ମାଲକାନଗିରି ଡିଏଚଏଚକୁ ମିଳିଲା ଜାତୀୟ ଗୁଣବତ୍ତା ନିଶ୍ଚିତତା ମାନକ
ମାଲକାନଗିରି: ଭାରତ ସରକାର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ଜାତୀୟ ଗୁଣବତ୍ତା ନିଶ୍ଚିତତା ମାନକ ପ୍ରମାଣପତ୍ର (ଏନକ୍ୟୁଏଏସ) ମିଳିଛି। ଦେଶରେ ବିଭିନ୍ନ ଚିକିତ୍ସାଳୟର ଗୁଣବତ୍ତା ସର୍ଭେ ହୋଇଥିବା ବେଳେ ଓଡିଶା ରାଜ୍ୟରୁ ୨୦୨୪ ମସିହା ପାଇଁ ଗୋଟିଏ ଚିକିତ୍ସାଳୟ ମିଳିଥିବା ନେଇ ଜଣାପଡିଛି। ଏହାକୁ ହାସଲ କରିବା ପରେ ମାଲାକନଗିରି ଜିଲ୍ଲା ଚିକିତ୍ସାଳୟରେ କର୍ମଚାରୀଙ୍କ ମଧ୍ୟରେ ଖୁସିର ଲହରି ଦେଖିବାକୁ ମିଳିଛି।
Sambad is now on WhatsApp
Join and get latest news updates delivered to you via WhatsApp
ମାଲକାଗିରି ଜିଲ୍ଲା ସ୍ବାସ୍ଥ୍ୟ ଅଧିକାରୀ ଡା. ପ୍ରଫୁଲ କୁମାର ନନ୍ଦଙ୍କ କହିବାନୁଯାୟୀ, ୨୦୨୩ ମସିହା ଜୁଲାଇ ମାସ ୨୪ ତାରିଖରୁ ୨୭ ତାରିଖ ପର୍ଯ୍ୟନ୍ତ ତିନି ଦିନ ଟିମ୍ ଆସି ସର୍ଭେ କରିଥିଲେ। ଜାତୀୟ ସ୍ତରରୁ ଡା ଯୋସୁଆ ଅଭିଶେଖ, ଡା. ଭି.କେ ସୁମିତ୍ରା ଓ ଡା ଶିଶିର କୁମାର ନକ୍ସର ମାଲାକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଗୁଣବତ୍ତା ଦେଖିଥିଲେ। ସେମାନେ ଚିକିତ୍ସାଳୟର ଦୁର୍ଘଟଣା ଓ ଜରୁରୀକାଳନୀ ଚିକିତ୍ସା, ରକ୍ତଭଣ୍ଡାର, ବର୍ହିଃବିଭାଗ, ଅର୍ନ୍ତଃବିଭାଗ, ଆଇସିୟୁ, ପ୍ରସୂତି ବିଭାଗ, ଶିଶୁରୋଗ ବିଭାଗ, ଏସଏନସିୟୁ, ଏନଆରସି, ଅସ୍ତ୍ରୋପଚାର କକ୍ଷ, ପାଥୋଲୋଜି, ରେଡିଓଲୋଜି, ଫାର୍ମାସୀ, ଅକ୍ସୁଲାରୀ, ଶବ ସଂରକ୍ଷିତ ଗୃହ, ଲେବରରୁମ୍, ମେଟରନିଟି ଅପରେସନ ଟିଏଟର (ଏମଓଟି) ଓ ସାଧାରଣ ପ୍ରଶାସନ ଭଳି ୧୯ଟି ବିଭାଗରେ ସେ ସର୍ଭେ କରିଥିଲେ। ଏହି ସର୍ଭେ ରିପୋର୍ଟକୁ ନେଇ ଭାରତ ସରକାର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟଙ୍କୁ ପ୍ରଦାନ କରିଥିଲେ। ସେଠାରୁ ଯାଞ୍ଚ କରିବା ପରେ ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ଶତକଡା ୮୮ ପ୍ରତିଶତ ପ୍ରଦାନ କରିଥିଲେ। ଏହି ପ୍ରମାଣପତ୍ର ପ୍ରଦାନ କରିଥିବା ବେଳେ ଜାତୀୟ ଗୁଣବତ୍ତା ନିଶ୍ଚିତତା ମାନକ ମଧ୍ୟରେ ଏହି ଚିକିତ୍ସାଳୟକୁ ୩ ବର୍ଷ ପର୍ଯ୍ୟନ୍ତ ପ୍ରୋତ୍ସାହନ ରାଶି ପ୍ରଦାନ କରିବେ।
ଜିଲ୍ଲା ମୁଖ୍ୟ ଚିକିତ୍ସାଳୟରେ ଥିବା ପ୍ରତ୍ୟେକ ଶଯ୍ୟାକୁ ବର୍ଷକୁ ୧୦ ହଜାର ଟଙ୍କା ଲେଖାଏଁ ତିନି ବର୍ଷ ପର୍ଯ୍ୟନ୍ତ ପ୍ରଦାନ କରିବେ। ଏଥିସହ ଗୋଟିଏ ବର୍ଷ ପରେ ପୁଣି ଜାତୀୟ ସ୍ତରରୁ ଗୋଟିଏ ଟିମ୍ କେବଳ ବର୍ହିଃବିଭାଗ ଆସି ପରିଦର୍ଶନ କରି ଯିବେ ବୋଲି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଶ୍ରୀ ନନ୍ଦ କହିଛନ୍ତି। ରାଜ୍ୟରେ ଗୋଟିଏ ଚିକିତ୍ସାଳୟ ଏହି ପ୍ରମାଣପତ୍ର ପାଇଥିବା ବେଳେ ମାଲକାନଗିରି ଜିଲ୍ଲା ପାଇଁ ଏହା ଗୌରବର ବିଷୟ ଅଟେ। ଆସନ୍ତା ଦିନରେ ଆୟୋଜିତ କାର୍ଯ୍ୟକ୍ରମରେ ଏହି ପୁରସ୍କାର ମିଳିବ ବୋଲି କହିଛନ୍ତି। ଏଥିସହ ଲେବର ରୁମ ଓ ମେଟରନିଟି ଓଟି ପାଇଁ ଲକ୍ଷ୍ୟ ପୁରସ୍କାର ମଧ୍ୟ ପାଇଥିବା ନେଇ ସେ ପ୍ରକାଶ କରିଛନ୍ତି। ଲେବର ରୁମ ପାଇଁ ଶତକଡା ୯୪ ପ୍ରତିଶତ ଓ ଏମଓଟି ପାଇଁ ଶତକଡା ୯୬ ପ୍ରତିଶତ ମିଳିଥିବା ସେ ପ୍ରକାଶ କରିଛନ୍ତି।