ବାହାନଗା ଟ୍ରେନ୍ ଦୁର୍ଘଟଣା: ଜେଇଙ୍କ ଭଡ଼ାଘରେ ୮ ଘଣ୍ଟା ଯାଞ୍ଚ କଲା ସିବିଆଇ
ସୋର/ବାହାନଗା: ବାଲେଶ୍ବର ଜିଲ୍ଲା ବାହାନଗା ଟ୍ରେନ୍ ଦୁର୍ଘଟଣାର ତଦନ୍ତ କରୁଛି ସିବିଆଇ। ଏଯାଏ ଷ୍ଟେସନ୍ ମ୍ୟାନେଜରଙ୍କ ସହ ୧୨ ଜଣରୁ ଅଧିକ ବିଭାଗୀୟ ଅଧିକାରୀ ଓ କର୍ମଚାରୀଙ୍କୁ ତଦନ୍ତ ପରିସରଭୁକ୍ତ କରାଯିବା ସହ ବୟାନ୍ ରେକର୍ଡ ସରିଛି। ଏପରି ସମୟରେ ଆଜି ବାହାନଗା ଷ୍ଟେସନ୍ର ସିଗ୍ନାଲ୍ କନିଷ୍ଠ ଯନ୍ତ୍ରୀ (ଜେଇ) ଅମୀର ଖାନଙ୍କ ଭଡ଼ାଘର ଯାଞ୍ଚ ହୋଇଛି। ସକାଳ ପ୍ରାୟ ୮ଟା ୧୫ ମିନିଟ୍ ବେଳେ ୭ ଜଣିଆ ସିବିଆଇ ଟିମ୍ ଜେଇ ଅମୀର ଖାନଙ୍କୁ ସାଙ୍ଗରେ ଧରି ସୋର ପୌରପାଳିକା ଅଧୀନ ଅନ୍ନପୂର୍ଣ୍ଣା ମିଲ୍ କ୍ୟାମ୍ପସ୍ସ୍ଥିତ ତାଙ୍କ ଭଡ଼ାଘରେ ପହଞ୍ଚିଥିଲେ। ସେଠାରେ ଘର ସିଲ୍ ଖୋଲି ବିଭିନ୍ନ କାଗଜପତ୍ର ଯାଞ୍ଚ କରିଥିଲେ। ଦୀର୍ଘ ୮ ଘଣ୍ଟାରୁ ଅଧିକ ସମୟ ଯାଞ୍ଚ ପ୍ରକ୍ରିୟା ଚାଲିଥିଲା। ଅପରାହ୍ନ ପ୍ରାୟ ୪ଟା ୪୦ ମିନିଟ୍ ବେଳକୁ ସିବିଆଇ ଟିମ୍ ଶ୍ରୀ ଖାନଙ୍କ ସହ କିଛି କାଗଜପତ୍ର ନେଇ ଭୁବନେଶ୍ବର ଅଭିମୁଖେ ଯାଇଥିବା ଜଣାପଡ଼ିଛି। ଗତକାଲି ସକାଳେ ଶ୍ରୀ ଖାନଙ୍କ ଭଡ଼ା ଘରେ ୫ ଜଣିଆ ସିବିଆଇ ଟିମ୍ ଚଢ଼ାଉ କରିଥିଲା। ଘରେ ତାଲା ଲାଗିଥିବାରୁ ଟିମ୍କୁ ଅପେକ୍ଷା କରିବା ପାଇଁ ପଡ଼ିଥିଲା। ତେବେ ସଂଧ୍ୟା ସୁଦ୍ଧା କେହି ଆସି ନଥିଲେ। ଫଳରେ ଘରକୁ ସିଲ୍ କରିଦିଆଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ସୂଚନାଥାଉକି, ଚଳିତ ମାସ ୨ ତାରିଖ ସନ୍ଧ୍ୟା ପ୍ରାୟ ୭ଟା ବେଳେ ଅପ୍ ଲାଇନ୍ରେ ଯାଉଥିବା କରମଣ୍ଡଳ ଏକ୍ସପ୍ରେସ୍ ବାହାନଗା ବଜାର ଷ୍ଟେସନ୍ଠାରେ ଲୁପ୍ ଲାଇନ୍ରେ ଛିଡ଼ା ହୋଇଥିବା ଏକ ମାଲ୍ଗାଡ଼ିକୁ ଧକ୍କା ଦେଇଥିଲା। ଏହି ସମୟରେ ଭଦ୍ରକ ପଟୁ ଡାଉନ୍ ଲାଇନ୍ରେ ଆସୁଥିବା ଯଶବନ୍ତପୁର-ହାୱାଡ଼ା ଏକ୍ସପ୍ରେସର ଶେଷ ଦୁଇଟି ବଗି କରମଣ୍ଡଳ ବଗି ସହିତ ଧକ୍କା ହୋଇଥିଲା। ଏଥିରେ ୨୯୨ ଜଣ ଯାତ୍ରୀ ପ୍ରାଣ ହରାଇଥିବା ବେଳେ ୧୨ ଶହରୁ ଅଧିକ ଆହତ ହୋଇଥିଲେ।