ମାଫିଆଙ୍କ କବ୍ଜାରେ ଆରୁହା ପାହାଡ଼: ଦୈନିକ ୧୦ହଜାର ଟନ୍ ପଥର ଚୋରାଚାଲାଣ
୫ ସୈରାତ ବନ୍ଦ, କ୍ରସରଗୁଡ଼ିକରେ ବିପୁଳ ଚୋରାପଥର
ଯାଜପୁର: ଯାଜପୁରର ଧର୍ମଶାଳା ତହସିଲ ଅନ୍ତର୍ଗତ ଆରୁହା ପାହାଡ଼ ଏବେ ମାଫିଆଙ୍କ କବ୍ଜାରେ। ଏଠାରୁ ଦୈନିକ ୧୦ହଜାର ଟନ୍ କଳାପଥର ଚୋରାଚାଲାଣ ହେଉଥିବା ଆକଳନ କରାଯାଇଛି। ନିର୍ବାଚନ କାର୍ଯ୍ୟରେ ସରକାରୀ କଳ ବ୍ୟସ୍ତ ରହିଥିବା ବେଳେ ଚୋରା କାରବାର ଚରମସୀମାରେ ପହଞ୍ଚିଛି। ଲଘୁ ଖଣିଜ ଚୋରି ପାଇଁ ବାଟ ଫିଟିଛି। ଅଣଲିଜ୍ ସୈରାତରୁ ମେସିନ୍ ଲଗାଇ ଦିନରାତି କଳାପଥର ଖୋଳାଚାଲିଛି। ୧୪୭ଏକର ପରିମିତ ଆରୁହା ପାହାଡ଼ର ୫ଟି ସୈରାତ୍କୁ ଲିଜ୍ ଦିଆଯାଇଛି। ମୋଟ ଲିଜ୍ ଅଞ୍ଚଳ ଥିଲା ୮୩ ଏକର। ବହୁଦିନ ହେଲା ଏହି ସୈରାତ୍ଗୁଡ଼ିକୁ ପ୍ରଶାସନ ବନ୍ଦ କରିଦେଇଛି। ୩ଟି ସୈରାତର ଲିଜ୍ଧାରୀ ତ୍ରିନାଥ ଜେନାଙ୍କ ଉପରେ ୧୦କୋଟି ଟଙ୍କା ଜରିମାନା ହୋଇଥିବା ବେଳେ ମନୋଜ ସାମଲଙ୍କ ଗୋଟିଏ ସୈରାତରୁ ମାତ୍ରାଧିକ ଖନନ ପାଇଁ ୮.୬୩କୋଟି ଟଙ୍କା ଜରିମାନା ଓ ଶରତ ଜେନାଙ୍କ ଉପରେ ୧.୮୭କୋଟି ଟଙ୍କା ଜରିମାନା ଧାର୍ଯ୍ୟ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ଅତ୍ୟଧିକ ଖନନ ପାଇଁ ଜରିମାନା ସାଙ୍ଗକୁ ଖାଦାନକୁ ବନ୍ଦ କରାଯାଇଥିବା ବେଳେ ଏଠାରେ କିନ୍ତୁ ୧୦ଟି ମେସିନ୍ ଜରିଆରେ ବ୍ୟାପକ ପଥର ଖନନ କରଯାଉଛି। ଦୈନିକ ୧୦ହଜାର ଟନ୍ ପଥର ଆରୁହାରୁ ଚୋରାଚାଲାଣ ହେଉଛି। ପୂର୍ବରୁ ଲିଜ୍ ଥିବା ବେଳେ କିଛି ଗରିବ ଲୋକ ହାତରେ ପଥର ଭାଙ୍ଗି ଚଳୁଥିଲେ। ଏବେ କୋଟିପତି ମାଫିଆ ମେସିନ ଲଗାଇ ପାହାଡ଼ ଖୋଳି ଚାଲିଛନ୍ତି। ସୂଚନା ଅନୁସାରେ, ପାହାଡ଼ ତଳେ ଥିବା ୧୦ଟି କ୍ରସରରେ ଲକ୍ଷ ଲକ୍ଷ ଟନ୍ ଚୋରାପଥର ଗଚ୍ଛିତ ରହିଛି। ଗୋଟିଏପଟେ ଅନିୟନ୍ତ୍ରିତ ଖାଦାନ ଖନନ ଯୋଗୁ ପରିବେଶ ନଷ୍ଟ ହେବାସହ ବିସ୍ଫୋରଣ ଯୋଗୁଁ ସ୍ଥାନୀୟ ଅଞ୍ଚଳର ଲୋକେ ତ୍ରାହିତ୍ରାହି ଡାକୁଥିବା ବେଳେ ଅନ୍ୟପଟେ ପ୍ରଭାବଶାଳୀ ବ୍ୟକ୍ତିଙ୍କ ଦ୍ବାରା ଲୁଟ୍ ଚାଲିଥିବାରୁ ପ୍ରତିବାଦ କରିବାକୁ ସାଧାରଣ ଲୋକଙ୍କ ସାହସ ପାଉନାହିଁ। ନିର୍ବାଚନ ପାଇଁ ସତେଯେପରି ପାହାଡ଼କୁ ମାଫିଆଙ୍କ ହାତରେ ଟେକି ଦିଆଯାଇଛି।