ପ୍ରତିବାଦ ବେଳେ କୌଣସି କୃଷକଙ୍କ ମୃତ୍ୟୁର ରେକର୍ଡ ନାହିଁ; ତେଣୁ ଆର୍ଥିକ ସହାୟତା ମିଳିବ ନାହିଁ: ସଂସଦରେ କହିଲେ ସରକାର
ନୂଆଦିଲ୍ଲୀ: ନୂଆ କୃଷି ଆଇନକୁ ପ୍ରତ୍ୟାହାର କରିନେବାକୁ ଦିଲ୍ଲୀ ସୀମାନ୍ତ ଅଞ୍ଚଳରେ ଡେରା ପକାଇ ପ୍ରତିବାଦ କରିଥିବା କୃଷକମାନଙ୍କ ମୃତ୍ୟୁ ସଂକ୍ରାନ୍ତ କୌଣସି ରେକର୍ଡ ସରକାରଙ୍କ ପାଖରେ ନ ଥିବା କଥା ଆଜି କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ର ସିଂହ ତୋମାର ପାର୍ଲାମେଣ୍ଟ୍କୁ ସୂଚନା ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଦୀର୍ଘ ବର୍ଷେ ଧରି ଚାଲିଥିବା ପ୍ରତିବାଦରେ ପ୍ରାଣ ହରାଇଥିବା କୃଷକମାନଙ୍କ ପରିବାରବର୍ଗଙ୍କୁ କେନ୍ଦ୍ର ସରକାର ଆର୍ଥିକ ସହାୟତା ଦେବେ କି, ନାହିଁ ବୋଲି ବିରୋଧୀମାନେ ପଚାରି ଥିବା ପ୍ରଶ୍ନର ଲିଖିତ ଉତ୍ତର ଦେଇ କେନ୍ଦ୍ର ମନ୍ତ୍ରୀ ତୋମାର କହିଲେ, ଏ ବିଷୟରେ କୃଷି ମନ୍ତ୍ରାଳୟ ନିକଟରେ କୌଣସି ରେକର୍ଡ ନାହିଁ। ସୁତରାଂ ସେ ପ୍ରଶ୍ନ ଉଠୁନାହିଁ।
କୃଷକ ନେତାମାନେ କିନ୍ତୁ, କହି ଆସୁଛନ୍ତି ଯେ, ୨୦୨୦ ନଭେମ୍ବର ଠାରୁ ବିବାଦୀୟ କୃଷି ଆଇନ ବିରୋଧରେ ସିଂଘୁ, ଟିକ୍ରି ଏବଂ ଗାଜିପୁର ସୀମାନ୍ତରେ ପ୍ରତିବାଦ କରିବା ବେଳେ ୭୦୦ କୃଷକ ପ୍ରାଣ ହରାଇଛନ୍ତି। ମୁଖ୍ୟତଃ ଖରାପ ପାଗ, ଅସ୍ବାସ୍ଥ୍ୟକର ପରିସ୍ଥିତି ସଂସ୍ପର୍ଶଜନିତ ଅସୁସ୍ଥତା ଏବଂ ଆତ୍ମହତ୍ୟା ଯୋଗୁଁ ସେମାନଙ୍କର ମୃତ୍ୟୁ ଘଟିଛି।
ତେଣେ, ପ୍ରତିବାଦକାରୀ କୃଷକମାନେ ସେମାନଙ୍କ ଦାବିରେ ଅଟଳ ଅଛନ୍ତି। ବାକି ସମସ୍ୟାଗୁଡ଼ିକ ବିଷୟରେ ଆଲୋଚନା କରିବା ଲାଗି ସରକାର ବ୍ୟବସ୍ଥା କରନ୍ତୁ ବୋଲି ‘ସଂଯୁକ୍ତ କିଷାନ୍ ମୋର୍ଚ୍ଚା’ କହୁଛି।