ନୂଆଦିଲ୍ଲୀ: ୧୯୯୩ ମୁମ୍ବାଇ ବୋମା ବିସ୍ଫୋରଣରେ ଦୋଷୀ ମହମ୍ମଦ ଅଲି ଖାନଙ୍କୁ କୋଲହାପୁର ଜେଲରେ ଅତି ନିର୍ମମ ଭାବେ ହତ୍ୟା କରାଯାଇଛି। ପୁଲିସର ସୂଚନାନୁସାରେ, ଜେଲରେ ନ୍ୟାୟିକ ହେପାଜତରେ ଥିବା ପାଞ୍ଚଜଣ ଅଭିଯୁକ୍ତ ରବିବାର ଏହି ହତ୍ୟାକାଣ୍ଡ ଘଟାଇଛନ୍ତି। ଏହି ଅଭିଯୁକ୍ତମାନେ ମହମ୍ମଦ ଅଲି ଖାନଙ୍କ ମୁଣ୍ଡ ଫଟାଇଦେଇଥିଲେ, ଏହା ପରେ ତାଙ୍କର ମୃତ୍ୟୁ ହୋଇଥିଲା। ୧୯୯୩ ମୁମ୍ବାଇ ବିସ୍ଫୋରଣର ଚାରିଜଣ ଦୋଷୀଙ୍କୁ କୋଲହାପୁର ଜେଲରେ ରଖାଯାଇଛି, ଯେଉଁଥିରୁ ଜଣେ ଦୋଷୀଙ୍କର ନାମ ମହମ୍ମଦ ଅଲି ଖାନ। ଅନ୍ୟ ଏକ ମାମଲାରେ ନ୍ୟାୟିକ ହେପାଜତରେ ଥିବା ୫ ଜଣ ଅଭିଯୁକ୍ତଙ୍କୁ ମହମ୍ମଦ ଅଲି ଖାନଙ୍କ ବ୍ୟାରେକରେ ରଖାଯାଇଥିଲା। ପୁଲିସର ସୂଚନାନୁସାରେ ହତ୍ୟା ମାମଲାରେ ଅଭିଯୁକ୍ତଙ୍କ ନାମ ପ୍ରତାପ ପାଟିଲ, ଦୀପକ ଖୋଟ, ସନ୍ଦୀପ ଚୌହାନ, ରିତୁରାଜ ଇନମଦାର ଏବଂ ସୌରଭ ସିଦ୍ଧ। ଜେଲ ବିଭାଗର ଡେପୁଟି ଇନ୍ସପେକ୍ଟର ସ୍ଵାତି ସାଥେଙ୍କ କହିବା ଅନୁଯାୟୀ ମୃତ ମହମ୍ମଦ ଅଲି ଖାନଙ୍କ ସମେତ ଏହି ସମସ୍ତ ଅଭିଯୁକ୍ତ ସମାନ ବ୍ୟାରେକରେ ରହୁଥିଲେ।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି ଯେ ଏହି କାରଣରୁ ସେମାନଙ୍କ ମଧ୍ୟରେ କୌଣସି ବିବାଦ ଥିଲା କି ନାହିଁ ପୁଲିସ ତଦନ୍ତ କରୁଛି। ବର୍ତ୍ତମାନ ଜେଲ ଭିତରେ ଏହି ହତ୍ୟା ପରେ ଜେଲ ବିଭାଗ କୋଲହାପୁର ଜେଲରେ ମୁମ୍ବାଇ ବିସ୍ଫୋରଣର ଅନ୍ୟ ଅଭିଯୁକ୍ତଙ୍କ ସୁରକ୍ଷା ବୃଦ୍ଧି କରିଛି। ଜେଲ ଭିତରେ ଏହି ହତ୍ୟା ଘଟଣାର ମୁଖ୍ୟ କାରଣ କ’ଣ ତାହା ଉପରେ ତଦନ୍ତ ଆରମ୍ଭ ହୋଇଛି। କୋଲହାପୁର ଜେଲରେ ମୁମ୍ବାଇ ବୋମା ବିସ୍ଫୋରଣ ମାମଲାରେ ମହମ୍ମଦ ଅଲି ଖାନ ଆଜୀବନ କାରାଦଣ୍ଡ ଭୋଗୁଥିଲେ। ଏହି ପାଞ୍ଚ ଅଭିଯୁକ୍ତଙ୍କ ବିରୋଧରେ ପୁଲିସ ହତ୍ୟା ମାମଲା ରୁଜୁ କରିଛି। ଉଲ୍ଲେଖ ଥାଉ କି ମାର୍ଚ୍ଚ ୧୨, ୧୯୯୩ରେ ବମ୍ବେ ଷ୍ଟକ୍ ଏକ୍ସଚେଞ୍ଜର ୨୮ ମହଲା କୋଠାର ତଳ ମହଲାରେ ଏକ ବଡ଼ ବିସ୍ଫୋରଣରେ ୫୦ ଜଣଙ୍କର ମୃତ୍ୟୁ ଘଟିଥିଲା। ଅଧ ଘଣ୍ଟା ପରେ ଦ୍ୱିତୀୟ ବିସ୍ଫୋରଣ ଏକ କାରରେ ଘଟିଥିଲା ଏବଂ ପରେ ଗୋଟିଏ ପରେ ଗୋଟିଏ ବିସ୍ଫୋରଣ ଆରମ୍ଭ ହୋଇଥିଲା | ଦୁଇ ଘଣ୍ଟା ମଧ୍ୟରେ ମୁମ୍ବାଇର ୧୨ଟି ସ୍ଥାନରେ ୧୩ଟି ବିସ୍ଫୋରଣ ହୋଇଥିଲା। ଏହି ବିସ୍ଫୋରଣରେ ୨୫୭ ଜଣଙ୍କର ମୃତ୍ୟୁ ଘଟିଥିବା ବେଳେ ୭୨୩ ଜଣ ଆହତ ହୋଇଥିଲେ।