ଗୌହାଟୀ: ଟିଏମସିରେ ଯୋଗଦେବାର ଗୋଟିଏ ଦିନ ପରେ କଂଗ୍ରେସ ନେତା ତଥା ପୂର୍ବତନ ରାଜ୍ୟସଭା ସାଂସଦ ରିପୁନ ବୋରା କଂଗ୍ରେସ ଛାଡିବାର କାରଣ ବାବଦରେ ଆଜି କହିଛନ୍ତି | ରିପୁନ୍ ବୋରା କହିଛନ୍ତି ଯେ ଦେଶର ସର୍ବ ପୁରାତନ ଦଳ କଂଗ୍ରେସ, ବିଜେପି ସହିତ ଲଢ଼ିବା ପରିବର୍ତ୍ତେ ନିଜ ମଧ୍ୟରେ ଲଢେଇ କରୁଛି । କଂଗ୍ରେସ ନେତାମାନେ କ୍ଷମତା ପାଇଁ ପରସ୍ପର ମଧ୍ୟରେ ଲଢେଇ କରୁଛନ୍ତି | ରିପୁନ୍ ବୋରା କହିଛନ୍ତି ଯେ ମୁଁ ଚାଳିଶ ବର୍ଷ ଧରି କଂଗ୍ରେସ ଦଳ ସହିତ ଥିଲି କିନ୍ତୁ ଗତକାଲି ମୁଁ ଦଳ ଛାଡିଥିଲି | ଦଳ କିମ୍ବା ଏହାର ନେତାଙ୍କ ସହ ମୋର କୌଣସି ବିବାଦ ନାହିଁ। କେବଳ ନୀତି ଏବଂ ଆଦର୍ଶଗତ ପାର୍ଥକ୍ୟ ହେତୁ ମୁଁ ଦଳ ଛାଡିଛି। ରିପୁନ୍ ବୋରା ଆହୁରି କହିଛନ୍ତି ଯେ ତୃଣମୂଳ ସ୍ତରରୁ ଉପର ସ୍ତର ପର୍ଯ୍ୟନ୍ତ କଂଗ୍ରେସ ଦଳର ସମସ୍ତେ ପରସ୍ପର ସହ ଲଢ଼ୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ବିଜେପି ଦ୍ରୁତ ଗତିରେ ବଢୁଥିବାବେଳେ ସମ୍ବିଧାନ ତଥା ଦେଶର ଧର୍ମନିରପେକ୍ଷତାକୁ ଭାଙ୍ଗିବାରେ ଲାଗିଛି । ଏଭଳି ପରିସ୍ଥିତିରେ ଦେଶର ସର୍ବ ପୁରାତନ ଦଳ କଂଗ୍ରେସ, ଯାହା ବିଜେପି ବିରୋଧରେ ଲଢ଼ିବା କଥା, ନିଜ ମଧ୍ୟରେ ଲଢେଇ କରୁଛି | ରିପୁନ କହିଛନ୍ତି ଯେ ବିଜେପି ସହିତ ଲଢ଼ିବା ପାଇଁ ଟିଏମସିର ସାମର୍ଥ୍ୟ ଅଛି। ମମତା ବାନାର୍ଜୀ ଯେଉଁଭଳି ଭାବରେ ବିଜେପି ବିରୋଧରେ ଆକ୍ରମଣାତ୍ମକ ଲଢେଇ କରିଥିଲେ, ମୁଁ ନିଶ୍ଚିତ ଯେ କେବଳ ଟିଏମସି ବିଜେପି ବିରୋଧରେ ଲଢ଼ିପାରିବ।
ସୂଚନା ଥାଉ କି ରବିବାର ଦିନ କଂଗ୍ରେସ ହାତ ଛାଡ଼ି ଅଲ ଇଣ୍ଡିଆ ତୃଣମୂଳ କଂଗ୍ରେସରେ ଯୋଗ ଦେଇଥିଲେ ରିପୁନ। ଟିଏମସିର ଜାତୀୟ ସାଧାରଣ ସମ୍ପାଦକ ଅଭିଷେକ ବାନାର୍ଜୀ ଆସାମ କଂଗ୍ରେସର ପୂର୍ବତନ ଅଧ୍ୟକ୍ଷ ତଥା ପୂର୍ବତନ ରାଜ୍ୟସଭା ସାଂସଦଙ୍କୁ ଦଳରେ ସାମିଲ କରାଇଥିଲେ । ସେ ପୂର୍ବରୁ ଆସାମର ପଞ୍ଚାୟତ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ, ଶିକ୍ଷା ମନ୍ତ୍ରୀ, ରାଜ୍ୟସଭା ସାଂସଦ ତଥା ଆସାମ ପ୍ରଦେଶ କଂଗ୍ରେସ କମିଟିର ପୂର୍ବତନ ଅଧ୍ୟକ୍ଷ ଭାବେ ଦାୟିତ୍ବ ତୁଲାଇଛନ୍ତି।