ପ୍ରୟାଗରାଜ: ଯୌତୁକ ନିର୍ଯ୍ୟାତନା ସହ ଜଡିତ ଏକ ମାମଲାରେ ଆହ୍ଲାବାଦ ହାଇକୋର୍ଟ ଏପରି ନିଷ୍ପତ୍ତି ଦେଇଛନ୍ତି ଯାହା ଏକ ଉଦାହରଣ ହୋଇପାରେ ବୋଲି ଚର୍ଚ୍ଚା ହେଉଛି। ଜଷ୍ଟିସ ବିକ୍ରମ ଡି ଚୌହାନଙ୍କ ବେଞ୍ଚ୍ କହିଛନ୍ତି ଯେ ଯୌତୁକ ଦାବି କରିବା ଅପରାଧ କିନ୍ତୁ ବୋହୂ କମ୍ ଯୌତୁକ ଆଣିଛି ବୋଲି କହିବା ଅପମାନ କରିବା ଅବା ଦଣ୍ଡନୀୟ ନୁହେଁ। ବୋହୂଙ୍କ ପକ୍ଷରୁ ଦୁଇ ନଣନ୍ଦ ଏବଂ ଦିଅରଙ୍କ ବିରୋଧରେ ଅଣାଯାଇଥିବା ଯୌତୁକ ନିର୍ଯ୍ୟାତନା ଅଭିଯୋଗକୁ ହାଇକୋର୍ଟ ଖାରଜ କରିଦେଇଛନ୍ତି।
![Sambad Whatsapp](https://cdn-icons-png.flaticon.com/512/2504/2504957.png)
Sambad is now on WhatsApp
Join and get latest news updates delivered to you via WhatsApp
କୋର୍ଟ କହିଛନ୍ତି ଯେ ପୀଡିତାଙ୍କ ଉପରେ ଆକ୍ରମଣ ଅଭିଯୋଗ ଆସିଛି କିନ୍ତୁ ଡକ୍ୟୁମେଣ୍ଟାରୀ ପ୍ରମାଣ ଭାବରେ କୌଣସି ଡାକ୍ତରୀ ରିପୋର୍ଟ ଉପଲବ୍ଧ ନାହିଁ। ନିର୍ଯ୍ୟାତନା ଅଭିଯୋଗ ସାଧାରଣ ପ୍ରକୃତିର ।
ଏହି ସମଗ୍ର ବିଷୟ ବଦାଉଁ ଜିଲ୍ଲାର ବିଲସି ପୁଲିସ୍ ଷ୍ଟେସନ୍ ଅଞ୍ଚଳର। ୭ ମେ’ ୨୦୧୭ରେ, ଜଣେ ଯୁବତୀ ଶବାନ ଖାନଙ୍କୁ ବିବାହ କରିଥିଲେ। ସେହିବର୍ଷ ଡିସେମ୍ବରରେ ସେ ତାଙ୍କ ସ୍ୱାମୀ, ଶାଶୁ, ଦିଅର ଏବଂ ଦୁଇ ନଣନ୍ଦଙ୍କ ବିରୋଧରେ ଯୌତୁକ ନିର୍ଯାତନା ମାମଲା ଦାଏର କରିଥିଲେ।
ସେ ଅଭିଯୋଗ କରିଥିଲେ ଯେ ବିବାହ ସମୟରେ ସ୍ୱାମୀ ଏକ କାର ମାଗିଥିଲେ। ତେବେ ତାଙ୍କୁ ତାହା ଦିଆଯାଇ ପାରି ନ ଥିଲା। ସମସ୍ତ ଅଭିଯୁକ୍ତ ତାଙ୍କୁ କମ୍ ଯୌତୁକ ପାଇଁ କହୁଥିଲେ। ଏହା ସହିତ ମାଡ ମାରି ଘରୁ ବାହାର କରି ଦେଇଥିଲେ। ପୋଲିସ କୋର୍ଟରେ ସମସ୍ତ ଅଭିଯୁକ୍ତଙ୍କ ବିରୋଧରେ ଚାର୍ଜସିଟ୍ ଦାଖଲ କରିଥିଲା।
ତାଙ୍କ ସ୍ୱାମୀ ଶବାନ ଖାନଙ୍କ ସମେତ ସମସ୍ତ ଅଭିଯୁକ୍ତ ୨୦୧୮ରେ ଚାର୍ଜସିଟ ବିରୋଧରେ ହାଇକୋର୍ଟରେ ଆବେଦନ କରିଥିଲେ। ସ୍ୱାମୀଙ୍କ ଆବେଦନକୁ ହାଇକୋର୍ଟ ଖାରଜ କରିଥିଲେ ମଧ୍ୟ ଅବଶିଷ୍ଟ ଆବେଦନର ଶୁଣାଣି କରିଥିଲେ। ହାଇକୋର୍ଟରେ ଶୁଣାଣି ସମୟରେ ଯୁବତୀଙ୍କର ଶାଶୁଙ୍କର ମୃତ୍ୟୁ ହୋଇ ଯାଇଥିଲା। ଅବଶିଷ୍ଟ ଆବେଦନ ଉପରେ ବିଚାର କରୁଥିବାବେଳେ କୋର୍ଟ ଦୁଇ ନଣନ୍ଦ ଏବଂ ଦିଅରଙ୍କ ବିରୋଧରେ ଯୌତୁକ ନିର୍ଯ୍ୟାତନା ଅଭିଯୋଗକୁ ଖାରଜ କରିଦେଇଛନ୍ତି।