୧୯ ବର୍ଷରେ ୪୫ ମୁଣ୍ତ
୧୯ ବର୍ଷ ଭିତରେ ବିଭିନ୍ନ କାରଣରୁ ୪୫ ଜଣ ବିଦା ହେଲେଣି ମନ୍ତ୍ରିମଣ୍ତଳରୁ
ଭୁବନେଶ୍ବର : ୨୦୦୦ରୁ ୨୦୧୯। ଚାରି ଥରରେ ପାଖାପାଖି ୧୯ ବର୍ଷ ଧରି ରାଜ୍ୟକୁ ଶାସନ କରୁଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ନିଜର ତଥା ଦଳର ଭାବମୂର୍ତ୍ତି ବଞ୍ଚାଇବା ପାଇଁ ଅନେକ ଥର ନିଜ ମନ୍ତ୍ରିମଣ୍ତଳର ସହଯୋଗୀଙ୍କ ପ୍ରତି କଠୋର ଆଭିମୁଖ୍ୟ ଗ୍ରହଣ କରିବାକୁ ପଛଘୁଞ୍ଚା ଦେଇ ନାହାନ୍ତି ନବୀନ। ଏହି ୧୯ ବର୍ଷ ଭିତରେ ବିଭିନ୍ନ କାରଣରୁ ୪୫ ଜଣ ବିଦା ହୋଇଛନ୍ତି ତାଙ୍କ ମନ୍ତ୍ରିମଣ୍ତଳରୁ।
Sambad is now on WhatsApp
Join and get latest news updates delivered to you via WhatsApp
ପ୍ରଥମ ପାଳି ଅର୍ଥାତ ୨୦୦୦ରୁ ୨୦୦୪ ମଧୢରେ ଛଅ ଜଣ ମନ୍ତ୍ରୀଙ୍କୁ ବିଦା କରିଥିଲେ ନବୀନ। ସେମାନେ ହେଲେ କମଳା ଦାସ, ପ୍ରଶାନ୍ତ ନନ୍ଦ, ନଳିନୀକାନ୍ତ ମହାନ୍ତି, ଅମର ଶତପଥୀ, ଦେବୀ ପ୍ରସାଦ ମିଶ୍ର ଓ ଏ ପି ସି˚ହ। ତାହା ବାଦ୍ ତତ୍କାଳୀନ ଅର୍ଥ ମନ୍ତ୍ରୀ ରାମକୃଷ୍ଣ ପଟ୍ଟନାୟକଙ୍କ ହାତରୁ ଅର୍ଥ ବିଭାଗ ଚାଲିଗଲା ପରେ ସେ ବି ଇସ୍ତଫା ଦେଇଥିଲେ। କେବଳ ଦୁର୍ନୀତିର ଅଭିଯୋଗରେ ଅଧିକା˚ଶ ମନ୍ତ୍ରୀଙ୍କୁ ବଳି ପକାଯାଇଥିଲା।
୨୦୦୪ରୁ ୨୦୦୯ ମଧୢରେ ନବୀନ ଗଡ଼ାଇଥିଲେ ୧୪ ମୁଣ୍ତ। ସେହିପରି ତୃତୀୟ ପାଳିରେ ପୁଣି ବିଭିନ୍ନ କାରଣରୁ ପଦ ହରାଇଥିଲେ ୧୪ ମନ୍ତ୍ରୀ। ଏହି ପାଳିରେ ସବୁଠାରୁ ବଡ଼ କାର୍ଯ୍ୟାନୁଷ୍ଠାନ ହୋଇଥିଲା ୨୦୧୨ ମସିହା ଅଗଷ୍ଟ ମାସରେ। ପ୍ୟାରୀ ମହାପାତ୍ରଙ୍କ ଯୁଗ ଶେଷ ହେଲା ପରେ ତାଙ୍କ ସହ ସମ୍ପର୍କ ଅଭିଯୋଗରେ ବିଦା େହାଇଥିଲେ ପ୍ରଫୁଲ୍ଲ ଘଡ଼ାଇ, ପ୍ରଫୁଲ୍ଲ ସାମଲ, ପ୍ରତାପ ଜେନା, ପୁଷ୍ପେନ୍ଦ୍ର ସି˚ହଦେଓ ଓ ଅତନୁ ସବ୍ୟସାଚ୍ଚୀ ନାୟକ। ତେବେ ୨୦୧୪ ନିର୍ବାଚନ ପରେ ପୁଷ୍ପେନ୍ଦ୍ର ଓ ଅତନୁ ନବୀନ ମନ୍ତ୍ରିମଣ୍ତଳକୁ ପ୍ରତ୍ୟାବର୍ତ୍ତନ କରିଥିଲେ। ପରବର୍ତ୍ତୀ ସମୟରେ ପ୍ରଫୁଲ୍ଲ ସାମଲ ଓ ପ୍ରତାପ ଜେନା ବି ମନ୍ତ୍ରିମଣ୍ତଳକୁ ଫେରିଥିଲେ।
ଚତୁର୍ଥ ପାଳିରେ ପ୍ରଥମ ମୁଣ୍ତ ଗଡ଼ିଥିଲା ୨୦୧୬ ଅକ୍ଟୋବରରେ ତତ୍କାଳୀନ ସ୍ବାସ୍ଥ୍ୟ ମନ୍ତ୍ରୀ ଅତନୁ ସବ୍ୟସାଚ୍ଚୀ ନାୟକଙ୍କର। ସମ୍ ହସ୍ପିଟାଲ୍ ଅଗ୍ନିକାଣ୍ତ ଘଟଣାରେ ତାଙ୍କ ଠାରୁ ଇସ୍ତଫା ମଗାଇଥିଲେ ନବୀନ। ତାହା ପରେ ୨୦୧୭ରେ ମନ୍ତ୍ରିମଣ୍ତଳ ପୁନର୍ଗଠନ ପ୍ରକ୍ରିୟାରେ ବାଦ୍ ପଡ଼ିଲେ ଆଉ ୮ ଜଣ। ତେବେ ସା˚ଗଠନିକ କାର୍ଯ୍ୟରେ ଅଧିକ ସମୟ ଦେବା ପାଇଁ ସେମାନେ ଇସ୍ତଫା ଦେଇଛନ୍ତି ବୋଲି କୁହାଗଲା। ୮ ଜଣଙ୍କ ମଧୢରୁ କେବଳ ପ୍ରଦୀପ ଅମାତଙ୍କୁ ବାଚସ୍ପତି କରାଗଲା। ୨୦୧୭ ଡିସେମ୍ବରରେ ଦାମୋଦର ରାଉତଙ୍କୁ ମନ୍ତ୍ରିମଣ୍ଡଳରୁ ବରଖାସ୍ତ କରିଥିଲେ ନବୀନ। ଅଭିଯୋଗ ଥିଲା, ସେ ବ୍ରାହ୍ମଣଙ୍କ ବିରୋଧରେ ଜାତିଆଣ ମନ୍ତବ୍ୟ ଦେଇଛନ୍ତି। ଚତୁର୍ଥ ପାଳି ସରିବାକୁ ଆଉ କିଛି ମାସ ବାକି ଥିଲା ବେଳେ ଆଜି ମୁଣ୍ଡ ଗଡ଼ିଛି ପ୍ରଦୀପ ମହାରଥୀଙ୍କର। ତୁଣ୍ଡ ଉପରେ ନିୟନ୍ତ୍ରଣ ନ ରଖିବାରୁ ଦାମଙ୍କ ପରି ଦଶା ଭୋଗିଛନ୍ତି ମହାରଥୀ।