ବିଜେପି ଇଙ୍ଗିତରେ ଭକ୍ତ କାମ କରୁଛନ୍ତି: ବିଜେଡି

ଭୁବନେଶ୍ୱର : ଓଡ଼ିଶା କଂଗ୍ରେସ ହେଉଛି ଓଡ଼ିଶା ବିଜେପିର ବି-ଟିମ୍। ଗତ ଦୁଇ ଦିନ ହେଲା ଆମେ ଏକଥା କହୁଛୁ। ହେଲେ ଆଶ୍ଚର୍ଯ୍ୟର ବିଷୟ; ଓଡିଶା କଂଗ୍ରେସ କି ଓଡିଶା ବିଜେପି କେହି ଏହାକୁ ଖଣ୍ଡନ କରୁନାହାନ୍ତି। ସେମାନଙ୍କର ନିରବତା ଆମର ବିବୃତିକୁ ସତ ପ୍ରମାଣିତ କରୁଛି। କଂଗ୍ରେସ ନେତା ଭକ୍ତ ଚରଣ ଦାସଙ୍କ ଆଜିର ସାମ୍ବାଦିକ ସମ୍ମିଳନୀ ଓଡିଶା କଂଗ୍ରେସ ଦ୍ୱାରା ବି-ଟିମ୍‍ ଉଦ୍ୟମର ଏକ ନିୟମିତ କାର୍ଯ୍ୟକ୍ରମ ବୋଲି ବିଜେଡିର ରାଷ୍ଟ୍ରୀୟ ମୁଖପାତ୍ର ସସ୍ମିତ ପାତ୍ର କହିଛନ୍ତି।

ଶ୍ରୀ ପାତ୍ର ଅଭିଯୋଗ କରିଛନ୍ତି ଯେ ଭକ୍ତ ଦାସ ବିହାରରେ ବିଜେପିର ଏଜେଣ୍ଟ ଭାବେ କାର୍ଯ୍ୟ କରି ଆରଜେଡି-କଂଗ୍ରେସ ମହାମେଣ୍ଟକୁ ଭାଙ୍ଗିବା କାର୍ଯ୍ୟ କରିଥିଲେ। ବିହାରରେ ବିଜେପି ତାଙ୍କୁ ସଫଳତାର ସହ ବ୍ୟବହାର କରିବା ପରେ ଓଡିଶା ବିଜେପି ବର୍ତ୍ତମାନ ତାଙ୍କୁ କାଳାହାଣ୍ଡିରେ ଏହାର ରାଜନୈତିକ ଏଜେଣ୍ଟ ଭାବରେ ବ୍ୟବହାର କରୁଛି।
କଂଗ୍ରେସ ସାମ୍ବାଦିକ ସମ୍ମିଳନୀର ଜବାବ ଦେଇ ବିଜେଡି ମୁଖପାତ୍ର ଶ୍ରୀ ପାତ୍ର କହିଛନ୍ତି ଯେ କଂଗ୍ରେସ ପକ୍ଷରୁ ଆଜି ଯେଉଁ ଟ୍ରଷ୍ଟ୍ ଦଲିଲ ଉପସ୍ଥାପନ କରାଯାଇଛି ସେଥିରୁ ଜଣାପଡୁଛି ଯେ ଭକ୍ତ ଦାସଙ୍କ ପୁଅ କ୍ରାନ୍ତି ଟ୍ରଷ୍ଟ୍‌ର ପ୍ରତିଷ୍ଠାତା ଟ୍ରଷ୍ଟି, ସଭାପତି ଏବଂ ଅଧ୍ୟକ୍ଷ ଥିବା ମମିତା ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ସହ ମିଶି ଏହାକୁ ଚଳାଉଥିଲେ। ପ୍ରଶ୍ନ ପଚାରିବା ପୂର୍ବରୁ ସେ ଦେଖାଉଥିବା ଦଲିଲ ଅସଲି କି ନୁହେଁ ଶ୍ରୀ ଦାସ ତାହାର ଉତ୍ତର ଦେବା ଉଚିତ। ତାଙ୍କ ପୁଅ ମହାଲିଙ୍ଗ କଲେଜ ଚଳାଉଥିବା ଟ୍ରଷ୍ଟର ପ୍ରତିଷ୍ଠାତା ଟ୍ରଷ୍ଟି ଥିଲେ କି ନାହିଁ ଏବଂ ଯେତେବେଳେ ଶ୍ରୀ ଦାସଙ୍କ ପୁଅ ଏହି ଟ୍ରଷ୍ଟର ସଭାପତି ଥିଲେ ସେତେବେଳେ ଅଧ୍ୟକ୍ଷ ଭାବରେ ଗୋବିନ୍ଦ ସାହୁ ଥିଲେ କି ନାହିଁ ତାହାର ଉତ୍ତର ରଖିବା ଦରକାର।

ଅଭିଯୁକ୍ତ ଏବଂ ପୀଡିତାଙ୍କ ସହିତ ଶ୍ରୀ ଦାସଙ୍କର ଯେଉଁ ଫଟୋ ରହିଛି ତାହା ୨୦୨୦ରେ ଏକ ଉଦ୍‍ଘାଟନ କାର୍ଯ୍ୟକ୍ରମ ସମୟର କି? ଯଦି କାଗଜପତ୍ର ପ୍ରମାଣ, ଫଟୋ ଏବଂ ଭିଡିଓ ଏକ ଅପରାଧ ସହିତ ଜଡିତ ହେବାର ପ୍ରମାଣ, ତେବେ ଆମେ ଆପଣଙ୍କ ଆଗରେ କାଗଜପତ୍ରର ପ୍ରମାଣ ରଖିଛୁ ଯେଉଁଥିରେ ଶ୍ରୀ ଦାସ ମହାଲିଙ୍ଗ କଲେଜ ଏବଂ ଅଭିଯୁକ୍ତଙ୍କ ନିକଟତର ରହିଛନ୍ତି ବୋଲି ଶ୍ରୀ ପାତ୍ର କହିଛନ୍ତି। ସେ ଆହୁରି କହିଛନ୍ତି ଯେ ଯଦି ଜଣେ ମନ୍ତ୍ରୀ ମୁଖ୍ୟ ଅଭିଯୁକ୍ତଙ୍କ ସହ ଦେଖାଯାଉଛନ୍ତି ଏବଂ ଅଭିଯୁକ୍ତ କରିଥିବା ଅପରାଧ ସହ ଜଡିତ ହେବାର ପ୍ରମାଣ ହେଉଛି, ତେବେ ସମାନ ତର୍କ ଦ୍ୱାରା ଭକ୍ତ ଦାସ ମଧ୍ୟ ବହୁତ ବଡ ଅପରାଧୀ। ଶ୍ରୀ ଦାସ ସ୍ୱୀକାର କରିଛନ୍ତି ଯେ ସେ ତାଙ୍କ ସାଂସଦ ହାତପାଣ୍ଠିରୁ ମହାଲିଙ୍ଗ କଲେଜକୁ ବାରମ୍ବାର ଅର୍ଥ ପ୍ରଦାନ କରିଛନ୍ତି, କଲେଜରେ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଇଛନ୍ତି, ଯାହା ଆମେ ଦେଖାଉଛୁ। ଶ୍ରୀ ଦାସଙ୍କ ଯୁକ୍ତି ଆଧାରରେ ତାଙ୍କୁ ମଧ୍ୟ ଗିରଫ କରାଯିବା ଉଚିତ୍‍। ଆଇନ୍‌ର ଶାସନ ବୋଲି ଏ ଦେଶରେ କିଛି ଅଛି। ଯାହା ସବୁବେଳେ ତଥ୍ୟ ପ୍ରମାଣ ଆବଶ୍ୟକ କରେ, ଯାହା ଶ୍ରୀ ଦାସଙ୍କ ପାଖରେ ନାହିଁ ଏବଂ ସେଥିପାଇଁ ସେ ମିଥ୍ୟା ଏବଂ ଭିତ୍ତିହୀନ କଥା କହୁଛନ୍ତି।

 

ଯେହେତୁ ଶ୍ରୀ ଦାସ ମହାଲିଙ୍ଗ କଲେଜର ଜଣେ ଛାୟା ମାଲିକ ଥିଲେ, ସେ ମହାଲିଙ୍ଗ କଲେଜ ସହ ଜଡିତ ପ୍ରଶ୍ନର ଉତ୍ତର ଦେବା ଆରମ୍ଭ କରିବା ଉଚିତ। ଯଦି ତାଙ୍କ ନିକଟରେ କିଛି ପ୍ରମାଣ ଅଛି, ତେବେ ସେ ମହାଲିଙ୍ଗ କଲେଜର ମାଲିକ ହୋଇଥିବାରୁ ଓଡ଼ିଶା ହାଇକୋର୍ଟରେ ଜନସ୍ୱାର୍ଥ ମାମଲା ଦାଖଲ କରନ୍ତୁ ଏବଂ ମାନ୍ୟବର କୋର୍ଟଙ୍କୁ ଏହା ଉପରେ ନିଷ୍ପତ୍ତି ନେବାକୁ ଦିଅନ୍ତୁ ବୋଲି ଶ୍ରୀ ପାତ୍ର କହିଛନ୍ତି।