ ଫ୍ୟାନ, ବାଜାଜ କମ୍ପାନୀର ମୂଲ୍ୟବାନ କିଚେନ୍ ସେଟ, ନଗଦ ୪ ହଜାର ଟଙ୍କା ସହ ଲୁଗାପଟା ନେଇ ଯାଇଛନ୍ତି | ଚୋରମାନେ ଘର ମଧ୍ୟରେ ତିନୋଟି କବାଟ ତାଲା ଭାଙ୍ଗି ସମସ୍ତ ସାମଗ୍ରୀ ଚୋରି ନେଇଥିଲେ | ମଙ୍ଗଳବାର ସକାଳ ସମୟରେ ଘର ତାଲା ଭାଙ୍ଗି ଚୋରି ହୋଇଥିବା ଜଣାପଡ଼ିବା ପରେ ସାହି ପଡିଶା ଲୋକେ ଶିକ୍ଷକ ଧନଞ୍ଜୟ ବଡ଼ଜେନାଙ୍କୁ ଫୋନ ମାଧ୍ୟମରେ ଜଣାଇଥିଲେ |
ଶିକ୍ଷକ ଜଣକ ତୁରନ୍ତ ପୁରୀରୁ ବାହାରି ବୁଧବାର ଦିନ ଡାବୁଗାଁରେ ପହଞ୍ଚିଥିଲେ | ଜୟନ୍ତିନଗର ନିଜ ଘରେ ଆସି ଦେଖିବାବେଳକୁ ଘରର ପ୍ରାୟ ସାମଗ୍ରୀ ଚୋରି ହୋଇଥିବା ଜାଣିଥିଲେ | ଏନେଇ ବୁଧବାର ଶିକ୍ଷକ ଜଣଙ୍କ ଡାବୁଗାଁ ଥାନାରେ ଏତଲା ଦେବା ପରେ ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛନ୍ତି | ପ୍ରକାଶ ଥାଉ କି ଡାବୁଗାଁ ସଦରରେ ଗତ ଦୁଇରୁ ତିନି ମାସ ମଧ୍ୟରେ ବିଭିନ୍ନ ସ୍ଥାନରେ ଚୋରି କରିଥିଲେ | ଯାହାକି ପୁଲିସର ମୁଣ୍ଡ ବ୍ୟଥା ହୋଇଥିଲା | ତେବେ ପୁଲିସ ଡାବୁଗାଁ ରେଭିନ୍ୟୁ ସାହିର ୪ ଜଣ ଚୋରକୁ ଧରିବାରେ ସକ୍ଷମ ହେବା ସହ ତାଙ୍କ ନିକଟରୁ ଚୋରି ସାମଗ୍ରୀ ଉଦ୍ଧାର କରି କୋର୍ଟ ଚାଲାଣ କରିଛି |