ହମାସର ଅମାନବୀୟ ଅତ୍ୟାଚାର ଭିଡିଓ ଭାଇରାଲ: ରକ୍ତରେ ଜୁଡୁବୁଡୁ ବନ୍ଧକ ମହିଳା ସୈନିକଙ୍କ ପରିବାର ନେତାନ୍ୟାହୁଙ୍କୁ ଘେରିଲେ
ଜେରୁଜେଲମ: ଇସ୍ରାଏଲ ଏବଂ ହମାସ ମଧ୍ୟରେ ଯୁଦ୍ଧ ଜାରି ରହିଛି। ହମାସ ଯୋଦ୍ଧାମାନେ ଇସ୍ରାଏଲର ମହିଳାମାନଙ୍କୁ ବନ୍ଧକ ରଖିଛନ୍ତି। ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଏହି ବନ୍ଧକ ମହିଳାମାନଙ୍କୁ ମୁକ୍ତ କରିବାରେ ସକ୍ଷମ ହୋଇ ପାରିନାହାନ୍ତି। ପୀଡ଼ିତାଙ୍କ ପରିବାର ମହିଳା ଅପହରଣ ଓ ବଳାତ୍କାର ପାଇଁ ପ୍ରଧାନମନ୍ତ୍ରୀ ନେତାନ୍ୟାହୁଙ୍କୁ ଦାୟୀ କରିଛନ୍ତି।
![Sambad Whatsapp](https://cdn-icons-png.flaticon.com/512/2504/2504957.png)
Sambad is now on WhatsApp
Join and get latest news updates delivered to you via WhatsApp
ଦି ଜେରୁଜେଲମ୍ ପୋଷ୍ଟର ଏକ ରିପୋର୍ଟ ଅନୁଯାୟୀ, ଅନେକ ମହିଳା ସୈନିକ ଗାଜାରେ ହମାସ ଦ୍ୱାରା ବନ୍ଦୀ ହୋଇ ରହିଛନ୍ତି। ପୀଡିତାଙ୍କ ପରିବାର ପ୍ରଧାନମନ୍ତ୍ରୀଙ୍କୁ ନିନ୍ଦା କରିବା ସହ ଇସ୍ରାଏଲ୍ ବନ୍ଧକମାନଙ୍କୁ ମୁକ୍ତ କରିବାରେ ବିଫଳ ହେବାରୁ ତାଙ୍କୁ ଘେରିଛନ୍ତି। ୭ ଅକ୍ଟୋବର ୨୦୨୩ରେ ହମାସ ଇସ୍ରାଏଲ ଉପରେ ଆକ୍ରମଣ କରି ସାତଜଣ ମହିଳା ସୈନିକଙ୍କୁ ବନ୍ଧକ ରଖିଥିଲା। ଏ ସମ୍ପର୍କରେ ନେତାନ୍ୟାହୁଙ୍କ ଉପରେ ଚାପ ପକାଇବା ପାଇଁ ମହିଳାଙ୍କ ପରିବାର ତାଙ୍କ ଅପହରଣର ଚିତ୍ର ପ୍ରକାଶ କରିଛନ୍ତି।
ଏହି ଆକ୍ରମଣରେ ୧୨୦୦ଜଣଙ୍କର ମୃତ୍ୟୁ ଘଟିଥିଲା ଏବଂ ୨୫୫ ରୁ ଅଧିକ ଲୋକ ବନ୍ଦୀ ହୋଇଥିଲେ। ଅସ୍ଥାୟୀ ଚୁକ୍ତି ପରେ ହମାସ୍ ୧୦୫ ବନ୍ଧକଙ୍କୁ ମୁକ୍ତ କରିଥିଲା। କିନ୍ତୁ ଏବେ ମଧ୍ୟ ୧୨୫ ଇସ୍ରାଏଲ୍ ନାଗରିକ ବନ୍ଦୀ ଅବସ୍ଥାରେ ଅଛନ୍ତି। ସାତ ମାସରେ, ହମାସ୍ କିଛି ବନ୍ଧକଙ୍କୁ ହତ୍ୟା କରିଛି। ଏହି ସମୟରେ, ବନ୍ଧକମାନଙ୍କ ପରିବାରକୁ ପ୍ରତିନିଧିତ୍ୱ କରୁଥିବା ଏକ ଗୋଷ୍ଠୀ ଏକ ଭିଡିଓ ଜାରି କରିଛି ଯେଉଁଥିରେ ପାଞ୍ଚ ଜଣ ଇସ୍ରାଏଲ୍ ମହିଳା ସୈନିକ ନଜର ଆସିଛନ୍ତି। ସେମାନେ ରକ୍ତରେ ଜୁଡୁବୁଡୁ ଅବସ୍ଥାରେ ରହିଛନ୍ତି।
ଏହି ଭିଡିଓ ରିଲିଜ୍ ହେବା ପରେ ଇସ୍ରାଏଲୀୟମାନଙ୍କୁ ମୁକ୍ତ କରିବା ପାଇଁ ନେତାନ୍ୟାହୁଙ୍କ ଉପରେ ଚାପ ବୃଦ୍ଧି ପାଇଛି। ଗତ କିଛି ମାସ ମଧ୍ୟରେ ହମାସ ସହିତ ଚୁକ୍ତିନାମା କରିବାକୁ ଅନେକ ଚେଷ୍ଟା କରାଯାଇଥିଲା, କିନ୍ତୁ ସବୁ ବିଫଳ ହୋଇଥିଲା। ଏହା ପଛର ଉଦ୍ଦେଶ୍ୟ ଥିଲା ଇସ୍ରାଏଲ୍ ବନ୍ଦୀମାନଙ୍କୁ ହମାସରୁ ମୁକ୍ତ କରିବା।
ଗାଜାରେ ଇସ୍ରାଏଲର ଆକ୍ରମଣ ପରେ ଗତ ସାତ ମାସ ମଧ୍ୟରେ ୩୩,୦୦୦ରୁ ଅଧିକ ପାଲେଷ୍ଟାଇନୀୟଙ୍କ ମୃତ୍ୟୁ ଘଟିଛି ବୋଲି ଗାଜାରେ ଥିବା ପାଲେଷ୍ଟାଇନ ସ୍ୱାସ୍ଥ୍ୟ ମନ୍ତ୍ରଣାଳୟ ସୂତ୍ରରୁ ରିପୋର୍ଟ ପ୍ରକାଶ ପାଇଛି।