କରୋନାରେ ଚାଲିଯାଇଥିଲେ ବାପା ଓ ପୁଅ, ଘରେ କଳାକନା ବୁଲାଇଦେଲେ ଚୋର, ବନ୍ଧୁକ ଦେଖାଇ ଲୁଟିନେଲେ ୨ଲକ୍ଷ ଟଙ୍କା, ୨୦ ଭରି ସୁନା
ବରୀ/ରତ୍ନଗିରି : ଯାଜପୁର ଜିଲ୍ଲା ବରୀ ଥାନା ଅନ୍ତର୍ଗତ ସେରପୁର ପଞ୍ଚାୟତ କୃଷ୍ଣନଗର ଗ୍ରାମର କାଞ୍ଚନବାଳା ଶୁକ୍ଳଙ୍କ ଘରୁ ଡକାୟତି ହୋଇଛି। ରବିବାର ବିଳମ୍ବିତ ରାତିରେ ଡକାୟତମାନେ ଘରେ ପଶି କାଞ୍ଚନବାଳାଙ୍କ ପରିବାର ଲୋକଙ୍କ ମୁଣ୍ଡରେ ବନ୍ଧୁକ ଓ ଛୁରି ଲଗାଇ ୨ଲକ୍ଷ ୨୦ ହଜାର ଟଙ୍କା ସହିତ ପ୍ରାୟ ୨୦ ଭରି ସୁନା ଅଳଙ୍କାର ଲୁଟି ନେଇଛନ୍ତି। ଗତ କିଛିଦିନ ତଳେ କାଞ୍ଚନବାଳାଙ୍କ ସ୍ବାମୀ ରାଧାଶ୍ୟାମ ଶୁକ୍ଳ ଓ ଏକମାତ୍ର ପୁଅ ଅମିତାଭଙ୍କର କରୋନାରେ ମୃତ୍ୟୁ ହୋଇଥିଲା। ଏବେ ଦୁର୍ବୃତ୍ତମାନେ ତାଙ୍କ ଘରେ କଳାକନା ବୁଲାଇ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ସ୍ବାମୀ, ପୁଅଙ୍କ ମୃତ୍ୟୁ ପରେ କାଞ୍ଚନବାଳା, ବୋହୂ କଳ୍ପନା, ଝିଅ ମଧୁସ୍ମିତା ଓ ଛୋଟଛୋଟ ଦୁଇ ନାତି ରହୁଛନ୍ତି। ଘରେ ପୁରୁଷ ଲୋକ କେହି ନଥିବା ସୁଯୋଗରେ ଗତ ରବିବାର ରାତି ପ୍ରାୟ ଦେଢ଼ଟା ବେଳେ ବାହାର ଗେଟ୍ ତାଲା ଭାଙ୍ଗି ୫/୬ ଜଣ ଦୁର୍ବୃତ୍ତ ଭିତରେ ପଶି ଘରର ସ୍କାଏଲାଇଟ୍ ଭାଙ୍ଗିବାକୁ ଉଦ୍ୟମ କରିଥିଲେ। ଏହି ସମୟରେ କବାଟ ବାଡ଼େଇବା ଓ ବାହାରେ ପାଟିଶୁଣି ଝିଅ ମଧୁସ୍ମିତା କବାଟ ଖୋଲି ଦେଖିବାକୁ ଚେଷ୍ଟା କରୁଥିବା ବେଳେ ଦୁର୍ବୃତ୍ତମାନେ ଘରେ ପଶିଯାଇଥିଲେ।