ଭୁବନେଶ୍ବର: ଶିଳ୍ପ ପ୍ରକଳ୍ପ ସ୍ଥାପନ ଲାଗି ନିବେଶ ପ୍ରସ୍ତାବ ହାସଲ କରିବାରେ ଓଡ଼ିଶା ସାରା ଦେଶରେ ଏକ ନମ୍ବର ସ୍ଥାନରେ ରହିଛି। ୨୦୨୩ରେ ଓଡ଼ିଶା ୨,୧୦,୮୩୭ କୋଟି ଟଙ୍କାର ନିବେଶ ପ୍ରସ୍ତାବ ହାସଲ କରିଥିଲା। ସାରା ଦେଶରେ ଏହି ସମୟରେ ୧୨୬୭ଟି ନିବେଶ ପ୍ରସ୍ତାବ ଆସିଥିବା ବେଳେ ତାହା ଦୁଇ ପଞ୍ଚାମାଂଶ ଭାଗ ଓଡ଼ିଶାକୁ ମିଳିଥିଲା। ଗୁଜରାଟକୁ ୬୨,୫୩୫ କୋଟି ଟଙ୍କା, ମହାରାଷ୍ଟ୍ରକୁ ୫୯,୫୫୧ କୋଟି ଟଙ୍କା ଏବଂ ମଧ୍ୟପ୍ରଦେଶକୁ ୨୨,୧୬୩ କୋଟି ଟଙ୍କାର ନିବେଶ ପ୍ରସ୍ତାବ ମିଳିଥିବା ଜଣାପଡ଼ିଛି। ସେହିପରି, ତେଲେଙ୍ଗାନା ଓ ଆନ୍ଧ୍ରପ୍ରଦେଶକୁ ଯଥାକ୍ରମେ ୧୩,୨୪୨ କୋଟି ଟଙ୍କା ଏବଂ ୧୨,୨୩୮ କୋଟି ଟଙ୍କାର ନିବେଶ ପ୍ରସ୍ତାବ ମିଳିଥିଲା। ୨୦୨୩ର ଡିସେମ୍ବର ମାସରେ ୧୨,୨୭୪ କୋଟି ଟଙ୍କାର ୯୨ଟି ଶିଳ୍ପ ନିବେଶ ବୁଝାମଣା ହୋଇଥିଲା। ସେଥିରୁ ଗୁଜରାଟକୁ ୫୦୮୧ କୋଟି ଟଙ୍କା, ଓଡ଼ିଶାକୁ ୧,୨୮୫ କୋଟି ଟଙ୍କା ଏବଂ ମହାରାଷ୍ଟ୍ରକୁ ୧୧୪୫ କୋଟି ଟଙ୍କାର ପ୍ରସ୍ତାବ ମିଳିଥିଲା। ରସାୟନ, ଧାତବ ଓ ଇଲେକ୍ଟ୍ରିକାଲ ଉପକରଣ ଶିଳ୍ପକୁ ଅଧିକ ନିବେଶ ପ୍ରସ୍ତାବ ଆସିଥିଲା। ରସାୟନ କ୍ଷେତ୍ରକୁ ୩୦୩୨ କୋଟି ଟଙ୍କା, ଧାତବ ଶିଳ୍ପକୁ ୧୮୫୩ କୋଟି ଟଙ୍କା ଓ ଇଲେକ୍ଟ୍ରିକାଲ୍ ଉପକରଣ କ୍ଷେତ୍ରକୁ ୧୮୪୮ କୋଟି ଟଙ୍କାର ନିବେଶ ପ୍ରସ୍ତାବ ଆସିଥିଲା। ୨୦୨୩ରେ ଆସିଥିବା ନିବେଶ ପ୍ରସ୍ତାବଗୁଡ଼ିକ କାର୍ଯ୍ୟକାରୀ ହେଲେ ୫,୩୦,୨୯୭ ନିଯୁକ୍ତି ସୁଯୋଗ ସୃଷ୍ଟି ହେବ। ତାହା ୨୦୨୨ର ୩,୬୭,୧୭୪ ନିବେଶ ସୁଯୋଗ ତୁଳନାରେ ୪୪.୪ ପ୍ରତିଶତ ଅଧିକ।
![Sambad Whatsapp](https://cdn-icons-png.flaticon.com/512/2504/2504957.png)
Sambad is now on WhatsApp
Join and get latest news updates delivered to you via WhatsApp
ନିବେଶ ପ୍ରସ୍ତାବଗୁଡ଼ିକର ବାସ୍ତବ କାର୍ଯ୍ୟକାରୀତାରେ ୨୦୨୩ରେ ୧୨.୩ ପ୍ରତିଶତ ବୃଦ୍ଧି ଘଟିଛି। ୨୦୨୨ରେ ୨,୫୦,୦୬୪ କୋଟି ଟଙ୍କାର ୯୧୬ଟି ନିବେଶ ପ୍ରସ୍ତାବ କାର୍ଯ୍ୟକାରୀ ହୋଇଥିଲା। ୨୦୨୩ରେ ୨,୮୦,୯୬୪ କୋଟି ଟଙ୍କାର ୯୯୯ଟି ନିବେଶ ପ୍ରସ୍ତାବ କାର୍ଯ୍ୟକାରୀ ହୋଇଛି। ଯଦି ୨୦୨୧ ତଥ୍ୟ ସହ ତାହାକୁ ତୁଳନା କରାଯିବ ତେବେ ୨୦୨୩ରେ ନିବେଶ ପ୍ରକଳ୍ପ କାର୍ଯ୍ୟକାରୀତାର ପ୍ରଦର୍ଶନ ନୈରାଶ୍ୟଜନକ ରହିଛି। ୨୦୨୧ରେ ୩,୪୭,୯୭୮ କୋଟି ଟଙ୍କାର ନିବେଶ ପ୍ରକଳ୍ପ କାର୍ଯ୍ୟକାରୀ ହୋଇଥିଲା। କେବଳ ରସାୟନ କ୍ଷେତ୍ରରେ ୭୦,୨୦୬ କୋଟି ଟଙ୍କାର ପ୍ରକଳ୍ପ କାର୍ଯ୍ୟକାରୀ କରାଯାଇଥିଲା। ଖାଦ୍ୟ ପ୍ରକ୍ରିୟାକରଣ କ୍ଷେତ୍ରରେ ୩୦,୨୭୧ କୋଟି ଟଙ୍କା ଏବଂ ଇଲେକ୍ଟ୍ରିକାଲ୍ ଉପକରଣ କ୍ଷେତ୍ରରେ ୨୮,୦୭୧ କୋଟି ଟଙ୍କାର ନିବେଶ ପ୍ରକଳ୍ପ କାର୍ଯ୍ୟକାରୀ ହୋଇଛି।
କେଉଁ ରାଜ୍ୟକୁ କେତେ
ରାଜ୍ୟ ନିବେଶ ପ୍ରସ୍ତାବ (ଟ.)
ଓଡ଼ିଶା ୨,୧୦,୮୩୭ କୋଟି
ଗୁଜରାଟ ୬୨,୫୩୫ କୋଟି
ମହାରାଷ୍ଟ୍ର ୫୯,୫୫୧ କୋଟି
ମଧ୍ୟପ୍ରଦେଶ ୨୨,୧୬୩ କୋଟି
ତେଲେଙ୍ଗାନା ୧୩,୨୪୨ କୋଟି
ଆନ୍ଧ୍ରପ୍ରଦେଶ ୧୨,୨୩୮ କୋଟି