ବୀରମହାରାଜପୁର: ମହାନଦୀର ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ହୀରାକୁଦ ଜଳଭଣ୍ଡାରରୁ ଗତକାଲି ରାତି ସୁଦ୍ଧା ୨୮ଟି ଗେଟ ଦେଇ ଜଳ ନିସ୍କାସନ କରାଯାଉଛି। ଫଳରେ ମହାନଦୀରେ ବନ୍ୟା ପରିସ୍ଥିତି ଦେଖାଦେଇଛି । ମହାନଦୀର ତଳ ମୁଣ୍ଡରେ ଥିବା ସୁବର୍ଣ୍ଣପୁର ଜିଲ୍ଲାର ସମ୍ଭାବିତ ବନ୍ୟା ପ୍ରଭାବିତ ଅଂଚଳରେ ଥିବା ଲୋକ ଏବେ ଆତଙ୍କିତ ଅବସ୍ଥାରେ । ଅନେକ ଚାଷ ଜମି ଜଳମଗ୍ନ ହୋଇଥିବା ଦେଖିବାକୁ ମିଳିଛି ।
Sambad is now on WhatsApp
Join and get latest news updates delivered to you via WhatsApp
ସେହିପରି ମୁଣ୍ଡୋଘାଟ ବ୍ରିଜ ଉପରେ ୩ ଫୁଟର ପାଣି ରହି ଥିବାରୁ ସୁବର୍ଣ୍ଣପୁର-ରେଢାଖୋଲ ରାସ୍ତାରେ ଯାତାୟାତ ବାଧା ପ୍ରାପ୍ତ ହୋଇଛି । ଏହା ସହିତ ବୀରମହାରାଜପୁର ବ୍ଲକ ଖମ୍ବେଶ୍ୱରୀ ପାଲି, ବୁରୋଘାଟ, ନୁଆପାଲି, ଦେଉଳି, କେଲଗା ଆଦି ନଈକୂଳିଆ ଅଞ୍ଚଳରେ ଚାଷ ଜମିରେ ପାଣି ମାଡି ଯାଇଛି । ତେବେ ଉପର ମୁଣ୍ଡରେ ବର୍ଷା ଜାରି ରହିଲେ ବନ୍ୟା ପରିସ୍ଥିତି ଗମ୍ଭୀର ହେବ ବୋଲି ଆଶଙ୍କା କରାଯାଉଛି।
ଅନ୍ୟପଟରେ ମହାନଦୀରେ ଚଳିତ ବର୍ଷ ପ୍ରଥମ ଥର ପାଇଁ ଅଧିକ ବନ୍ୟାଜଳ ପ୍ରବାହିତ ହୋଇଥିବାରୁ ଆଖପାଖ ଗାଁର ଲୋକମାନେ ପାଣି ଦେଖିବାକୁ ପହଂଚିଛନ୍ତି। ଯୁବପିଢ଼ି ମହାନଦୀର ଗୋଲିଆ ପାଣି ଦେଖି ଉତ୍ସାହିତ ହୋଇଛନ୍ତି। ଯୁବକମାନେ ମହାନଦୀ କୂଳରେ ମୋବାଇଲରେ ସେଲ୍ଫି ନେଇଛନ୍ତି।